خناقة كل يوم الصبح

تم اضافة هذا الموضوع بواسطة الريس حنتيره | March 28th, 2013

الحلوه دي قامت تعجن في الفجريه ، والديك بيدن كوكو  كوووكو في الفجريه

المقطع ده من اغنية سيد درويش قوي جدا بس للاسف محدش اخد باله منه قبل الجواز ويمكن كمان بعد الجواز. بس لو الواحد ركز في المقطع ده هيلاقيه معبر جدا عن واقع كل بني ادم مصري. لو انت متجوز ، وممكن جدا تكون مخلف كمان حياتك الصبحيه هتختلف جدا عن ما كانت عليه وانت عازب يا معلم. لو انت في بيت بابي ومامي هتلاقي ماما الحنينه بتسيبك تنام لحد ما تشبع نوم (ميغركش انها بتصحيك تروح الجامعه ، او بتكركب في البيت علشان سيادتك تصحى او حتى تصحيك علشان تروح تشوف لقمة عيشك) انما الحياه بعد الجواز حماده تاني خالص….

المقطع الاول: الحلوه دي قامت تعجن في الفجريه

لو رجعنا للمقطع ده واخدنا اول جزء منه وهوه الحلوه دي قامت تعجن هنلاقي عمنا سيد درويش محددش هوه ايه الي بيتعجن بالظبط العيال ، حضرتك ، مواعين العشا ، الفطار وهوه بيتحضر …… مقالش سابهالنا مفتوحه

لو عندك عيال وعندهم مدارس يبقى العيال هيه الي هتتعجن يا كبير وطبعا صوت الخبط والتهبيد الي هيبقى شغال في الصاله بره في اعتقادي هيبقى صعب عليك تكمل نومك في جو الرعب ده (تخيل معايا فيلم حرب الكواكب ، او فيلم كوكب القرود الجزء التاني هتفهم اقصد ايه). الست المصريه الصميمه عندها طاقه جباره والطاقه دي بتكون في اقصاها اول ما بتصحى من النوم فا حاجه من الاتنين يا اما هتدور على حاجه (وغالبا حد) تفرغ فيه الطاقه دي ، يا اما هيتم كبتها (او بمعنى اصح هتحوشهالك وقت عوزة) وفي الحالتين انت الي هتلبس يا برنس.

اما لو انت بقى لسه عريس جديد فا برضه مبدأ العجن موجود وهتحس بيه في اصوات خبط وترزيع قريبين جدا من اصوات طبول الحرب الي كانو بيعملوها زمان علشان يرهبو العدو. في هذا الموقف بيستحضرني مسرحية وجهة نظر للفنان العظيم محمد صبحي وهوه بيقول اخبط برجلك جامد ترهب العدو……… هوه ده الخبط وهوه ده العدو اظنك فهمتني يا كبير…..

المقطع التاني: والديك بيدن كوكو  كوووكو في الفجريه

الست المصريه زي ما قلنا من حبه صغيره بيبقى عندها طاقه جباره اول ما بتصحى من النوم وطبعا الطاقه دي بتخليها كائن نهاري بدرجة اولى بمعنى ان اول ما الديك هيقول كوكو كووكو هتلاقيها قامت من السرير ، النشيد الوطني ، واديها يا باشا لازم الكل هوه كمان يـ كوكو كووكو هوه كمان. مختصر الي عايز اقوله الست المصريه وخصوصا لو كانت مش بتشتغل بتصحى بدري (بعد الفجر بحبه كده) وتبدأ رحلة العجن ، اهم نصيحه ليك حاول انك متبقاش العجين يا كبير………

خناقة كل يوم الصبح

نرجع بقى للموضوع الرئيسي وهوه خناقة كل يوم الصبح ، في مثل او مقوله بتقول تعددت الاسباب والموت واحد. نفس الكلام بالنسبه لخناقة كل يوم الصبح…… الاسباب كتير جدا والنهايه واحده خناقه على الريق كده تعكنن عليك ام اليوم من اوله ومش بعيد تضربلك سواق ميكروباص كسر عليك او تروح تعلق مديرك في الشغل علشان طلب منك شغل. في مجموعة السطور الجايه هقول بعض الاسباب الي تؤدي لخناقه كل يوم الصبح مع افتراض انك راجل متجوز ومخلف وعيالك في المدرسه بتوديهم معاك وانت رايح الشغل….

شاي بلبن او بيض مسلوق

احنا الذكور او الازواج بطبعنا في حاجات كانت امنا بتغصبنا عليها واحنا صغيرين اول ما بنصحى من النوم زي شرب اللبن او وضعه على المشروبات وزي البيض المسلوق ، ممكن جدا نعتبرها عقدة طفوله او اسقاط لفترة الطفوله الي كلنا عشناها فا لما كبرنا العقده دي كبرت معانا وبقى مستحيل انها تتغير او تتعدل. تخيل معايا كده انك تصحى من نومك تلاقي كباية الشاي ابو لبن محطوطه على الترابيزه بتاعت الانتريه ومعاها سندوتش بيض مسلوق (ياصباح وجع البطن) فا طبعا هتنبه مراتك انك مش بتشرب شاي بلبن على غيار الريق وكمان انك لو اكلت بيض هتقلب ريحة المكتب. على اي حال هيحصل الحوار الاتي بالنص والكلمه.

انت: حبيبتي انتي عارفه اني مش بشرب شاي بلبن الصبح ولا باكل بيض مسلوق علشان بطني والمكتب والريحه وانتي عارفه (لازم ها ها ها او على الاقل ابتسامه بلهاء)

المدام: كله دلوقتي ومش هعملهولك تاني (مع انها لسه عاملالك الشاي بلبن امبارح ، نهار اسود هيه لحقت تنسى)

انت: حبيبتي ، لأ انا مينفعش اكله علشان بطني

المدام: (التون هنا هيبدأ يعلى شويه) اتعمل وخلاص ارميه يعني

انت: (في محاوله انك تملص من المهمه العسكريه) طيب بقولك انا مش هاكله وابقى افطري انتي بيه ماشي ، بس ممكن تعمليلي شاي ساده وحتتة جبنه.

المدام: (كأنك شتمتها بالظبط ، وممكن لو هيه في الاوضه التانيه تلاقيها جاتلك لغاية عندك) لأ مش ممكن انا مش خدامه عندك ، قوم اعمل لنفسك…… (غالبا بيبقى في برطمه مع شوية كلمات مش مفهومه)

ساعتها تحديدا ومع الجمله الاخيره تبدأ المعركه وانتو الاتنين طبول الحرب بتشتغل في ودنكم واديها رقص يا معلم…..

طبعا دي ممكن تكون اول خناقه (او احتمال خناقه) عالصبح كده وانت فريش ممكن جدا تخلص بغم وممكن جدا تتفاداها بلياقه وبأقل الخسائر في الارواح والممتلكات. نيجي بعدها للخناقه الي بعدها.

قوم لبس العيال معايا

اول ما معركة الشاي بلبن بتخلص نيجي للمعركه التانيه الا وهيه المساعده في تلبيس العيال علشان المدرسه. وطبعا كلنا عارفين ان الرجاله ملهمش صبر يلبسو العيال (وبصراحه ولا الستات كمان)

المدام: حسين تعالى لبس العيال معايا علشان ميتأخروش على المدرسه

انت: (ايه الوليه الي بتفكر في العيال دي ومش بتفكر ان انا كمان عايز البس واروح شغلي) وترد تقول حبيبتي انا بلبس انا كمان فا لو ملبستش كلنا هنتأخر

المدام: طيب خلص بسرعه وتعالى ساعدني

انت: (محاوله اخرى انك تملص) طيب (وطبعا ساعتها هتلبس هدومك بالتصوير البطيء)

المدام: (بعدها بـ30 ثانيه) انت لسه مخلصتش لبس ، اخلص العيال متعبه ومش عارفه البسهم

انت: (يادي اليوم الي باين من اوله هيه لسه منسيتش وفي محاوله لتغيير الموضوع) حبيبتي هوه فين البنطلون الكحلي بتاعي؟؟

المدام: هوه ده وقته انا بلبس العيال البس اي حاجه وتعالى ساعدني

انت: حاضر هدور عالبنطلون يا حبيبتي وهجيلك

المدام: (غالبا بتسمع خبط وطحن داير بيتبعهم صوت صراخ وعياط) يوووووووه اتعدل يابني مش عارفه البسك وابوك قاعد بيتشيك ، ياحسين سيب الي في ايدك وتعالى دلوقتي شوف عيالك.

انت: (العصبيه بدأت ، والمزيكا بتعلى وبتاخد بعضك وتروحلها وانت بتقول) يعني انزل من البيت ملط علشان البس العيال معاكي تعالى شوفيلي هدومي فيـــــــــــ ، وقبل ما توصل لتكملة كلمة فين هتلاقي مراتك واقفه قدام العيال والواد ابنك مش لابس غير الشراب بسسسسس ويمكن فرده واحده كمان….. يعني بقالك ربع ساعه سايباني ادور عالهدوم وبتلبسي الواد في الشراب (مش الشراب في الواد)…..

كلمه من هنا على كلمه من هنا ، وطوبه على طوبه خلي العركة منصوبه واديها طبل وزمر يا معلم…..

الهدوم النضيفه

بما ان تم ذكر البنطلون الكحلي في النقطه السابقه يبقى لازم نتطرق لموضوع البنطلون الكحلي. كل راجل فينا في طقم عنده بيحب يلبسه دايما علشان بيحس انه مظبوط عليه ، انما للاسف اول ما الست من دول تحس بالعلاقه بين الراجل وهدومه بقدرة قادر الطقم ده تحديدا لازم هتلاقيه في الغسيل دايما… تخيل معايا الحوار الاتي

انت: حبيبتي هوه فين الطقم البني الي بحب البسه؟

المدام: شوفه عندك في الدولاب لو مش موجود يبقى في الغسيل

انت: حبيبتي لأ مظنش انه في الغسيل لأني ملبـستوش من الاسبوع الي فات

المدام: طيب شوفه عندك تحت في المكوه (او المكواه)

انت: (بعد متلاقي القميص طالع من بق كلب ده اذا مكنش في الغسيل اصلا) حبيبتي ده مكرمش ومش هينفع البسه كده

المدام: البس اي حاجه تانيه وانا هوديه للمكوجي

انت: بس انا عايز البسه دلوقتي علشان عندي مقابله مهمه ، ممكن تكويهولي

المدام: انا مش هشغل المكوه دلوقتي ، انا مش فاضيالك. البس اي حاجه

انت: (طبعا مع حبك للطقم اياه ، ومع اصرارك انك تلبسه هتعاند وتصر انها تكويه فا تعمل حركه استفزازيه وتحط المكوه في الكهربا)

المدام: (تدخل الاوضه وتشوفك)

انت: تعالي انا شغلتلك المكوه اهو

المدام: لأ انا مش خدامه عندك البس اي حاجه

واديلو خناقه…… انزل بالنشيد يا معلم  (ايوة يا حارة ضالمة .. أحنا اللى نورنا        أيوة يا حارة هس هس .. أحنا اللى عمالنلكم حس)

فين مفاتيحي يا جزم

زي فيلم احمد حلمي ما بيقول حماده الي فات ده كله حاجه والاتنين حماده الي جايين حماده تاني خااااااااص ، الخناقات الي جايه دي تقريبا خناقات يوميه بجد ، يعني لو انت عرفت تعدي من الخناقات الي فوق دي بنجاح لازم لازم هتلبس في الاتنين الي جايين دول يا معلم. اول واحده فيهم موقعة المفاتيح.

كل راجل فينا مهمل بطبعه وانا شخصيا مؤمن جدا بمقولة (Men don’t grow up, they just got bigger) ممكن جدا الواحد مننا يرمي مفاتيحه وينسى هوه رماها فين واستحاله يعترف انه مهمل او رماها اومش فاكر مكانها فا عادة مع قرب موعد النزول للشغل بيدور الحوار الاتي……

انت: مفاتيحي فين يا جزم (مخاطبا العيال) وديتوها فين

المدام: معرفش دول عالسفره كده

انت: مش عالسفره ، شوفيها كده في اوضة النوم

المدام: حاضر

انت: (بعدها بـ3 دقايق تروح لأوضة النوم تدور مع مراتك تلاقيها مش في الاوضه اصلا وبتعمل حاجه في المطبخ فا تروحلها المطبخ وتقول) افتكر ان المفروض تدوري معايا اكيد اكيد مش هبقى حاطط المفاتيح في التلاجه او في الفرن

المدام: مانت مسطول ، فاكر من يومين لما لقيت الريموت في الفريزر

انت: (وشك يبدأ يحمر من النرفزة علشان بتعايرك باهمالك) قولتلك مش انا (محاوله لألصاق التهمه بالعيال) ممكن يكون الواد هوه الي حطه انا هحطه في الفريزر ليه…….

المدام: لأ كان انت لما قولتلك طلع العيش الفينو للعشا قبلها بوم

انت: مش وقت نقاش اخلصي ودوري معايا عايز اتزل ومتأخر

المدام: طيب شوفت في الحمام

انت: (باستغراب وتهكم) وايه الي هيوديهم الحمام ، لقيو نفسهم مش نضاف فا قالو لما اروح اخد شاور مثلا

المدام: فاكر لما لقينا الموبايل بتاعك عالبانيو راح لوحده هناك برضه ؟؟؟؟

انت: (خلاص قربت تنفجر) طيب ممكن تدوري هناك يا حبيبتي (غالبا حبيبتي بتطلع وانت بتجز على سنانك)

المدام: حاضر (بقرف)

عادة الخناقه بتبدأ قبل ما تلاقي المفاتيح بسبب الردور المستفزة والغير طبيعيه للست وحتى لو لقيت المفاتيح بيحصل خناقه لأحد الاسباب الاتيه.

  1. يا اما انت فعلا ناسيها في الحمام او في جيب بنطلونك وساعتها مراتك هتعايرك بأنك مسطول ومهمل وانا تعبت وانا مش خدامه عندكم وهيحصل خناقه
  2. يا اما هيه الي هتكون شالتهم من جيبك وضيعتهم وبرضه انا تعبت وانا مش خدامه عندكم الخناقه هتبدأ
  3. يا اما حد من العيال اخدهم علشان يعمل نفسه بيسوق وفي الحاله دي برضه هتتخانق مع مراتك علشان سابت المفاتيح للعيال تلعب بيهم وبرضه انا هلاحق على ايه ولا ايه وانا تعبت وانا مش خدامه عندكم.

حبيبتي مشوفتيش الموبايل بتاعي؟

نيجي بقى للموقعه اليوميه التانيه الا وهيه رحلة البحث عن الموبايل وفيها عادة التليفون بيبقى مختفي في البيت يا اما تحت السرير يا اما بين الشلت بتاعت الانتريه. عادة بيدور الحوار الاتي……

انت: ياعيال حد شاف الموبايل بتاعي

المدام:شوف انت رميته فين ، اخر مره معاك كان فين؟ اصلا انت جبته معاك البيت؟

انت: ايوه كان معايا امبارح لما كنت بتكلم فيه ، طاب هاتي تليفونك ارن منه على تليفوني

المدام: ممعيش رصيد علشان انت مش هاين عليك تشحنلي يا جلده ، احسن خليك كده اقعد دور عليه.

ومن هنا الراجل ممكن ينسى هوه بيدور علي ايه اصلا ويمسك في جلده ويقعد يعاير في مراته انه يا ما اشترى وياما صرف وحوار انتي ناقصك ايه وغالبا ما بيتطور الامر لخناقه صباحيه مبهره.

الحلول لتفادي خناقة كل يوم الصبح:

اولا: بالنسبه للراجل خليك كوووووووول لازم تحط في دماغك ان طاقة الست بتبقى في اعلى دراجاتها الصبح يعني لو دخلت خناقه مع مراتك الصبح استحاله هتكسب فيها لأنك تقريبا نايم على روحك ومراتك في اوج طاقتها وطبعا مش هتبقى معركه متكافأة

ثانيا:  متوجعش دماغك في الخناقات ، مش بتحب الشاي بلبن متشربوش وسيبه زي ما هوه واول ما توصل الشغل اعمل لنفسك احلى كباية شاي هناك. ولو قالتلك لبس العيال ادخل الحمام واقعد هناك اطول فتره ممكنه (عادة الجرنال بيبقى اوفى صديق في الحمام)

ملاحظة علشان الحكومه

الكلام ده مش مقصود بيه شخص معين واي تطابق بين الحوارات الي فوق وبين حياتك الشخصيه انا مليش دعوه المشكله فيك(ي) انتي مش فيا انا……..

تعليق واحد بس

مواضيع اجدد
  •