هتيجي تقابل بابا امتى يا حبيبي؟
حبيبي اخرت علاقتنا دي ايه؟
حبيبي انا عندي خبر ممكن ميعجبكش ، انا حامل !!!
اسئله كتير يا اما بنشوفها في التلفزيون في مسلسل الساعه تسعه ، يا اما في فيلم الساعه 12. دايما بتسألها البطله للبطل علشان تعرف ايه اخرت مشيهم مع بعض ، نظرا لخوفها ان حد من قرايبها يشوفهم مشيين مع بعض في الشارع (مع ان مصر كلها تقريبا شافتهم مع بعض الا فئة قليله وهيه قرايبها).
زمان في الافلام بتاعت الخمسينات لما كانو بيخوفو البنات من العلاقه القريبه زياده عن اللزوم مع الصبيان كانو بيجيبو كلمة هتقابل بابا امتى يا محسن وطبعا محسن ساعها بيكرفها ويحلقلها. ومع تطور الاجيال وفي السبعينيات ومع وتطور العلاقه بين البنت والشاب الغضنفر الوسيم (طبعا كلنا عارفينه ابو قميص بمبي وشعره الابيض الي بيخطف قلوب البنات) اتغيرت العباره واتحولت لكلمة هيه ايه اخرت علاقتنا او هوه ايه اخرت مشينا مع بعض يا محسن ، وطبعا نفس الحكايه هيعملها محسن هيحلقلها ويكرفها. دلوقتي في الافلام بتاعت جيلنا العباره اتغيرت للمره التالته واتحورت وبقت “محسن انا حامل” (يا نهار ملوش ملامح) انما على مين محسن هوه محسن حلاق مخضرم من ايام الخمسينات بس وصل لدرجة انه بقى متمكن من الحلاقه وبقى بيحلق بالمكنه وبالموس وكمان طلعله انياب بقى بيعرف يعض بيها (مش مجرد تسبيل عينين وكلام حلو وخلاص) ولما يخلص اكل يرميها عضمه محدش هيبصلها ولا حتى كلب ضال ماشي في الشارع. ……
دايما افلامنا العربي بتعكس حالة المجتمع والافكار السائده فيه بمعنى ان زمان كانت العلاقه بين الولد والبنت قريبه جدا انما البنت كانت بتعرف ازاي تحافظ على نفسها من الولد. انما دلوقتي لو شفت مسلسل فيه اتنين مجرد بصو وابتسمو لبعض هتعرف علطول انهم هيضربو الورقه العرفي في الحلقه الجايه وبعدها بكام حلقه هيبدأ حوار انا حامل والمشاكل المعروفه للكل والي بتحصل في كل مسلسل دلوقتي والي بتنتهي دايما نهايه سعيده لصالح البنت (بجواز محسن منها) على عكس الحقيقي الي بيحصل في الحياه من قواضي واثبات نسب وحوارات طويله. شفناها في كذا قضيه تم اثارتها والمجتمع كله عاشها مع الابطال الحقيقيين.
اول حاجه ايه هوه الجواز العرفي
الجواز العرفي هوه جواز بيبقى معتمد على ورقه لحمه الاتنين بيمضو عليها بأنهم متجوزين وساعات الورقه دي مش بتبقى موجوده من اصله والجواز بيبقى شفوي وطبعا في الحالتين دول الجواز بيبقى فاسد ومينفعش ببصله وممكن الورقه دي يعملو عليها شوربه عرفي.
والصوره تانيه للجواز ده وهيه عباره عن ورقه وبيمضي عليها الاتنين بالاضافه لأتنين شهود برضه بيمضو عليها بس لازم يكون جميع الاطراف مكتملي الاهليه (يعني متجبليش عروسه قاصر بنت 16 او 17 سنه وتقولي اتجوزها عرفي ، مينفعش. ولا تقولي طيب هستلف اتنين شهود من المدرسه الاعداديه الي جنبنا برضه مينفعش يا فتك لازم اتنين شهود مكتملي الاهليه) وطبعا ميكونوش مجانين (ولو اني اشك ان في حد عاقل ممكن يشهد على جواز عرفي)
ايه اسباب الجواز العرفي؟
اولا : ممكن الواد او البت يلمحو للأم او الاب بأنهم كبروا وعايزين يتجوزو فا الاب يقول وماله بس خلصو الدراسه الاول وبعد ما يخلصو الدراسه الاب يقول لما يخلص الجيش ويشتغل (يا اما يشتغل بس لو هيتفرج على الجيش فيديو) ، وطبعا لما يبدأ الشاب الغلبان الشغل والعيلتين يتلمو مع بعض في مكان واحد ويبقى الشاب عامل فيها زي الديك الشركسي يقوم ابو البنت يقول انا عايز منه شقه في المعادي وعالنيل واربع مطارح وجهازك مش هيقل عن اربع اوض بمنافعهم والمهر مش هيكون اقل من عشرميت الف جنيه امال ايه هيه بنت خالت بنت عمتها احسن منها في ايه (بس نظرا لقانون الخلع فا تلاقي معظم العائلات بتركز في المؤخر اكتر من المقدم من المهر). وطبعا الشاب هياخد ديله في سنانه ويجري في محاوله انه يحافظ على ما تبقى من كرامته ويروح للعرفي علشان اسهل واهو جواز والسلام .
طبعا ده سبب رئيسي في انتشار الجواز العرفي بين الشباب وهوه ان كل شاب بيفكر الف مره قبل ما يتقدم لوحده بيحبها وبيخاف من اليوم الي يجي فيه ابو العروسه يعاين نوع الشكولاته الي هوه جايبها معاه (وفي سره هيقول ايه النوع المعفن الي هوه جايبه ده ، وممكن جدا لو النوع وحش يشحته للبواب علشان يذله) وبعدها هيزنقه في الكورنر ويطلب منه ويتأمر عليه. فا الطريق السهل الموجود قدامه انه يضرب ورقه عرفي ولما تقع الطوبه في المعطوبه اهل البنت همه الي هيجرو وراه ساعتها وياخدها بالسعر الي يعجبه ده اذا كان ليها سعر اصلا (ومش هيجيب شكولاته طبعا ، ساعتها كبيره كيس بن من الرخيص علشان يعملو القهوه الساده) ومش بعيد كمان يخلي اهل العروسه همه الي يصرفو عليه نظرا لأنه فشل في انه يلاقي شغل.
ثانيا : مقوله شهيره منتشره بين الشباب وهيه (انا متجوزش واحده مشيت معاها) طبعا المقصود بالكلمه دي هوه الجواز الشرعي الي كلنا عارفينه جواز وفرح وكوشه ومأذون وناس بترقص ، انما العرفي في الحاله دي بالنسبه للشاب مجرد وسيله علشان يوصل للي هوه عايزه من البنت وطبعا اول ما البنت هتفاتح الشاب في موضوع الجواز هيقولها بابتسامه خبيثه طيب ما احنا متجوزين وحلوين اهو عايزه ايه تاني ، وتاني يوم هتتصل بيه هتلاقيه مغير رقم الموبايل بتاعه ومعزل من الشقه الي كان مأجرها واتشطب اسمه من الوجود مع الورقه الي هيحتفظ بيها وقت ما اتكتبت وتبقى البنت في الحاله دي في نظر المجتمع ونظر اهلها مش متجوزه واخترعت الحكايه دي علشان محدش يقول عليها حاجه وطرقعت الفضيحه هتتسمع من حلوان للمهندسين .
ثالثا : البنات الي واخده على انها تعيش مع الشاب الفرفور علشان تعيش برشطه عليه ويصرف عليها اما موضوع الورقه العرفي ده مش هيفرق معاها في اي حاجه الا لسبب واحد بس وهوه البهدله لما بوليس الاداب يكبس عليهم مع بعض وكمان علشان ساعتها محدش يقول عليها انها مش كويسه (كل حاجه في النور ، حتى لو كن نور لمبه سهاري او شمعه) ، وطبعا ساعتها الشاب من دول بيكتشف انه متجوز واحده خبره اخر حاجه ولبس الطرطور والمفاجأه الاكبر الي ممكن تجيبله سكته انه هيكتشف انها معروفه جدا لبوليس الاداب واتجوزت قبله تلاته اربعه من غير شهور عده ولا نيله (زي ما حصل في فيلم جاي في السريع لما بوليس الاداب كبس عليهم فوق هضبة المقطم).
اتقاء شر الجواز العرفي
لازم يتحط قاعده جديده في المجتمع بين الشباب والبنات ، مش مطلوب ان القاعده دي تتحط في قانون او فرمان انما لازم كل شاب وكل بنت يحطوها لنفسهم. القاعده دي تنص على ان لازم يكون في مساحه محدده محدش يتعداها ومحدش يقدر يقرب لها .
طيب ايه وجه الاستفاده للبنت من القاعده دي؟
البنت هيه اكتر مستفيد من القاعده دي علشان هتحمي نفسها بيها ، وهتقدر لما يجيلها عريس ومش عاجبها تقول لأ بالفم المليان مش تقول ايوه علشان تلبس الزبون في نسب المولود ابن الـ7 شهور او اقل علشان تغطي عالفضيحه المدويه .
ايه وجه الاستفاده للولد من القاعده دي؟
الولد تقريبا ملوش استفاده من القاعده دي ، بس تخيل انك عملت المقلب ده في بنت ، وبعدها جيت تتجوز واحده بتحبها وبتموت فيها وساعت الدخله لقيتها خبره. ايه موقفك بقى؟ هتطلقها طيب ما انت قبل كده عملت نفس الحكايه. بلاش يا عم واحده بتحبها لو حصل الموقف ده مع اختك او اي حد بتغير عليه اكيد هيبقى نفسك تشرب من دم صاحبنا الي لط شرفك ومرمغه في الطين ، وتروح رافع البندجه (بضم الباء وشد النون). حط القاعده في دماغك ونفذها حفاظا على نفسك وعلى بنات الناس لأنك كما تدين تدان
.
الجواز العرفي بين الشباب والبنات بقى للأسف منتشر جدا هتلاقيه في الجامعه وللأسف بدأ يظهر في المدارس المشتركه وغالبا الثانوي وطبعا البنت ليها دور كبير جدا في الموضوع ده لأنها الطرف الي مش عايز او مش قادر يحمي نفسه وفي نفس الوقت الطرف الاكثر تضررا. وطبعا جزء كبير جدا من اللوم لازم يروح لللأهل لأن المفروض مادامو عايزين الحلال لازم يقفلو الشباك ويفتحو الباب على اخره انما الي حاصل دلوقتي للأسف ان الاهل بيقفلو الباب ويخلو الشباك موارب علشان الشباب يدخلو منه على الضحيه المسكينه .
نصائح للشباب الي بيفكرو في الجواز العرفي
- لو بتفكر تتجوز عرفي لازم تحط في الاعتبار قاعده مهمه جدا جدا وهيه ان الجواز ده اساسه انه بيتم في الخفاء ومش بيتم اعلانه وده اهم شرط من شروط الجواز الصحيح طبعا الكلام ده خطير جدا (لأن في الحاله دي بيبقى اسمه عط بشد الطاء) لأن لو بصينا للموضوع ده ابعد شويه هنلاقي انه حرام وميعتبرش جواز لأن الاشهار وهوه اهم ركن متمش من اصله اما لو تم اشهاره وكان في شهود (طبعا لازم يكونو مكتملي الاهليه) واخد الشكل الشرعي في الحاله دي الجواز ده بيكون صحيح وبرضه في الحاله دي الجواز الشرعي احسن وبلاها جواز عرفي.
- ساعات بيبقى الجواز العرفي جواز شفوي (من غير ورق) وبكده البنت ارخص من التراب (حاجه ببلاش كده) لأن الشاب الي طلعله قرنين زي بتوع الشيطان الي قال انتي مراتي من غير ورق ممكن زي ما قال كده ممكن ينكره وخصوصا لو الموضوع كبر وبقى في حمل ونونو صغير لقيط مستني يجي للدنيا علشان يروح الملجأ ويكبر ويبقى زي تيتو.
- قبل ما تفكر في انك تغرر ببنات الناس او تفكر انك تتجوز واحده بتحبها عرفي فكر في الي بعد كده ، الجواز مش مجرد حب وتسبيل وكلام حلو والي بالي بالك. الجواز مسؤوليه قبل كل حاجه ، لو مش قادر على المسؤوليه دي يبقى استنى لما تبقى قدها وبعدها فكر في الجواز (ثم انت مستعجل على ايه يا عم الدكر العزوبيه احلى واحلى)
- قبل ما تقرر انك تفاتح البت بتاعتك في الجواز العرفي (سواء كان بورقه او من غير) لازم تفكر كويس لو ده حصل لواحده عزيزه عليك انت ممكن تعمل ايه؟ طبعا ممكن تهد الدنيا فوق دماغ الاخ ده فا الطبيعي ان مادام ده حق انت شرعته لنفسك اكيد هيبقى شرعي لغيرك.
نصائح للبنات الي نفسها تتجوز حبيبها ولو بورقه عرفي
- اوعى تفتكري ان الجواز العرفي سهل وحلو وطريق مليان بالحاجات الحلوه ، بالعكس الجواز العرفي عامل زي البحر الشط بتاعه حلو والموج هادي انما جوه الدنيا غويطه وممكن يغرق فيها اي سباح محترف (وخصوصا انك مبتعرفيش تعومي) فا لو اتعرض عليكي الجواز من النوع ده ارفضي بكل الاشكال حفاظا على نفسك وعلى كرامتك الي هيتمسح بيها الارض بعد ما تقعي في الفخ وسيرتك واخلاقك الي هتبقى على كل لسان.
- اوعى تدي الثقه لحد عرض عليكي الجواز العرفي مهما كان ، لأن الشاب الي بيعرض عليكي الجواز من النوع ده عارف كل حاجه عنه ومش عبيط (متتخدعيش لما يقولك اصل الجواز العرفي سهل وحلو وهنعمل كل حاجه في النور) الصح ان لو اي حد عرض عليكي الجواز ده ترفضي بشكل قاطع وتقطعي علاقتك بالشاب ده لأنه مادام عرض عليكي العرض ده اكيد عرضه على غيرك قبل كده وهرب بعد ما عمل عملته السودا وجري.
- تبعيات الجواز العرفي دايما بتيجي فوق راس البنت من اول نظرة اهلها والمجتمع ليها لما يعرفو انها متجوزة عرفي ، وفي معظم الاحوال بيبقو شاكين اصلا انها متجوزه عرفي وطبعا الشك ده بيتحول ليقين لما الجواز ده بيبقى شفوي بس ناهيك عن كلام الناس ونظرتهم ليها والاسوأ من كده طريقه معاكسات الشباب ليها بعد ما يعرفو انها خبره اخر حاجه (او على الاقل هيعتقدو كده).
- الجواز العرفي الشرعي (زي ما بحب اقول عليه) الي هوه عباره عن ورقه واتنين شهود برضه مش هينفعك لأن بكل بساطه ممكن الاتنين الشهود ينفو الشهاده وتدخلو في محاكم واثبات نسب للمولود والمواويل الي كلنا عارفينها. طبعا لازم نقول انك ممكن تاخدي حقك مع الوقت بالقانون بس ده هيبقى بعد ما خربت مالطا والناس كلها بصتلك على انك بنت مش كويسه ، فا ليه وجع الدماغ والدوشه وكلام الناس الي ملوش اي لزمه خليكي في الجواز الشرعي احسن واضمن وعلى الاقل الناس هتفرحلك بدال ما هتتكلم عليكي.
نصيحه اخيره للشباب والبنات
لو انتو متجوزين عرفي يا بيه وعرفي يا شابه هتعملو اي لما يكبس عليكم بوليس الاداب وتنزلو انتو الاتنين ملفوفين في ملايه بيضا (زي ما بنشوف في الافلام) وتروحو القسم لحد ما يبان لكم صاحب. هل فكرتو في نظرة اهلكم ليكم لما ياخدوكو من القسم بالملايه؟؟ اكيد منظركم هيبقى زباله قوي وهيبقى نفسكم الارض تنشق وتبلعكم فا على ايه من الاول وليه المغامره؟؟ خليكم في الشرعي احسن واضمن وحلال يا معلمين.
وفي النهايه عايز احذر من الظاهره القديمه دي لأنها ظاهره فاسده وبدأت تظهر بشكل واسع جدا في مجتمعنا المصري وطبعا ده بسبب الفكر الغربي الي بيغزونا بداية من فكرة البوي فريند والجيرل فريند وتطبيقها حرفيا بس بشكل شبه شرعي او قانوني(من غير ما نبص للتبعيات بتاعتها) . وربنا يكفينا شر الجواز العرفي بكل اشكاله ويهدينا ويسهل لنا الطريق للجواز الشرعي الي كلنا نفسنا فيه.
|
كلامك حلو بس انا مختلف جدا معاك في نقطة اللي بتقول فيها الجواز العرفي الشرعي
الجواز عشان يكون شرعي لازم ولي امر البنت يكون موجود
جرت العادة على ان الزواج لازم يكون على يد ماذون والماذون ده وظيفته انه بيوثق العقد…يعني ايه بيوثقه؟؟يعني بيخللي الجكومة بذات نفسها شاهد على الزواج والماذون في الحالة دي بيكون ممثل للحكومة في عقد الزواج…وعشان كده في حال لا قدر الله ان حصل خلاف الزوج او الزوجة بيروحوا يشتكوا للحكومة وهي اللي بتخلص الليلة
بينما العرفي الصح..اي بالعرف..ان اهل الزوج والزوجه عارفين والموضوع واضح واستغنوا عن الماذون وعشان كده اما بيحصل خلاف الحكومة بترفض الاعتراف بالزواج العرفي عشان الناس مشهدتش الحكومة من الاول وكل واحد ذنبه على جنبه فيما عدا ان الاطفال بيتم نسبهم لأبوهم فقط
انما اللي بيتم من زواج حاليا متعارف عليه باسم الزواج العرفي بانهم يكتبوا ورقة من ورا ابو البنت او ولي امرها فده اسمه زنا بل انه زنا صريح
والناس اللي بيعملوها شفوي دول يتقال عليها ايه؟؟؟
اذا كان الديون لازم تتكتب وربنا بيقول “ولا تسأموا أن تكتبوه صغيرا كان أو كبيرا إلى أجله” وده في الفلوس فما بالنا بالزواج
والله صادقين اصلا كل واحد بيقول لبت انا بحبك بيكون حكا لمليون وحده قبلها ولو اتعرف على بت من الشات اكيد ما راح يتجوزها وهيروح يتجوز بت غيرها واللى هيجوزها هتكون عملت نفس العملة ودخلت الشات وحبت وكل ده
البنات غبيات بس انا بت طبعا مو غبية لانى ما بحب انا مستنية العريس يخبط البا ولما اتجوزو هحبه وبس مو متل هالبنات اى حدا يقئولها بحبك ئلبها بيطير لو البت بتفهم اى ولد هيئولها بحبك تتجاهله تعمل نفسها موش فاهمة حاجة تغير الموضوع بيصير يحبها اكتر وباى