قهوه جواهر – مدينة نصر – الحي السابع
خدمة كويسه ، اسعار كويسه ، هتقعد براحتك بس اوعى الحمام وبيببي العصافير
بيانات عامه عن جواهر
المكان : قهوة جواهر
الموقع الجغرافي: مدينة نصر – الحي السابع ، شارع المهدي بن بركة ، قريب من الشهر العقاري ومحكمة مدينة نصر
الاسعار : حلوه مش غاليه لو انت في اخر الشهر ممكن تروح هناك
طقم الخدمة : ناجي ، سيد ، مبروك ، حسام
ناجي ومبروك يعتبرو في مستوى الكابتن في القهوه ناجي مليان شويه وبيلعب جيم ومبروك متوسط الطول والعرض
سيد: بيعمل الشيشه ، ساعات بيستظرف وساعات تانيه بيبقى سئيل بس نفضله ومتحطش في دماغك
حسام: عادي بيتعامل مع الناس بطريقه عاديه بس خلي بالك لأنه ساعات بينفض للي بتطلبه منه وخصوصا الطاوله او الدومنا
المعامله والانتظار: عادة اول ما بتقعد فيها بيجيلك يا مبروك او ناجي على حسب الورديه اطلب الي انت عايزه بعدها بحوالي دقيقتين هتلاقي طلباتك على الترابيزة
نبذه عن الاسعار
الاسعار معقوله وفي متناول الشباب المصري الكحيان (الي انا منهم) ، ممكن تلاقي سواقين وميكروباظاتيه (صباحا) عادي مفيش قلق وساعات النهار بيروح هناك محامين يناقشو شغلهم هناك.
جواهر صباحا
الخدمة كويسه وخصوصا الشيشه هتلاقيها سالكه والمشاريب بتطلع مظبوطه (نظرا للعدد القليل الموجود هناك) ومعظم الناس الي هتلاقيها هناك في الوقت ده يا اما محاميين بيستريحو (نظرا لقربها من المحكمة) يا اما ناس بتروح تشد حجرين قبل ما تروح شغلها. والوقت بين الساعه 11 صباحا والساعه 1 ظهرا ممكن تلاقي عيال مزوغين ورايحين يلعبو كوتشينه.
جواهر عصرا
من احسن الاوقات الي ممكن تروح فيها جواهر هتستمتع باللون الاخضر تحت شعاع الشمس. غير كده الدنيا مش زحمة هتعرف تاخد نصيبك من الخدمة. في الوقت ده زباين القهوه المستديمين بيبدءو في الظهور بس الدنيا مش بتبقى زحمة
جواهر المغرب وحتى منتصف الليل
اكثر الاوقات ازدحاما ، الزباين والناس كلها هناك ، في الوقت ده انت ممكن تلاقي كراسي عادي مفيش مشكله بس المشكله الحقيقيه انك مش هتلاقي مكان تقعد فيه غير قريب من الكنيف (الحمام) الي هنتكلم عنه باستفاضه كمان شويه. طبعا المكان ده من اسوأ الاماكن في القهوه نظرا للريحة النفاذه. عموما لو رحت باليل انت وحظك في الاماكن
جواهر في اوقات ماتشات الكوره
ساعة ماتشات الكوره القهوه بتتقلب لستاد صغير. الكراسي مصفوفه كأنك في استاد ، في الاوقات دي بيحصل عكس الي بيحصل في جواهر باليل عادة ، هتلاقي اماكن كتير بس في الغالب مش هتلاقي كراسي ودي مشكله تانيه. متقلقش هتستنى شويه هيدبرولك كرسي او اتنين وتستمتع بالماتش او لو رايح القهوه عادي برضه هتستمتع.
نصائح علشان تقعد في جواهر – اسرار القهوه
أولا : الي بيعمل المشاريب واحد اسمه سيد (غير سيد بتاع الشيشه) لو طلبت قهوه مظبوط بتطلع جامده جدا ، ولو طلبت زبادي بالعسل بيطلع كويس برضه من الاخر معظم مشاريبه كويسه
ثانيا : متهرجش مع سيد بتاع الشيشه لأنه ساعات بيبقى سئيل ورخم وبيستظرف ، لو هوه مش واخد عليك متأخدوش عليك.
ثالثا: لو عايز انترنت حاول تقعد تحت التانده قريب من الطريق علشان فيه في السبوت دي wifi تقدر تدخل على الانترنت وتعيش حياتك
رابعا: لو ركنت عمودي على الرصيف خلي عربيتك طالعه لبره شويه علشان محدش يقفل عليك وفي الحاله دي هتحتاج تخلي مبروك او ناجي يندهولك على صاحبها وطبعا هتتعطل شويه عقبال ما يظهر للعربيه صاحب
خامسا: في واحد بتاع اكل هناك اسمه احمد بيعمل سندوتشات حلوه ممكن تاكل من عنده لو جعان (بس سمي الاول)
سادسا: في ريحة سيئة للغايه في الجانب الشمال من القهوه ، الريحة دي صادره من حمام القهوه وطبعا بما اني قلت ريحة وبعدها قلت حمام تقدر دلوقتي تتخيل الموضوع. ساعات الريحة دي بتبقى نفاذه جدا (مره وصلت لموقف الاتوبيسات الي يبعد عن القهوه مسافة 500 متر تقريبا) وبتدخل في النخاشيش في الحاله دي يا اما هتعمل دماغ يا اما هتجيب الي في بطنك. نصيحة هامه جدا اوعى تقعد بالقرب من الحمام (او بمعنى اخر الكنيف)
سابعا: متقعدش تحت اي شجره علشان الشجر هناك مليان نمل ابيض واسود وحشرات اخرى غريبه.هوه صراحةً مش هوه ده السبب الرئيسي الي علشانه متقعدش تحت الشجر السبب الاهم انك متقعدش تحت الشجر هوه انك لو قعدك تحت شجره ممكن تلاقي عصفوره غلسه تيجي تعمل بيببي في المشروب بتاعك من فوق الشجرة وممكن تبقى عصفوره اغلس وتعمل البيببي عليك انت شخصيا. طبعا محدش فينا بيحب البركه الي من النوع ده (متقعدش تحت اي شجره في جواهر) او في اي قهوه تانيه
دي النصائح الي اعتقد انها قد تكون هامه بالنسبة لأي واحد عايز يعمل مغامره لقهوة جواهر
|
مش ممكن يا محمد , انت تفوقت علي نفسك والله يا شيخ … برافو برافو
والله عندك حق يا يمنى
[...] واقف عايز يركن قدام القهوه الي احنا كنا قاعدين عليها (قهوتي المفضله جواهر) ومستني يعدي الناس علشان يعرف يركن براحته وبعدها يقعد [...]