سمر نايت

قهوه سمر نايت – مدينة نصر – قرب مدرسة المنهل

خدمة كويسه جدا، اسعار مرتفعه بعض الشيئ ، ولو معاك لاب توب عيش WIFI

بيانات عامه عن سمر نايت

المكان : كوفي شوب سمر نايت

الموقع الجغرافي: مدينة نصر – اول يمين من مصطفى النحاس بعد اولاد رجب قبل ما تحصل مدرسة المنهل ، هتلاقيها على اليمين اركن وادخل.

الاسعار : غاليه بعض الشيئ بس هتستمتع بكل قرش هتدفعه (لو معاك لاب توب)

طقم الخدمة : مش معروفين ليا بس طقم الخدمة كويس بكل الاحوال

المعامله والانتظار: عادة اول ما بتروح بيجيلك واحد يحطلك قزازة الميه المعدنيه ويمشي علشان يسيبك تفكر انت عايز تطلب ايه. وبعد ما بتطلب بتلاقي طقم المكسرات نزل علشان لو عايز تقزقز وانت قاعد.

نبذه عن الاسعار

الاسعار غاليه بعض الشيئ بس مش هتحس انك اتنصب عليك او بمعنى اصح انت فعلا متنصبش عليك لأنك هتاخد خدمة كويسه في المقابل الي انت دفعته ، ولو معاك لاب توب اساسي تروح بيه علشان عندهم هناك انترنت لاسلكي هتستمتع بيه وانت قاعد.

سمر نايت صباحا

الخدمة صباحا زيها زي الخدمة مساءً ، الفرق هوه ان الجو الصبح بيبقى هادئ نوعا ما ، يعني لو عايز تروح تشتغل او تخلص شويه حاجات على الكمبيوتر هتستمتع بالجو الهادي الي بيشجع على الشغل ، ده بالاضافة الي انك هتستمتع بالاتصال السريع للانترنت.

سمر نايت عصرا

الجو برضه هادئ نوعا ما ، هتلاقي الناس الي بتستعمل الكمبيوتر بدأت تظهر يا اما هتلاقي شوية شباب بيلعبو كوتشينه وعايشين حياتهم ، بس برضه الجو مشجع على الشغل لو ليك مزاج انك تشتغل هناك.

سمر نايت المغرب وحتى منتصف الليل

اكثر الاوقات ازدحاما ، الزباين والناس كلها هناك ، وتقريبا كل الناس رايحه بأجهزة الكمبيوتر بتاعتها هناك ، النت نوعا ما هتبقى بطيئة بس مش مشكله اهي شغاله والسلام. ولو انت حابب تشتغل على الكمبيوتر مظنش انك هتعرف نظرا للازدحام الي موجود هناك والدوشه الي هتبقى حواليك. بس المهم هوه انك هتستمتع بالمشروبات والطلبات.

نصائح علشان تقعد في سمر نايت - اسرار القهوه

أولا الشيشه: عندهم جميع انواع الشيشه ، يعني لو انت غاوي شيشه كريز او نوع شيشه نادر اكيد هتلاقيه هناك.

ثانيا قزازة الميه والمكسرات: لما الميه تجيلك متعملش فيها مستغني وتقوله لأ شكرا ، خليه يحطها ومتشربش منها وهوه هيلاحظ انها متفتحتش ومش هيحسبها ، اما بالنسبة للب والسوداني فا ده اساس المتعه وانت قاعد فا متضيعوش على نفسك بأنك ترفضه.

ثالثا الانترنت: المكان كله متغطي بشبكة انترنت هوائي كل الي عليك انك تسألهم عن كلمة السر علشان تدخل وهمه هيدوهالك ، وببلاش من غير اي تكاليف اضافيه. وسرعته كويسه جدا. بس خليك شاب ذوق ومتعملش تحميل او دونلوود لحاجه علشان غيرك يستفيد من الانترنت زيك (متبقاش طفس يعني وتاخدها لوحدك)

رابعا: متركنش صف تاني قدام القهوه بحجة ان مفيش مكان ، امشي شويه قدام وبعد جردل الزباله (اعزكم الله) هتلاقي اماكن كتير تقدر تركن فيها ولو ملقتش اركن في الشارع الي ورا القهوه واتمشى ، نظرا لأن القهوه في شارع رئيسي ممكن يجي الونش ويسحب عربيتك او يكلبشها خلال متعتك.

خامسا: الاماكن هناك متقسمه تبعا لأنواع الكراسي ، لو عايز قعده مريحه في عندهم كراسي مريحه جدا ودي في الجانب القريب من الباب ، انما لو عايز الخصوصيه اكتر من الراحه يبقى خش جوه هتلاقي كراسي بامبو برضه مريحه بس مش زي الصالون الي بره.

سادسا: لو اتزنقت وعايز تروح الحمام تعمل زي الناس ادخل جوه خالص وهتلاقي الحمامات قدام البوفيه ، حمام الرجال على اليمين وحمام السيدات على الشمال ، خليك متحضر وادخل اليمين.

سابعا: لو الوقت اخدك وجهاز اللاب توب بتاعك البطاريه بتاعته شحرت انقل جنب اي حيطه وحط الشاحن ، وقضيها محدش هيقولك حاجه برضه.

في النهايه احب اقول ان كوفي شوب سمر نايت ممتعه (بغض النظر عن الاسعار الغاليه شويه) وفي نفس الوقت ادمان وخصوصا لو بتحب تشتغل على الانترنت وانت قاعد على القهوه. يعني لو رحت مره اضمنلك انك هتروح تاني وتالت.

3 تعليقات