شبكة واحده بتقربنا كلنا
المصريه للأتصالات شبكة عريقه من قبل ما انا اتولد وهيه موجوده وبتقدم خدمات لنسبة لاتقل عن 90% من سكان مصر. زمان كنت علشان تشترك وتركب خد تليفون ارضي في بيتك الموضوع بياخد شهور ده ان مكنش سنين وكنت بتدفع دم قلبك علشان تركب تليفون ، وفي الارياف والمناطق النائيه كان ممكن تلاقي التليفون موجود عن علية الشعب زي العمده وزي البيه الي ساكن في السرايا البحريه وكان علشان اي حد يتكلم في التليفون يروح هناك علشان يستعمل الاختراع الي بيخلي الناس تسمع بعضها ، وكانت البت الحبيبه علشان تكلم حبيبها كانت لازم تنزل للبقال الي تحت علشان مفيش تليفون في البيت.
دلوقتي الحال اتغير وبقت التليفونات موجوده في معظم ان مكنش كل البيوت المصريه والسنترالات كترت وبقت بتغطي كل اماكن مصر سواء شبكه سلكيه او لا سلكيه ، بس على الرغم من كل ده برضه الخدمة زي ما هيه مفيش تطوير ولا تحديث. ومشاكل الناس مع المصريه للأتصالات لا حصر لها وخصوصا مع تطور الحياه ووجود الانترنت الي بقى ضروره لكا واحد في البيت.
في السطور التاليه شوية مشاكل سببها الاساسي المصريه للأتصالات وممكن تكون بتعاني منها او ممكن تكون سمعت عن ناس بتعاني منها ، انما لو لا سمعت عنها ولا بتعاني منها احمد ربنا انك مش فيها لأنها عامله زي الدوامه الي بيخدلها ميعرفش يطلع منها.
المشكله الاولى: نقل خطوط التليفون
ممكن تلاقي واحد ظريف دمه خفيف يتصل بيك في التليفون يقولك “ان شاء الله احنا هنغير نمرة تليفونك يا شقيق” وانت تقوله يا عم انا مش عايز اغيرها ولا حتى طلبت منكم اني اغيرها يقوم قايلك “لأ هيه هتتغير علشان انت هتتنقل سنترال تاني يا اسطى” تقوم رادد طيب وتغيرو السنترال ليه يقوم قايل “هيه كده غتاته ، تباته السنترال الي انت فيه مش عاجبنا شكل الخط بتاعك فا هننقله علشان انت هفأ” طبعا انت مش متمالك اعصابك ونفسك تقتل الي بيكلمك وتقول قايله طيب السنترال الي انتو هتنقلوني عليه مفهوش انترنت يقوم صاحبنا يرد عليك “ملناش فيه ، ثم انت هتعمل ايه بالانترنت ولو مزنوق فيه قوي اشتغل بخط التليفون ده اخر حلاوه “.
السيناريو ده حصل معايا ، مش بنفس الالفاظ طبعا بس مجمل الحوار كان كده خط التليفون بتاعي اتنقل من سنترال مدينة نصر 1 لسنترال مدينة نصر 2 من غير ما اطلب ومن غير ما حتى يجو على نفسهم شويه ويسألوني لو عندي مانع او لو في مشكله ممكن تحصل لأنهم هيغيرو رقم التليفون او هيقطعوني عن الانترنت.
المشكله التانيه : الانترنت الهوائي
في واحد اعرفه بيعاني من المشكله دي ، خط التليفون بتاعه هوائي (لا سلكي يعني) وطبعا مش عايز اقول عن جودة المكالمات العظيمة الي بيتكلم بيها ، ممكن في نص المكالمة تلاقي الخط وقع والمكالمة اتقطعت. بس مش هيه دي المشكله الحقيقية ، المشكله انه في حالة خط التليفون الهوائي استحاله انك تدخل على الانترنت او تعتب حتى بابها لأن الخط مش هيقبل الـDSL ولو عقلك جابك وفكرت تدخل DialUp هتحزن اكتر على حالك لأن النت اذا حالفك الحظ ودخلت مش هتكمل دقيقتين وتلاقيها قطعت. واعمل شكاوي واعمل قرد ملهاش حل ، مش هتعرف تعمل اي حاجه لو الخط هوائي هيفضل هوائي طول العمر.
السيناريو ده موجود فعلا ، بس بصراحة في النقطة دي الشبكة كتر الف خيرها انها وفرت تليفونات في مناطق ممكن ميعرفوش يمدو فيها اسلاك فا مدو فيها العميل على رجله ووفروله تليفون جودته نص النصين على حساب الخدمات التانيه.
المشكله التالته: عدم توافر اماكن لكروت الـ DSL
المشكله دي بقى حدث ولا حرج ، لو عايز تقدم على الـDSL على تليفون البيت بتاعك طبيعي جدا انك تكون فرحان (هدخل الانترنت البيت يا رجاله) بس قبل ما تفرح لازم تكون متأكد من شوية حاجات (يعني اجل الفرحة لما الانترنت يدخل الاول)
1- قابلية دخول الانترنت على الخط بتاعك: ممكن يكون الخط مفهوش DSL من اصله
2- لو في قابليه للدخول على الانترنت: لازم تتأكد ان السنترال مش زحمة لأن كتير جدا بيبقى الخط فيه قابليه انه يركب عليه DSL بس مفيش مكان في السنترال انهم يركبو خطوط جديده
المشكله الاولانيه عاديه السنترال ملوش دخل فيها ، العيب على شركات الانترنت الي لسه ما اكتشفتش ان في منطقة لسه مش متغطيه بالشبكات بتاعت الـDSL ، انما المشكله التانيه هيه المشكله الحقيقيه لأنها بتسبب اكتئاب للي بيقدم على الخط ، لأن شركة هتحصل منه الاشتراك عادي جدا وبعد مجموعة مكالمات لشركة الانترنت هيقولوله الخطوط كلها مشغوله ولازم تستنى لما واحد يقرر انه يلغي خط الـDSL بتاعه وطبعا ده مستحيل ان واحد يبقى ربنا انعم عليه بالانترنت ويرفس النعمه ويلغيه.
مشاكل متنوعه سببها المصريه للأتصالات:
- قطع الحراره عن التليفون: ممكن جدا تصحى الصبح تلاقي الحراره مقطوعه لأي سبب غامض متعرفوش وتعمل شكاوي ان الحراره مقطوعه ومحدش يعمل حاجه ، الي هيرد عليك هيقولك اصل في اصلاحات في البوكس الي على اول الشارع بتاعكم (متحاولش تكتشف بنفسك لأنك هتلاقي اثار العنكبوت الي تدل ان محدش لمس البوكس ده من سنين) كل الي مطلوب منك الصبر على الحراره زي ما راحت لوحدها زي ما هتيجي لوحدها.
- اسلاك التليفون الي تحت الارض: الكبلات النحاسيه الي بتوصلك بالسنترال جودتها مش هتسبب مشكله للأشخاص الي بيتكلمو في التيلفون لأن الصوت مش محتاج جوده معينه في الاسلاك (كله يمشي الحال) انما لو انت عايز تقدم على خدمة تانيه اساسية (زي الـDSL) او لو انت مفتري وعايز تقدم على خدمة الانترنت السريع DSL2 من ابو 24 ميجا ، غالبا ما هيقولولك الاسلاك مش هتستحمل السرعه دي. طبعا المشكله دي سببها ان الاسلاك الي تحت الارض غالبا ما بتبقى متباليه وهالكه ومش مستحمله حتى نقل الصوت ازاي بقى هتستحمل السرعه العاليه الي محتاجها الـDSL
- التليفون التجاري وتليفون البيت: لو انت كنت مأجر شقتك بالتليفون ولسوء حظك التليفون ده اتحول بقدرة قادر من تليفون منزلي لتليفون تجاري انسي يا وحش انك تقلبه منزلي تاني. هتقولي طيب وايه مشكلة التليفون التجاري ماهو حلو برضه. بس المشكله هنا هيه طريقة المحاسبة والدقايق المجانيه اقل والاشتراك اغلى (الضعف تقريبا). لو اتصلت بيهم علشان تقلبه منزلي تاني هيحلقولك موس ومحدش هيقلب التليفون بتاعك زي ما احول تجاري هيفضل تجاري زي ما هوه. الافضل في الحاله دي متستعملش التليفون.
- الخدمات الصوتيه (خراب البيوت المستعجل): مشكله كبيره موجوده في معظم البيوت المصريه والمقصود بيها خطوط 0900. الخطوط دي المفروض استخدامها يكون لحاجه مفيده زي الخدمات الطبيه وخدمات الكول سنتر مثلا انما عندنا في مصر اتحولت لخطوط مسابقات وضحك على الدقون وتيجي تدفع الفاتوره تلاقي الفاتوره 100 جنيه مكالمات زياده و500 او 600 جنيه خدمات صوتيه. طبعا ساعتها هتدور على الشخص الي هرى التليفون مسابقات في البيت ويا اما تلاقيه يا اما متلاقيهوش (غالبا بتيجي الخدمات الصوتيه مرتفعه لما الشقة بتكون مقفوله).
دي شوية مشاكل سببها الاساسي المصريه للأتصالات بس علشان نكون موضوعيين على الرغم من المشاكل دي كلها لازم نرفع القبعه شكرا للمصريه للأتصالات على مجهودها الي بتعمله في خدمة العميل وفي خدمة تطوير الاتصالات الارضيه في مصر.
|
كلام صح وانا معاك فى الكلام ده بس بعد مالشركه اتخصخصت بقى فيه كلام تانى وبيحاولوا يصلحوا من نفسهم دلوقتى
لسه بفكر ابعث الشكوى لاقيتها موجوده كما اريد .
لكن مفيش فيده
وحسبى الله ونعم الوكيل
شكراً لكم
واسف على الازعاج
انا حصلتلى حاجة عجيبة انا تليفونى هوائى تمام عادى الحراة تقطع اسبوع اواتنين دا الطبيعى المكالمة تقطع فى نصها دا الطبيعى بس اللى مش طبيعى تصحى الصبح ترفع سماعة التليفون ولا تلاقى حرارة ولا حاجة والعجيب ان اللى يتصل بيك يلاقى رسالة صوتية تفيد بانه تم تغيير الرقم والواحد ولا اكن التليفون دا بتاعه من غير تبليغ مسبق ولا حاجة ولافى احترام للعميل اللى بيقولو نعمل على توفير كل شىء ليه بجد مش لاقيه تعليق غير الدعاء حسبنا الله ونعم الوكيل
انا مشكلتى ابعد من كل ده انا تلفونى ارضى ولاكن لا يدعم خدمه الدى اس ال لان كابلاته ليست نحاس ولاكن فايبر وطبعا لا يوجد تقنيه حديثه لتوصيل النت للفايبر مع العلم ان تفلونى قديم من قدم الازل ولاكن بعد تحويل السنترال اصبح فايبر
حسبى الله ونعم الوكيل فى كل ظالم
ملحوظه رحت السنترال قلت عايز احوله نحاس واتحمل التكاليف قالى مستحيل لايوجد خط نحاس فى المنطقه واذا كنت ترغب فى خدمه النت السريع بامكانك انك تعزل وتسيب البيت
وقعد يضحك وسابنى ومشى
ربنا يجازى السبب
والله برافو عليك انا من القاهره من حدائق القبه وللاسف تليفوني هوائي ولا كان عندي فكره عن هوائي او نحاسي او ارضي كان اهم حاجه اتكلم (اذا كان فيه حراره اصلا في التليفون) المهم رضيت وقلت مش مشكله … قلت اتحضر شويه دخلت كاشف الرقم جاني بعدها باسبوع قلت مش مشكله الشوارع زحمه … قلت اعمل حاجه كبيره واكون رجل اعمل قررت ادخل الانترنت يا رجاله (الكلام ده من حوالي خمس سنوات) بس طلع خطي هوائي ومينفعش تدخل خدمة الانترنت .. وفي السنترال موظف جميل عليه ابتسامه (بلهاء) اعمل طلب وعلى طول بنحل المشكله فرحت ولحد الان لم تتم الفرحه … وداخل على السنه السادسه ومش عرف اركب نت …. دية المصريه للاتصالت شبكه واحده تجمعنا …. تقريبا الشبكه مقطوعه اذا كان فيه شبكه اصلا …. سلام