الغناء في الحمام والمواهب الدفينه
يا خارجه من باب الحمام وكل خد عليه عليه خوخه ، خوخه خوخه خوخا خوخااااااااااااااا. ناس كتير جدا يمكن معظم المصريين ان مكنش كلهم ظهرت عندهم عاده غريبه جدا في الحمامات وخصوصا وقت الدش الا وهي الغنا والدندنه في الحمام ويا سلام بقى لو سخن في الغنا وعلى صوته وحد من العيله عايز يدخل الحمام وقتي هيقوله اخلص يا عم العندليب عايزين ندخل الحمام ، اتأخرنا على اشغالنا.
بداية الظاهره:
الظاهره دي اول ما بدأت في الظهور كان في الستينات في الافلام السنيمائيه تلاقي البطل من دول (غالبا ابن اباظه) بياخد دش وعمال يغني وصوته وحش اخر حاجه ومقضيها غنا ومراته (غالبا شاديه) عايزه تدخل الحمام علشان تاخد دش الصباح علشان هيه كمان تروح شغلها وتقوله يا عمي ميردش تقوله يا سيدي ميردش وميطلعش الا لما يخلص الاغنيه الي كان بيغنيها.
الظاهره دلوقتي :
الظاهره دلوقتي اختلفت شويه ، على الرغم من ثبات المبدأ بس اختلفت شويه بأن الواحد بيدخل الحمام ويقفل الباب عليه (علشان محدش يقتحم الحمام عليه وهوه مندمج في الغنا) ويديها غنا ودندنه. ولما حد يخبط عليه يقوم معلي صوته بالغنا وكل ما الصوت بره علي اكتر كل ما على صوته بالغنا علشان يحرق دم الي بيخبط لحد ما حاجه من الاتنين تحصل يا اما يخلص الدش الطويل المكون من 3 او اربع اغاني (ولازم يكون في واحده منهم كلمة يا ليل على اقل تقدير) يا اما التاني يكون قضي حاجته على باب الحمام من طول الانتظار.
ايه سبب انتشار اغاني الحمامات
سبب انتشار الظاهره دي دلوقتي في نظري هوه واحد من الاسباب دي
اولا: القنوات الفضائيه الي رسخت مبدأ ان اي حد ممكن يبقى مطرب ويغني وطبعا علشان تطلع تغني لازم يكون في Practice جامد جدا والحمام هوه المكان الوحيد الي محدش هيقدر يقولك بم فيه (على اعتبار ان محدش ليه انه يقتحم خصوصيتك وانت في الحمام او لأن الحمام هوه المكان الوحيد الي محدش يقدر يشوفك فيه)
ثانيا: الشقق الي بتبقى متأجره بين الشباب شرك او اتنين عايشين في الشقه مع بعض ومش طايقين بعض ، ممكن بكل بساطه يكونو اتنين صحاب او واحد عايش في بيت اهل مراته. قبلها بيوم تلاقيهم متخانقين وواحد منهم يرقد للتاني علشان يذله فا يقوم تاني يوم الصبح بدري يحجز الحمام ويعيش حياته فيه يضرب فنجان القهوه ويقرى الجرنال وبعدها تبدأ وصلة الغناء المتواصل ، وطبعا التاني هيتذل اخر حاجه ويقف قدام باب الحمام (وممكن جدا يكون بعيد عن خطوه واحده عن الدش) بس الفاصل المقفول الي اسمه الباب حائل بينه وبين غرضه.
ثالثا: في ناس كتير جدا بتحب تشرب سجارة الصبح في الحمام (غالبا اهلهم ميعرفوش انهم مدخنين) وطبعا علشان يغطو على طول وقتهم في الحمام لازم ياخدو دش سريع كده على انغم الالحان فا تلاقيهم بياخدو النفس مع مقطع من الاغنيه وطبعا مفيش مانع الي بره يتفلق او يعملها على روحه لحد ما حاجه من الاتنين تخلص يا السجاره يا الاغنيه.
طبعا في اسباب تانيه للغناء في الحمامات بس طبعا علشان مش عايز اطول عليكم وكمان علشان عيب شويه مينفعش اني اكتبها هنا.
ايه انواع اغاني الحمامات
امزجة الناس للغناء في الحمامات مختلفه طبقا للمنطقه الي الواحد عايش فيها وطبعا بيحكمها حاجات كتير جدا
النوع الاول الاغاني العاطفيه القديمه: معظم ان مكنش اكتر مطربي الحمامات بيغنو الاغاني القديمه (وخصوصا اغنية توبه بتاعت عبدالحليم حافظ) تلاقيه قبل ما يفتح الدش يبدأ يتوب ويديها توبه تن تن توبه تن تن ويديها وطبعا مع سخونيه الميه هتلاقيه هوه كمان سخن وصوته علي وطبعا انت واقف بره تقوله اخرس يا عم العندليب صدعتنا يقوم هوه كمان معلي صوته كمان وكمان.
النوع التاني الاغاني الكيديه او الي مقصود بيها نرفزة الاخرين: غالبا النوع ده من الاغاني بيطلع وقت ما الشخص الي جوه بيبقى عايز ينرفز الي قاعدين على الجانب الاخر من باب الحمام زي اغنية منير بتاعت على صوتك بالغني ، طبعا كل ما انت خبطت اكتر كل ما هيعلي صوته بالغني اكتر وممكن مع كل خبطه تلاقيه بيكرر المقطع بتاع علي صوتك (طاب على صوتك على صوتك) وطبعا لو قلتله خلصنا يا عم هيقوم ياخد فاصل اعلاني ويقولك عايز ايه انت مش شايفني بستحمى (ممكن تخنقه ساعتها وتقوله هوه انا شايفك اصلا انا سامع حمار بينعر).
النوع التالت الاغاني الاجنبيه: غالبا النوع ده من المغنيين منتشر في المناطق الراقيه (ماهو كل منطقه وليها الاغاني بتاعتها) غالبا هتلاقي النوع ده بيغني الاغاني الاجنبيه الهاديه الي تساعد على الاسترخاء مع الميه السخنه وممكن جدا تلاقيهم بيغنو اغنية سيناترا بتاعت I am Dancing in the rain على اعتبار ان مية الدش دي هيه المطره الي كانت في الاغنيه وناقص ياخدله شمسيه كمان وهوه داخل الحمام علشان تكمل.
النوع الرابع والاخير الاغاني الخاصه بالبنات: كل الانواع الي فاتت كوم والبنات كوم تاني خالص بس طبعا بالنسبه للبنات الموضوع اهون شوييتين لأن اغاني البنات محصوره شويه في الاغاني العاطفيه العربيه الهاديه وطبعا الغير مزعجة نظرا لطبيعة البنت الهاديه.
شوية اجراءات ممكن تستعملها لو في حد حاسس انه عندليب ومقضيها غنا في الحمام
اولا: اهم حاجه لازم تاخد بمبدأ العين بالعين والسن بالسن والبادي اظلم ، يعني لازم تعمل فيه زي ما عمل فيك لما يطول في الحمام الصبح مثلا عادي جدا خد الامور ببساطه وكبر دماغك انما لازم ترقدله وتاني يوم تحاول على قد ما تقدر تصحى من النوم قبليه وتدخل الحمام تحجزه (مفيش مانع انك تدخل الحمام تكمل نومك في البانيو ، اي نعم مش هيبقى اريح من السرير بس علشان تكيده) ولما بسلامته يصحى ويبدأ يخبط على الباب ابدأ الوصله الغنائيه واديها وياريت كمان تغني الاغاني الي من النوع الكيدي ، زي اغنية ايوه وعملوها الرجاله ورفعو راس مصر بلدنا (بتاعت حماده هلال) وطبعا احلى حاجه علشان تغيظه اكتر واكتر انك تطبل على اي حاجه موجوده (طبق غسيل موجود في الحمام اكيد هيفي بالغرض) علشان يحس انك جوه الحمام بترقص ومقضيها مزاجنجي اخر حاجه اهم حاجه لازم تديه الايحاء انك قاعد تترقص تحت الدش.
ثانيا: لو انتو مجموعة صحاب وعايشين مع بعض وواحد منكم فيه العاده دي ممكن تخلوه يبطلها بطريقه سهله جدا وهيه انكم تتفقو مع بعض انكم تعملو مقلب فيه. لما تحسو انه هيدخل الحمام واحد يلحق يروح بسرعه ويدخل (اهم حاجه ياخد الموبايل معاه) ويطول ولما يزهق يرن لحد تاني يقف على الباب اول ما يطلع التاني يدخل لحد ما صاحبنا يزهق من الحمام او ينزل يروح حمام الجامع الي تحت البيت.
ثالثا: برضه لو انتو مجموعه مع بعض او لو بيت عيله سهل جدا انك تقطع العاده دي بحل بسيط جدا وغايه في السهوله وهوه انك تبوظ مفتاح باب الحمام او لو في ترباس في الحمام من جوه شيله (طبعا هتقول وهيه تفرق في ايه) انما فرقها كبير جدا وهوه انك لو قاعد في حمام مش مقفول مش هتحس بالامان ان اي حد ممكن يفتح عليك من غير ما ياخد باله وطبعا لما هيطول في الحمام هيبقى عارف انك يا اما مش هتاخد بالك يا اما هتعمل نفسك مش واخد بالك فا هيبقى مش حاسس بالامان وفترة قعاده في الحمام هتبقى قصيره جدا.
واخيرا في حل ممكن يكون قاطع للمشكله دي بس الصعوبه الوحيده فيه انه صعب يتعمل في اي حته وهوه انك تخلي محبس الميه العمومي في اي حته غير الحمام (المطبخ مثلا) بكده لما اي حد يطول في الحمام بسهوله تروح قافل المحبس وخليه يغني من غير ميه.
|
