بتركب مواصلات؟ او بتركب ميكروباصات؟
اكيد حصل المقلب ده معاك؟
الموقف باختصار: انت راكب ميكروباص او اوتوبيس وتلاقي الشاب من دول طالع الميكروباص ومشغل اغاني شعبيه عباره عن ازعاج متحرك على الموبايل بتاعه ساعتها كل الي هيجي في بالك انك تقول (الله يلعن ابو دي تكنولوجيا خلت الواد الممل ده يمسك التليفون ده)
الموقف بالتفصيل: انت راكب جوه ميكروباص وطلعلك واحد شكل امه معفن ومشغل الموبايل بتاعه على اغاني مزعجه ملهاش لزمه وعملالك انت والي حواليك ازعاج
سؤال: تقدر تكلمه ؟ تقدر تقوله حاجه؟ كل الي هتقدر تعمله انك هتحط جزمه في بق سعادتك (مع كامل الاحترام ليك) وتسكت…..
ياترى ليـــــــه؟
جواب: علشان انت لو اتجرأت واتكلمت هينوبك من ذوقه ولسانه الي بينقط عسل سيل من الشتايم المتنوعه بين الشتيمه في شخصك والشتيمه في ابوك وامك وعيلتك كلها وممكن توصل لدينك والعياذ بالله.
عاده غريبه ظهرت تقريبا مع بداية سنة 2007 وهيه ان كل واحد حاسس ان الموبايل بتاعه اخر حاجه وبيشغل اغاني (زمان كانو بيمسكو الكاسيت ابو بطاريه ويشغلوه برضه بصوت عالي) المهم دلوقتي الاخ ده حاسس انه ماسك في ايده قمه التكنولوجيا وبيشغل اغاني ويقدر يسمعها وعلشان سيادته محدث نعمه عايز الناس تسمع معاه بالاجبار.
علشان نعرف المشكله ده بالتفصيل لازم ندور حواليها ونشوف مين بيعملها وبيعملها ليه وازاي نعالجها.
مين بيعمل الحركه دي؟ وبيعملها ليه؟
اولا صبيان الميكانيكيه وصبيان النقاشين والفواعليه: والفئه دي بتشمل صبيان الميكانيكيه وصبيان السباكين وصبيان اصحاب المهن الحره الي غالبا بيطلق عليهم بليه او مفك وحديثا بيطلق عليهم نمله. ودول تلاقيهم بيركبو مواصلات النقل زي الميكروباص علشان يروحو ويجو من شغلهم وطبعا علشان الطريق يبقى اقصر والترفيه عن نفسهم والتسليه في الطريق لازم يقرف الناس التانيه ودول انت متتجارأش تكلمهم او تقولهم بم علشان الموضوع هيقلب بخناقه وطبعا لازم تحط في الحسبان ان دول مينفعش تتكلم معاهم ولو بالحسنى او بهدوء.
نوع الاغاني الي بيسمعوها: اغاني شعبيه من النوع الي ممكن يجيبلك روماتيزم او ورم وانت بتسمعها ، تقريبا النوع ده من الاغاني هوه نفس النوع المستخدم في جوانتنامو علشان يعذبو المعتقلين هناك.
ثانيا بنات المدارس (ثانويه عامه غالبا): يعني البنات الوراور ودول برضه بيشغلو الاغاني على الموبايل وتلاقيهم قاعدين يضحكو بصوت عالي علشان يلفتو انتباه الناس الي راكبه في الميكروباص لعل وعسى شاب فانكي يلقطهم ويجر معاهم كلام (باعتبار المبدأ الي بيقول نظره في كلمه في موعد فلقاء). النوع ده سهل جدا انك تحرجهم وتخليهم يقفلو الموبايل علشان الازعاج.
نوع الاغاني الي بيسمعوها: اغاني الحب والغرام (بعيده كل البعد عن الشعبي) ، علشان الزبون يعرف انها رومانسيه وتعشق الحب والحنان ، وكمان علشان الشباب يعرفو انهم وراور اخر حاجه.
ثالثا مجموعة شباب مع بعض: ودول بتلاقيهم بيشغلو الاغاني دي كنوع من الزهق او الملل ، ممكن جدا يكونو زهقو من طول الطريق فا تلاقيهم شغلو اغاني علشان يسلو نفسهم ، في الغالب هتلاقي النوع ده من الشباب بيستعمل سماعات الودان علشان يسمع وميضايقش حد معاه بس الامر ميسلمش انه ينسى السماعه في البيت فا يبقى مضطر انه يشغل الصوت العالي علشان يسمع وسط الزحمه. النوع ده برضه سهل جدا انك تخليه يقفل الصوت بأنك تقوله ممكن توطي الصوت شويه فا هتلاقيه قفل الصوت خالص احتراما ليك.
نوع الاغاني الي بيسمعهوها: اغاني عاديه متنوعه بين الاغاني الهاديه والاغاني العاديه زي بتاعت عمرو دياب وكده. لأنه بيشغل الاغاني علشان يستمتع بيها واكيد هيتعذب لو سمع العينه بتاعت الاغاني الشعبيه الي تم ذكرها سابقا.
ازاي نعالج الظاهره الغريبه دي:
الظاهره دي موجوده بالفعل من زمان لو كنت بتروح الحديقه الدوليه كتير وتحديدا في المواسم والاعياد اكيد كنت هتشوف واد حالق كابوريا وراسه شبه الجمبريايه او الاستاكوزا ورافع الكاسيت الكبير وحاطه على ودنه ، انما مع التقدم التكنولوجي واتاحه الموبايل ابو صوت للناس كلها ، الموضوع ده كمان تقدم والناس بقت بتشغل الموبايل علشان تستمع بالمغنى المقرف وفي نفس الوقت تبقى مصدر اساسي لعذاب الاخرين.
نصائح للتعامل مع الناس الي بتعمل كده:
1- لو صادف لحظك الاسود انك ركبت مواصله وركب معاك واحد من الناس دي لازم تدرسه كويس جدا لأنك لو خبط في صنايعي اقل واجب هيقولك انا حر مش عاجبك انزل (لو كان مؤدب) انما لو بنت او شاب شكله كويس مفيش مشكله انك تنبهه ان الصوت عالي وساعتها يا هيقفله يا هيرد عليك بأدب اهم حاجه حاول التون بتاعت صوتك ميبقاش باين فيها انك مخنوق منه او عايز تضربه.
2- ساعات سواق الميكروباص هوه نفسه الي بيشغل الاغاني دي في الحاله دي امرك لله اسمع وانت ساكت وحاول تعيش اللحظه وتهز في راسك ومع الوقت ودنك هتاخد على الوضع وتلاقي نفسك مستمتع ، بس حاول انك متتعودش على كده علشان ذوقك في الاغاني هيختلف جدا بعد كده وتبقى زيهم
3- قطن الودان: دايما اعمل حسابك في كيس قطن للودان لأنه بينفع جامد في المواقف دي ، وغير كده وكده ممكن توزعه للركاب المخنوقين من صاحبنا. ساعتها بس هتبقى عملت معروف في الناس دي بالاضافه لأنك احرجت الاخ اياه وخليت شكله وحش ، وحتى لو صنايعي هيحس انه نكره ملوش لزمة.
4- لو واحد جاله الجرأه واتكلم مع صاحب الصوت العالي وانت شفتهم وهمه بيتخانقو: بلاش تسيب الراجل لوحده وكأنك مش متضرر لازم تقول رأيك انت كمان ساعتها ، بما ان واحد اتجرأ لازم تدخل معاه بما انك انت كمان متضرر (عملا بمبدأ الكتره تغلب الشجاعه).
|
فعلاً لازم يكون عنوان الـموقع >> إسألوني
بصراحة فكرته عبقرية >> و اللي مخليها عبقرية أكتر و أكتر >> هيه الناس اللي إنت بتقولنا عنهم و عن مواقفك معاهم >> إسألوني <> في منتهى خفة الدم و الجدعنة و الصبر و ….. إلخ إلخ
و لو فضلت من هنا ليوم القيامة تتكلم عنهم >> مش هتخلص أبداااااااااااا >> و حتى لو حصل >> هتلاقي نفسك لسه مش فاهمهم و لا عمرك هترسالهم على بر ..
^
^
^
مين فينا مش بيركب مواصلات و خاصة الميكروباصات و الذي منه >> و طبعاً طبقة الكادحين و اللي تقريباً الشعب المصري كله منها مش سالمة من اللي بيحصلها في المواصلات من بهدلة و قلة قيمة >> ده حتى الناس الهاي اللي عدت و بقا عندها ملاكي .. مش سالمين من الميكروباصات و سواقينها و اللي بيركبوها .. لأ و الأدهى >> انه جالهم اللي ما بيرحمش .. ” التوك توك ” .. طب و الله العظيم حاجة تهلك من الضحك ..
يللا علشان يبقوا يتبطروا على النعمة تاني و يقولوا ان الميكروباصات ديه اعظم مشكلة مكرهاهم في حياتهم ..
نيجي بقا للمقلب اللي انت بتتكلم عنه >>
فعلا حصلت معايا و كتير كمان
و كان عندي نفس الشعور اللي قولته >> وهوه انك تبقى نفسك تقوم تضبق في زمارة رقبة الشخصية السخيفة اللي ماسكة موبايل مش لايق عليها تماما لدرجة انك تحس العدة مش مستنضفا صاحبها و قربت تنطق و تقول ” عجبي ” .. و فوق كل ده عاملك فيها الواد ابن بارم ديله و يا سلام بقا لو ونونت معاه و أعد يدندن و يردد مع الأغنية المنيلة اللي بيسمعها و بيسمعهالنا غصب و اقتدار .. يبقا يوم ….. على دماغ كل اللي ركبوا الميكروباص ده .. و تلاقيهم كلهم اللي بيقولك انا اصطبحت بوش مين انهارده و اللي يقول ده انا لو ركبت ميكروباص مفخخ كان يبقا ارحم و اللي هينادي للسواق و يقوله القسم معاك يااسطى >> طبعا رايح يبلغ عن اخينا العندليب >> احسن ما يروح و يركب ميكروباص تاني و يضر ضحايا آخرين ..
اللي قولته عن انواع الناس اللي ممكن يعملوا المقلب ده فيك أنا موفقاك عليهم >> لكن معترضة على الكلام اللي قولته عن كل مجموعة فيهم >>
لأنك اولا تحيزت للشباب .. و طلعتهم و كأنهم ملايكة >> في حين اني اكتر اللي شوفتهم بيعملوا الحركة ديه و بطريقة مستفزة همه الشباب
و بالنسبة للبنات اللي في ثانوي >> انت صح في اللي قولته لكن عن نفسي إكتشفت إن الجيل طالع بايظ من أول العنقود لآخره
يعني مش بتوع الثانوية العامة بس همه المتهمين >>
و الكلمتين دول قولتهم طبعاً تحيزاً لطالبات الثانوية العامة المجتهدات و المتبهدلات و اللي أخيراً و ليس آخراً >> أنا منهم و أفتخر ..
نيجي بقا للنصايح الأخيرة >>
مع إنها عجبتني كلها >> لكن أكترهم و اللي مليش غيره اعمله >> هوه القطن
*
*
*
في كلمتين >>
السايت مضمونة يشد و إسلوبك بيقول انه ليه مستقبل إن شاء الله ..
و خاصة الطابع البسيط اللي فيه >> اللي بيخلي اي حد اياً كانت شخصية و تعليمة و الذي منه >> يستمتع و هوه بيقرأ و يوصله قصدك على طول من غير تعقيد ..
Go Ahead
And Keep Moving forward
سلام ^_^
محدثى النعمة دول كتروا اوى ، أو مش عارف جايز تكون نقص
بس عموما اعتقد ان الشعب المصرى الحالى طبعا ، من أكثر شعوب العالم بجاحة وجليطة واحساس بالنقص
للأسف طبعا
السلام عليكم
أنا الحمد لله أختبرت الموقف ده أكثر من مرة
قررت أني أحاول أكلم صاحب الأزعاج والحمد لله الناس بتستجيب مفيش غير واحد وسواق واحد بس اللي كان ردهم بايخ
بأختصار أنا في الأول كنت أقترب من صاحب الأصوات المزعجة وأعطه بهدوء مطبوعة بأحكام وحرمانية الأغاني والموسيقى فيحرج ويغلقة
وبعد أنتهاء ما لدي من مطبوعات أصبحت أتخذ أسلوب آخر، الأول أنظر للشخص المزعج لفترة وأحسسه أنه بيعمل حاجة غلط، إذا محسسش على دمه بأقترب من الشخص بأسلوب مهذب وهادئ وأطلب منه خفض الصوت على قده أو أغلاقه وأظل أنظر إليه فيحرج مني ونت الركاب اللي مراقبين الموقف ويغلقه ثم أشكره بصوت هادئ وأنصرف
والله المواصلات عموما فى بلدنا مش الميكروباص بس اللى بقى يجيب للانسان الضغط والسكر والاستبحس كمان اما تركب الميكروباص وتلاقى بنى ادم تقريبا قاعد على حجرك لا ولا الاتوبيس وما ادراك اللى بيحصل فى الاتوبيس من التلزيق والتفعيص والذى منه
وبكده مشكله الاغانى دى رفاهيه امتالى من راكبى الحلزونه ياما الحلزونه لا يجوز ان يخوضو فيها
على العموم السايت يجنن وفكرته تحفه فعلا
ربنا يوفقك وتتحفنا بافكار جديده
السلام عليكم
من فضلك أنا سوف آخذ رابط موضوعك لأني أنشأت جروب على الفيس بوك من أجل موضوع رفع الصوت في المواصلات العامة ووجدت أن مساهمتك لطيفة وخفيفة الظل وأردت أن أسجلها على الجروب
رابط الجروب
http://www.facebook.com/group.php?gid=156000832858
موضع عشره على مليون واللهي انت جامد طحن بس انا بحب الشعبي نعمل ايه الدنيا خربانه هههههههههههههه الاسم محمد وليد يا باشا وانت راجل عسل واللهي احيك على الموضوع رائع هههههههههههه ميكروباص
بجد موقع اكثر من رائع
بصراحه عندك حق بس مش الناس الى راكبين بس هم الى بيعملو كده لا سواء المكروباس كمان بيعمل اكتر من كده بيتف سرى وبيشتم وبيشغل اكتر اغنيه شعبيه وكلمها بزيق جداااااااااا وانا بكره الاسلوب ده سواء من السواء او من اى حد غيره
[...] علشان تعرف تاريخ الشاب ده او البنت دي ارجع لموضوع اغنيه في ميكروباص. تنويه صغير: غالبا العربيه او الغواصه دي الي بيصرف [...]