كاشير السوبر ماركت

ساعات وانت واقف وعايز تحاسب في السوبر ماركت او حتى البقال وتبص تلاقي واحد طلعلك من تحت الارض زي الخازوق ووقف قدامك في الطابور ، يابني يهديك يرضيك انا واقف الاول يقوم يقولك انا ممعيش حاجات كتير وساعتها لازم تحترم نفسك وتحط لسانك (او اي حاجه تانيه بس مشيها لسانك) في بقك وتسكت ، وساعات تانيه بتقوله ده طابور وانا واقف الاول يقوم يقولك خلاص انا خلصت اهو. طيب ليه الناس دي بتعمل كده ، وليه احنا بنسيبهم يعملو كده ونكبر دماغنا. بس موضوع الطابور ده مش ده موضوعنا دلوقتي موضوعنا عن الناس الي عندها حتة البجاحه اكتر من كده بكتير.

فرن العيش

من كام يوم كنت بشتري عيش من فرن بلدي (حتى الافران وصلولها) وقلت للراجل عايز بكذا عيش وهوه رايح يحطلي العيش في كيس لقيت واحده ست كبره طلعت زي الخازوق وقالتله هاتلي بـ2 جنيه عيش الراجل وهوه بيحط العيش قالتله ايوه هات الرغفين دول كمان ، انا محطتش في دماغي او بمعنى اصح مكنتش مركز في الموضوع لقيت الراجل ناولني انا العيش وهيه راحت قايله "هي هيء على فكره انا كنت واقفه هنا من قبله". ازاي وامتى معرفش عالم بجحه ، المهم انا اديتها الزغره التمام وابتسمت ابتسامه بلهاء من بتوعي وقلتلها علفكره انا واقف من امبارح ومشيت وقلت للراجل شكرا يا باشا وهيه مكبوسه. طيب ليه هيه عملت كده معرفش والي يغيظ اكتر ان الفرن ده اصلا انا دايما بشتري منه علشان دايما فاضي يعني مش زحمه وانا واصل الاول وطلبت الاول وهوه بدأ يحط العيش بتاعي الاول ازاي حصل انها جت ووقفت قدامي وطلبت وانا مخدتش بالي انها فعلا كانت واقفه قدامي تكونش خيال او مختفيه وانا مشفتهاش او اكونش اعمى؟.

سوبر ماركت المحمل

ناس كتير عندهم حالة من الجهل او حاله من البلاهه بحيث انهم بيتعاملو مع السوبر ماركت زي المحمل كأنه بقال يروح يجيب العربيه وعلشان يتحايل على الزحمه يروح جايب عربيته قدام الكاشير ويجيب حاجه يحطها في العربيه ويمشي يجيب حاجه تانيه علشان اول ما يخلص يقوم يقول انا واقف هنا من بدري بس كنت نسيت اجيب حاجه من جوا ، طبعا النوع ده من الناس المستنصحه لازم يكون في وقفه معاهم لأن لو تلاته اربعه في الصف عملو كده يبقى الطابور عمره ما هيمشي نظرا لأن كل ما الدور يجي عليك هتلاقي واحد طلعلك من تحت الارض زي الخازوق ويقولك ده دوري ياصطى.

مره كنت واقف في طابور المحمل (وما ادراك بطابور المحمل وزحمته) ومستني دوري لقيت عربيه فيها شويه حاجات محطوطه على جنب (محطتش في بالي ، اهي عربيه ومحطوطه ومش بتاعتي) ولقيتلك واحده كبره راحت جايبه علبة جبنه لافاش كيري وحطاها في العربيه ومشيت وبعدها باقل من دقيقه راحت جايبه زجاجة شامبو وحاطاها ومشيت وبعدها تاني راحت جايبه كيس ايريال وسحبت العربيه ووقفت قدامي زي الخازوق الي طلع من الارض شيطاني بالظبط ، ساعتها انا حسيت ان انا نجفه وحسيت ان وداني طولت ودلدلت على طريقة توم وجيري وبكل هدوء وحزم قلتلها هوه ايه الي انتي بتعمليه ده ، فا قالتلي ده دوري بس كنت بجيب حاجات من جوه قلتلها انا شايفك عماله تحولي من جوه على العربيه ده مش بقال يا مدام هتحطي الحاجات على البنك وفي الاخر تحاسبي قالتلي معلش اصلها مش حاجات كتير ، ساعتها انا كنت لسه خارج من الشغل وحالتي النفسيه طبعا مش طايق حد يهرشلي على مناخيري فا قلتلها كون اني اسيبك تدخلي مكاني او لأ دي حاجه ذوقيه ترجعلي وانا دلوقتي معدوم الذوق لقيتها هطول في الكلام رحت مبرقلها تبريقه من اياهم وبرقت للراجل بتاع الكاشير فا راح قايلها الطابور يا مدام طبعا ساعتها المدام دي حست ان شكلها بقى عامل زي البرص على الحيطه وحست اني فعلا عايز اتخانق فا راحت واخده بعضها ووقفت ورايا او بمعنى اصح قدام الشخص الهفأ الي ورايا الي طبعا ميقدرش هوه كمان يتخانق معاها. ساعتها انا كنت متنرفز جدا انها كانت عايزه تاخد مكاني بس من جوايا كنت سعيد جدا جدا لأني اخدت حقي بدراعي الي في معظم الاوقات بيهدر بسبب طيبت قلبي وحسن ظني بالناس.

التعليم برضه ليه تمنه

طبعا محدش بيتعلم ببلاش انا من كتر ما اتحطيت في المواقف دي بقيت اعرف امتى اكبر دماغي بالفعل وامتى ابقى عامل زي اللقمه الناشفه في الزور ، لو واحد معاه حاجات كتير بس قالي بعد اذنك ممكن ادخل الاول علشان مستعجل اعديه قبلي كده كده مادمت دخلت سوبر ماركت يبقى انا مش مستعجل ، ولو واحد عمل عبيط ودخل قدامي او اخدها دراع مدخلوش حتى لو كان معاه علبة بيبسي ، وبرضه لو واحد عمل نفسه عبيط ممكن احرجه جامد قدام الناس وميفكرش يعمل كده تاني زي اني اقوله حضرتك مش واقف عند بقال او اني اسقم عليه بصوت عالي واقول اصل البيه فاكرها اشارة مرور وياخدها بدراعه او اي كلام تاني.

الخلاصه او الدروس المتعلمه من المواقف الي زي دي:

لو انت واقف في كاشير او واقف مستني تحاسب وانت الي جيت الاول الامر يرجعلك تدخل حد قبليك او لأ براحتك بس في رأيي متدخلش حد في الدور بتاعك لأن لو انت مكانه مش هيرضى يدخلك (اصلا انت متعرفش تعمل زيه بأماره انك واقف في الطابور) انما لو قالك بأدب ممكن ادخل مكانك او انت حسيت ان دخوله مش هيعطلك كتير يبقى خليه يدخل وبرضه كله في الاخر يرجعلك.

تعليق واحد بس