البخيل او الجلده زي ما بيتقال عليه في مواقف تانيه او المعفن بالنسبة للغة الشباب ناس حريصه زياده عن اللزوم ، دايما بيدعو الفقر والحاجه. على الرغم من ان حالهم عكس كده تماما والدليل نظرات عينيهم.
صفات البخيل العامة
كتمان زياده جدا عن اللازم
الناس دي مبتحبش تعرف حد اي حاجه عنها ، على سبيل المثال لو زنقت معاه يعد فلوس ممكن تلاقيه سحب نفسه بشويش وراح مكان غريب جدا (الحمام) علشان يعد الفلوس هناك ، يعني لو هوه في الشارع ممكن يستحمل الالم الناتج عن وجوده في حمام في الشارع ويروح يعد الفلوس (وطبعا كلنا عارفين حمامات الشوارع دي فيها ايه وريحتها ايه) كل ده في سبيل انه مش عايز حد يخمن هوه معاه كام او هيفضل معاه كام.
الاستخسار
لازم هتلاقي الشخص البخيل بيستخسر اي حاجه في اي حد ، يعني لو هوه بياكل قدامك استحاله يعزم عليك ولو بحتة مخلل ويا سواد ليلك لو حاولت تخطف منه مخللايه علشان تغيظة، هيقولك انا جعان (علشان متقولش عليه بخيل) وهيفضل ياكل لحد ما بطنه توجعه . كل ده علشان انت متستفيدش من وراه بحتة مخلل.
البرشطه
البخيل بطبعه بيحب يبرشط (من براشوت) على الناس يعني ممكن لو رحت تاكل تلاقيه نزل عليك بالمظلة (لبراشوت) وطلب معاك اكل ويسيبك تحاسب ويعمل نفسه ناسي. ولو حاولت تخليه يدفع ممكن يقولك ممعيش فكة او يقولكادفع انت وهبقى احاسبك بعدين.
استحاله ينازل عن قرش ليه (منوفي بمعنى اصح)
الشخص البخيل عمره ميتنازل عن مليم من حقه حتى لو كان حاجه لا تذكر بمعنى لو هوه في سوبر ماركت كبير زي كارفور او سبينيس وليه بريزه او شلن ممكن يقول للكاشير هات ربع جنيه وخد عشرين قرش. ولو في بنزينه ممكن يسيب الربع جنيه المتين بقشيش بأعجوبه بعد ما يكون مون بنزين ومسح القزاز ومسح العربيه ومش بعيد يكون غير زيت كمان.
التعامل مع الشخص البخيل
اولا: متقولوش يا بخيل لأنه هيدافع عن نفسه بضراوة وممكن يحاول يثبتلك انه مش بخيل بأنه يعزمك على قزازة حاجه ساقعه (هيشتري قزازة واحده بس ليك). هتلاحظ ساعتها ان الراجل ده متضايق ، هوه في الواقع بيتقطع من جوه كل ده بسبب انه دخل في مغامره مش محسوبه علشان يثبتلك العكس وهيبدأ يفكر ازاي يردلك الصاع صاعين.
ثانيا: متحاولش تاكل قدامه او تطلب حاجه هوه ممكن يكون عايز يجيبها ، لأنك ببساطه لو طلبت قدامه اكل لازم هياكل معاك حتى لو مش جعان (على اساس انك كده كده هتاكل فا مش هتفرق الكام سنتوتش بتوعه) وممكن لو انت جبت اكلك من وراه ممكن يطفَحهولك ويبصلك فيه لحد ما تشرق.
ثالثا: متحاولش تتطفل على نظامه وخصوصا فيما يتعلق بالفلوس على سبيل المثال متسألوش انت معاك كام ولو على سبيل التهريج. لأنه يا اما هيقولك وانت مالك ويحرجك ، يا اما مش هيرد عليك ويحاول يفكر انه يقطع علاقته بيك (على اساس انك حشري)
رابعا: اوعى ثم اوعى تستلف منه مليم لأنه هيرفض يسلفك بكل الحجج والاسباب ولو حصلت المعجزة وسلفك هيعتبرالسلف ده جميل في رقبتك تردهوله طول العمر وهيذلك بيه حتى لو رديت المبلغ في نفس اليوم.
خامسا: تجنب بكل الوسائل انك تسلف واحد بخيل ، لسبب بسيط جدا ان الي استلفه منك بقى بتاعه خلاص وفي نظره ملكش الحق انك تطالب بيه بعد كده.
اشخاص البخيل مبيطقهاش
الفضولي (الحشري) : علشان بيحاول يتطفل على اموره الشخصيه
االقيادي (حبظلم) : علشان بيحاول يفرض سيطرته علشان يتطلع على اموره الشخصيه
الظريف (حزمبل) : علشان بيتريق عليه ويقوله يا قيحه يا بخيل (الكلمة دي بتضايق البخيل جدا)
البخيل ممكن تلاقيه متواجد في مجالات العمل التاليه
الحسابات : الشركات عادة بتعين في الحسابات شخص بخيل علشان ايديه تبقى فرطه في الخصومات ومتبقاش فرطه في المرتبات ابدا
|
