الفضولي – الحشري

لو ماشي في الشارع ولقيت واحد ماشي من غير ودان اعرف ان ده شخص حشري ، ولو بصيت في عين واحد ولقيتها شغاله دواير يمين وشمال اعرف برضه ان الشخص ده حشري وبيحاول يتلصص على اي حد ويعرف اي حاجه

صفات  الفضولي (الحشري) العامة

التدخل فيما لا يعنيه (رمي الودان)

دي اهم صفة مميزة للشخص الفضولي (الحشري) ، بمعنى لو انت قاعد على قهوه مثلا ممكن تلاقي ودن مرميه على الارض جنبك او ممكن تلاقي الشخص ده قرب منك علشان يسمع انت بتقول ايه. ولو سكت هتلاقيه بيعمل حركات تدل على عدم الاهتمام (بيعملك فخ علشان تكمل كلامك). ولو انت في محل هدوم مثلا وبتشتري حاجه ممكن تلاقيه حاول يدخل معاك في اي حوار علشان يكسب ودًك ومن الطريق ده هيبقاله الحق انه يشوفك هتشتري ايه وهتشتريه ليه. ولو حظك وحش وطلع من النوع الفضولي (الحشري) و القيادي (حبظلم) ممكن يشكرلك في سلعه او حاجه معينه لغاية ما تشتريها حتى لو كنت مش مقتنع بيها من الاساس

حب الاطلاع على امور الغير

الشخص الفضولي (الحشري) دايما بيحب يكون عارف كل حاجه عن محيط المكان الموجود فيه ، بمعنى انه لو في الشغل مثلا لازم هتلاقي عنده السي في بتاعت كل شخص في المكان ، بيشتغل ايه وكان شغال فين قبل كده وناوي يشتغل فين بعد كده وبيته فين وعنده كام عيل.
بمعنى اصح هتلاقيه عارف كل حاجه عن الموظفين الي حواليه

حب كبير للرغي والـ لوك لوك لوك

دايما هتلاقي الفضولي (الحشري) شخص اجتماعي بشكل كبير وده علشان يعرف يشبع كمية الفضول الي عنده يعني ممكن تلاقيه مصاحب كل الافراد الي حواليه علشان كل شويه يتسلي على واحد فيهم بس المشكله الاكبر في الحكاية دي لو كان من النوع الفضولي (الحشري) و الظريف (حزمبل) لأنه في الحاله دي هياخد منك الكلام وينقله لواحد تاني بتريقه علشان يفتح معاه كلام هوه كمان وينقله لشخص تاني بنفس الشكل وبالمنظر ده هيكسب ود الناس كلها.

حب الالمام بكل حاجه

الشخص الفضولي (الحشري) دايما محب لأنه يكون على اطلاع بأي حاجه جديده تدخل المحيط بتاعه فا على سبيل المثال لو اشتريت تليفون جديد (موبايل) ومعاك شخص فضولي استحاله يسيبه في حاله الا اذا عرف ازاي بيشتغل وايه مميزاته وعيوبه ، مش علشان عايز يشتري واحد زيه  انما علشان يشبع كمية الفضول الي عنده.
نصيحة: متحاولش تشتري تليفون زي الي معاه لأن ده مش هيفرق خالص برضه مش هيعتقه هيلعب فيه علشان يشوف انت نزلت عليه ايه هوه مش منزله (او ممكن يشوف همه نزلو حاجه جديده مش موجوده عنده ولا لأ).

التعامل مع الشخص الفضولي (الحشري)

التعامل مع الشخص الحشري سهل جدا همه تلات مبادئ.

أولا: تسيبه وتتجنبه لما تيجي تتكلم في حاجه مش عايزه يعرفها .

ثانيا: تكبسه كل ما يتدخل في حاجه ملوش فيها. ممكن تقوله علفكره الكلام ده ميهمكش في حاجه.

ثالثا: لو بتتكلم مع حد ولقيت واحد بيتلصص عليكم ورامي ودانه معاكم احسن الحلول انكو تسكتو انتو الاتنين وتغيرو الموضوع علشان تشتتو انتباه الاخ الي رامي ودنه معاكم ، ولو عايزين تتكلمو في حاجه سر خدو بعضكم واتكلمو في مكان مفيش حد فيه  هيه حبكت يعني تتكلمو علنا في الاسرار معروف ان الاسرار مش بتتقال في اماكن فيها ناس كتير ، لازم على جنب.

رابعا: لو اشتريت اي حاجه جديده وتعرف واحد فضولي ممكن يلعبلك فيه احسن الحلول انك تحطها في مكان ميلفتش انتباهه ده لو مش عايز تزعله منك يا اما لو العمليه مش فرقه معاك ممكن تكبسه وتقوله ملكش دعوه ولو انت اغلس وعايز تكبسه اكتر ممكن تقوله انت مش عندك زيها لو الحاجه دي هوه عنده زيها اصلا ولو الحاجه دي مش عنده ممكن تقوله بس يا بابا لما تكبر هبقى اديهولك تلعب بيه.

اشخاص الفضولي (الحشري) مبيطقهاش

البخيل: علشان بيحاول يخبي عليه وممكن يكبسه كتير

الظريف (حزمبل): علشان دايما مبيسكتلوش اول ما الودن تترمي تلاقي الظريف بيصطادها وقتي وهاتك يا تريقه.

الحشري ممكن تلاقيه في مجالات العمل التاليه

شؤون الافراد: علشان بيبقى ليهم الحق انهم يتدخلو في حاجات كتير جدا وهمه بيعملو الانترفيوهات فا هيشبعو رغبتهم في التطفل.
الموظفين: لازم يكونو من النوع الفضولي (الحشري) علشان الوك لوك لوك هيقعدو يرغو طول النهار ويسيبو الشغل يولع.

تعليق واحد بس