السئيل

السئيل (الغتيت ، التلم)

طبعا دي شخصيه غنيه عن التعريف ولو اتكلمنا عنها مش هنخلص.دي بقى شخصيه غتيته ودمها تقيل ولو صادفك واحد منهم (والعياذ بالله) وأتت وغتت عليك ممكن يجيبلك جلطه (ربنا يكفينا ويكفيك الشر). واوعى تخليه يحكيلك موقف المفروض انه يضحك لأن الموقف ده بكل بساطه ممكن يجيبلك استبحس وتلاقي نفسك رجليك مش شايلاك.

صفات السئيل العامة

التباته والتلامة وبرود الاعصاب

السئيل بطبعه بارد…. لأ ساقع ومتلج ميحوقش فيه لا تهزيق ولا تريقه ولا بأنك تقوله يا غتيت ويا سئيل ممكن يجيلك انهيار عصبي وتلاقيه بيقولك بكب برود انت ايه الي مضايقك قولي بس. على سبيل المثال لو انت واقف في سوبر ماركت والناس مزحومه على الكاشير ممكن تلاقي صاحبنا ده دخل بالعربيه بتاعته قدامك ولا كأنك بطيخه واقفه او صباع موز ، طبعا مش عايزه كلام انت هتتنرفز من الحركة دي وهتقوله سيادتك ده دوري (على حسب شخصيتك يا اما بزعيق يا اما بهدوء) فا هتلاقيه بيحرق دمك اكتر ويتحرك بهدوء وياخد المكان الي وراك بالظبط (مكان الشخص الي واقف وراك) ومش مشكله البطيخة او صباع الموز الي وراك وطبعا ساعتها الي وراك مش هيتمالك نفسه وممكن يعمله فتحه صغيره في دماغه او يهزقه وهكذا لحد ما يلاقي واحد هفأ يستنطع عليه.  وممكن لو انت واقف مستني تاكسي تركبه تلاقي واحد سئيل واقف قبليك بخطوتين علشان يشاور للتاكس قبليك ، وفي ناس تحرقلك دمك اكتر بأنهم يقفو وراك واول ما تشاور للتاكس والسواق الطيب يركبك تلاقيه راح مشاور هوه كمان علشان لما يركب معاك اجرته هتبقى مخفضه (على اساس ان التاكس وصلك انت الاول وخدكو انتو الاتنين شروة واحده)

حب بالغ للروتين

السئيل شخص عاشق للروتين بدرجة كبيره لأن الحكايه دي هيه الوسيله المثلى الي بيعرف يغتت على الناس بيها ، وطبعا بيتشبث بالقوانين والقواعد مش حبا فيها ، انما علشان يأتت على خلق الله. يعني لو انت في سوبر ماركت ممكن تلاقيه ركن حاجات كتير انت عايز تشتريها بحجة ان البار كود بتاعها مش باين على الرغم من وضوح الرقم المسلسل لو قلتله طيب ما تاخد الرقم المسلسل هيقولك اصلي مكسل اكتبه او ممكن يقولك اصل الرقم ممكن يبقى غلط هوه كمان وحجج فارغه من هذا القبيل.

السئيل بيحب يشوفك وانت متنرفز

الشخص السئيل في مجتمعنا يعتبر من احد اهم الاسباب في ارتفاع ضغط الدم والسكر والسكتات بكل انواعها.

لو ماشي في الشارع بعربيتك اكيد شفت ناس سئيله ماشيه في النص بين حارتين لاهي محصله اليمين ولا الشمال وممشيه الشارع على السرعه البطيئه غصب واقتدار. الطبيعي انك هتزمر وتنور وتعمل اراجوز وراها (ساعات ممكن يجيلك هستيريا وتحط ايدك على الكلاكس متشيلهاش) وهمه ولا همه هنا. ولما ياخدو بالهم تلاقيهم متنرفزين قوي ويقولولك ايه عايز ايه طبعا ساعتها مش هتتمالك نفسك وهتقوله يله ياحمار يابن الـ….. ساعتها كده انت وصلتهم لمرادهم ، حرقولك دمك وعملو منك اراجوز وجابولك هيستيريا (احمد ربنا يا عم ان مجالكش تخلف عقلي)

حب بالغ للنكت الرخمة

اوعى تسمع نكته من واحد سئيل لأن كل نكته هيقولهالك هتلاقي السيناريو ده بيحصل
اول حاجه هتلاقي النكته طويله جدا (ممكن تاخد 3 دقايق سرد للنكته)

تاني حاجه يا اما مش هتفهمها (احمد ربنا) وساعتها هتحس ان ودانك طولت شويه وفي ديل بدأ يطلعلك جه منين ده ياخواتي متعرفش ، في الحاله دي هيضطر انه يفهمك ايه قصت النكته (الي المفروض انها نكته) وهتحمد ربنا انك مفهمتهاش.

تالت حاجه للأسف هتفهمها وساعتها ممكن يجيلك التهاب في المفاصل وتلاقي نفسك بتعرج وماشي زي ام سحلول او زي ابو رجل مسلوخه (متقلقش الاعراض غالبا ما بتروح بعدها بفتره)

 التعامل مع الشخص السئيل:

اولا: اوعى تسيب السئيل يغتت عليك اكبسه بكل هدوء ، ادلق عليه ميه ساقعه (مع انها مش بتأثر في معظم الاحوال) اعمل اي حاجه بس متخليهوش يحرقلك دمك. وخليك حريص كل الحرص على اعصابك علشان ميطقلكش عرق.

ثانيا: لو صادفك سئيل غتيت وعايز يحرقلك دمك حاول انك تتمالك اعصابك يعني متقطعش في هدومك ولا تشتمه ولا تضربه لأن في الحاله دي هتحسسه انه انتصر عليك وهيبقى سعيد جدا بالنصر ده.

ثالثا: اوعى من نكت السئيل كلها سئيله زيه ولو لقيته هيبدأ في نكته حاول تغير الموضوع لو منفعش شيب المكان كله بحجة ان حاجبك اتجزع ولازم تمشي. المهم متسمعش منه اي نكته (حرصا على الصحة العامه)

رابعا: الناس السئيله غالبا ما بتحب البعتات (يعني تلاقيه بيبص وراك ويقولك اوعى الكلب ولما تبص يقولك بكل اتاته أبعت) فا خلي بالك من الحكايه دي ولو حد عملها معاك ممكن تاكله على قفاه يستاهل.

اشخاص السئيل مبيطقهاش

مفيش لأن السئيل ليه القدره على انه يخنق ويغتت على اي واحد قدامه ياسلام على واحد بخيل ولا واحد حشري السئيل هيظبطهم احلى تظبيط

السئيل ممكن تلاقيه متواجد في مجالات العمل التاليه

المصالح الحكوميه: علشان يقضوها غتاته على خلق الله وفوت علينا بكره والورق لسه مخلصش

السباكين: اسئل خلق الله بكلمتهم المشهوره (كباية شاي علشان نعرف نشتغل)

مفيش تعليقات - اضف اول تعليق على الموضوع