اولا تعريف الشخص الحزمبل بعيد كل البعد عن الظرف او انه شخص ظريف بمعنى اصح هوه سئيل بيستظرف نفسه لدرجة ان كل الي حواليه بيتخنقو منه ونفسهم يسكت شويه. علشان يستمتعو بجو من الهدوء والاسترخاء من خفة الدم الي ممكن توصل لفقع المرارة. وممكن يتفاعلو معاه علشان يمكن يقول حاجه تضحك وتغطي كميه الاتاته الي قاعد بيقول فيها (على اساس انه اراجوز وليه الي بيضحك وليه الي يفقع المرارة). وسبب تسمية الشخص المستظرف ده بأسم حزمبل طبقا للتشابه بينه وبين شخصية الاراجوز والتشابه بين الاراجوز وحزمبل بتاع فيلم سعاد حسني .
صفات الظريف (حزمبل) العامة
اطلاق الافيهات
الظريف (الحزمبل) عاشق لأطلاق الافيهات والكلمات الي ملهاش معنى ، يعني ممكن يخترع كلمة ويفضل يستعملها في قاموس حياته اليوميه ويطلعلها معنى لمجرد انه قالها مره والناس اتبسطت منها.
اختراع اسماء للناس غير اسمائهم
لو تصرفاتك مش عاجبه الشخص الظريف ممكن يطلع عليك اسم يغيظك بيه وانت وحظك ممكن الاسم ده يكون مستفز تقوم تغب عليه وفي الحاله دي الاسم ثبت عليك بما انه نرفزك يبقى وصل للغرض المطلوب (ربط بينك وبين الاسم ودايما هيندهك بالاسم ده).
خلط الجد بالتهريج
الشخص الظريف ممكن متعرفش تاخد منه دفة الحديث علشان تخليه يتكلم معاك بجديه لأن معندوش فرق بين الجد والتهريج يعني مثلا لو انت بتكلمه بطريقة جديه ممكن يقلب الموضوع هيصه وضحك وتنسى اصلا انت كنت بتتكلم عن ايه. اوعى تحاول تأنب الظريف على حاجه عملها وخنقتك لأن ده هدفه انه يضايقك ويضحك الناس عليك لو كلمته بجديه هيمسكها عليك وهيكررها كذا مره لحد ما تلزق فيك وخصوصا لو كنت بخيل وهوه اكتشف الموضوع ده ليلتك هتبقى سودا.
الظريف طفل كبير
الشخص الظريف (الحزمبل) عباره عن طفل سنه كبير شويه بيحاول يجذب انتباه الي حواليه وممكن توصل لدرجة انه يقلد الاراجوز علشان يلفت انتباه او يضحك الي حواليه (حزمبل بقى)، وطبعا اسهل طريق لحزمبل انه يضحك حد بأنه يتريق على حد تاني على اساس ان الناس الي بتهيص في الزحمة كتير. ويا سعده يا هناه لو صادف في نفس المكان وجود واحد هوه ميعرفوش (علشان يفصص فيه بمزاج) هيستمتع بنتف فروته وفي نفس الوقت هيتجنب الصدام بينه وبين الشخص الي هوه ميعرفوش.
التعامل مع الشخص الظريف (الحزمبل)
اولا: لما يطلع عليك اسم مثلا او لو سأم عليك اوعى تحاول انك تاخده على جنب وتقوله ان الموضوع ده ضايقك لأنه في الحاله دي هيثبت عليك الاسم ، كل الي عليك انك تعمله انك متردش عليه ، سيبه وامشي وكل ما يكررها اعمل نفس القصه لحد ما يتكسف على دمه ويبطل.
ثانيا: لو قال افيه رخم او قال كلمة ملهاش معنى اوعى تضحك (لو متضحكش مفيش مجاملات في دي) لأنك لو ضحكت يبقى هتلاقيها نزلت في قاموس الكلمات بتاعته وهيقرفك بيها كل شويه.
ثالثا: لو عايز تتكلم معاه في موضوع جد اوعى ثم اوعى انك تكلمه بجديه زياده عن اللزوم لأنه ممكن يخليك متعرفش تتكلم معاه (هيبقى عامل زي السمكة) وهيفلفص منك لحد ما يا اما تنسى انت كنت عايز تقوله ايه يا اما هتتخنق منه وممكن تأجر 3 صعايده يمسكوه علشان يسمعك بالاكراه (الكلام بجديه بمثابة تعذيب للشخص الظريف)
رابعا: لو عايز تتفادى ان الظريف يطلع عليك اسم ممكن يضايقك احسن الحلول انك تتجاوب معاه في اتاته واستظرافه يعني لو قال كلمة ممكن تبتسم ، طبعا هوه كده مش هيسيبك لأنك بقيت من انصاره بس على الاقل مش من اعداءه.
خامسا: لو انت بخيل تجنب انك حتى تعرف واحد ظريف ولو ليك واحد ظريف اقطع كل العلاقات بينك وبينه لأنه مش هيسيبك في حالك ، هيشتغلك طول ما انت قدامه ولو بيخاف منك ومش بيقول حاجه في حضورك يبقى هيقول من وراك.
اشخاص الظريف (حزمبل) مبيطقهاش
الارندلي (الندل) : علشان ممكن يبيعه في اي وقت وده بيسبب احراج كبير للظريف (حزمبل)
البخيل: في مجالات العمل وخصوصا لو البخيل ده مدير الظريف. الظريف بيبقى محشور بين نارين مش هيبقى قادر يشتغله من ناحيه ومن الناحيه التانيه هيبقى هيموت ويشتغله لأن دي احسن الصفات الي الظريف بيحب يشتغل فيها.
الظريف ممكن تلاقيه متواجد في مجالات العمل التاليه
التمثيل وتقديم البرامج التلفزيونيه : الظريف (حزمبل) لو اشتغل مذيع في برنامج هيستغل كل نقطة دم عنده في البرنامج بتاعه وهيكون مخلص ليه جدا وخصوصا لو كان برنامج هايف ملوش لزمه (زي برنامج الطبخ الي كلنا عارفينه ، من كل كيكه قطمه).
|
