السباكين (اعيل ناس)

اسئل واغتت واعيل بني ادم ممكن تتعامل معاه ، ممكن يفضل يديك في مواعيد ويبعتك بتاع تلات اربع مرات في اليوم الواحد مع ان الاستغناء عنهم سهل جدا كل الي انت محتاجه مفتاح انجليزي او فرنساوي (الي تعرف تفهمه) وكام كماشه على كام حتة كتان على كام بكرة تفلون انما تعمل ايه بقى ماهو القط مايحبش الا خناقه.

الامر ميسلمش في اي بيت حنفيه بتنقط ، حوض مسدود ، سيفون بيسرب ساعتها بتقوم تنده للبواب او بتروح شخصيا لمحل اقامة السباك وتقوله اصل انا عندي كذا وكذا يقولك طيب روح انت وانا هحصلك واستنى طول اليوم في الشخص المنتظر وتكتشف في اخر اليوم انك اتحلقلك وشعرك قصر شويتين (مع تكرار نفس السيناريو هتلاقي نفسك بقيت زلبطه)

السباك بشكل عام:

السباك من الناس الي ممكن تتخنق منهم بسرعه نظرا لقلة احترامهم لمواعيدهم وقلة الالتزام بأي حاجه يعني ممكن جدا يبقى شغال عندك في شقتك في حنفية المطبخ ويقولك اصلي هنزل اجيب بكرة تفلون وادي وش الضيف ويجيلك بعد تلات او اربع تيام (بعد ما تروحله وتترجاه وتبوس ايده وايد صبيانه واحد واحد انه يجي) ويطلع العيب اصلا من سيفون الحمام. عادي جدا خطأ غير مقصود.

طبيعة عمل السباك:

السباك شغلته عامله زي الدكتور بالظبط العلاج بيعتمد على التشخيص ، يعني لو انت جيت الصبح لقيت حيطة الحمام غرقانه ميه لازم هتتصل بالسباك علشان يشوف الناس الي ساكنه فوقك عندهم تسريب في ايه (مع انك ساكن في اخر دور وفوقيك السطح). المهم ممكن يشخصلك صح وممكن غلط (اعتمادا على الشهادات وهل هوه اخصائي ولا استشاري) بس طبعا مع الفرق الكبير جدا بين الدكاتره وبين السباكين ان اخوانا الدكاتره لا يمكن الاستغناء عنهم انما بالنسبة للسباكين هتلاقي ان الاستغناء عنهم امر سهل جدا هيوفرلك على الاقل جزء كبير جدا من كرامتك (المتبعتره).

انواع السباكين:

طبعا احنا هناخد احسن السيناريوهات الي ممكن تحصل وهيه ان السباك اول ما هتروحله او تكلمه هتلاقيه جه علطول من غير لا تأخير ولا حلاقه.

دكتور سباكه (صرف صحي): النوع ده من احسن الانواع ووجوده نادر جدا اليومين دول ، يعني مثلا لو انت عندك الحيطه مرشحه هتلاقيه قعد يحسس بأيده على الحيطه علشان يشوف مصدر الترشيح جاي منين بالظبط وبعد ما يحدد النقطه الهدف هتلاقيه يقولك ممكن ابص بصه عند الناس الي فوق علشان اقدر احكم ايه المشكله بالظبط (او هتلاقيه بيقولك عايز ابص بصه عند الجيران الي فوق بس) ولما هيطلع عندهم هيحسس على نفس النقطه الي لقاها عندك وساعتها هيديلك رد شافي معافي فيه التوكسافين كله.
ملاحظه: النوع ده لايمكن الاستغناء عنه في المشاكل الكبيره لأنه قدها بمعنى الكلمة . وطبعا ممكن الاستعانه بيه لو عايز تعمل سباكة الحمام من اول وجديد.

سباك حافظ مش فاهم: النوع ده للأسف هوه المنتشر وهوه النوع الي هيعمل اي حاجه انت ممكن تعملها لو عندك الادوات اللازمة ، يعني لو تصورنا نفس المشكله الي حصلت وهيه ان حيطة الحمام مرشحه هتلاقيه اوتوماتيك راح نازل لجارك الي تحت وقايله انه عايز اتنين او تلاته كيلو اسمنت ابيض علشان يحلقم البلاعه (الحلقمة هيه انه يحط اسمنت على جميع جوانب البلاعه علشان متسربش ميه) ويعمل البلاعه بالاسمنت وتتحل المشكله لمدة يوم او اتنين وتلاقي الحيطه نزلت ميه تاني بالاضافه لأن البعيد غبي قفل صرف الغساله وصرف البانيو عند جيرانك الي فوق اثناء عملية الحلقمة.

سباك مهولاتي: النوع ده الحمد لله مش منتشر كتير بس لو صادفك واتعاملت معاه خلي بالك لأنه ممكن يوديك في داهيه ، لو تخلينا نفس المشكله ممكن من غير ما يعمل اي حاجه تلاقيه بيقولك يا بشمهندز مواسير الصرف بتاعت العماره قديمه وعايزه تتغير والمشكله دي مش هتتحل الا اذا اتفقت العماره مع بعضها انها تغير مواسير الصرف علشان هيه السبب. طبعا الحمار الحصاوي ده محدش يمشي وراه الا اذا كان (والعياذ بالله) الزبون حمار زيه. اسمع كلامه من هنا واول ما يمشي روح لسباك تاني يكون بيفهم.

سباك مش سباك: النوع الظريف ده من اطرف الناس اللي ممكن تتعامل معاهم ولو جبته عندك في البيت هتموت من الضحك ، النوع ده ممكن تستعين بيه في تركيب جلدة حنفيه (هيغرقلك الحمام وهوه بيركبها علشان هينسى يقفل محبس الميه) وممكن برضه تستعين بيه علشان يركبلك سخان (ممكن تلاقي العماره كلها بتستخدم السخان بتاعك بعد كده علشان بسلامته ركب السخان عالعمومي)

الفرق بين السباك والدكتور (كل السباكين بيعتبرو نفسهم دكاتره)

لو لاحظنا طريقة عمل السباك هنلاقي في اوجه شبه كتير جدا بين طبيعة عملهم وطبيعة عمل الدكتور زي التشخيص والعلاج على اساس التشخيص. وممكن مشكله كبيره جدا بالنسبالك تبقى قمه في البساطه بالنسباله (لأنها مرت عليه كتير قبل كده). اما الفروق بينهم يصعب اكتشافها على الرغم من انها واضحه جدا

اولا: الدكتور بيستعين بالسماعه علشان يقدر يكشف على المريض اما بالنسبه للسباك الشاطر فا هتلاقيه بيحسس عالحيطه (لو الدكتور حسس على مريض ممكن المريض يقوم لاطشه قلمين بغض النظر عن المركز الوظيفي للدكتور)

ثانيا: التشخيص الخطأ الدكتور لو شخص المرض خطأ في احتمال انه يعترف بغلطته انما بالنسبة للسباك فا استحاله يعترف انه شخص خطا (هيفضل يكابر ويقول لأ انا صح لحد ما يطلعلك ودان طويله زي حيوان دمه خفيف كلنا عارفينه)

ثالثا: الدكتور انسان برستيج والوظيفه (طبيب) دي رغم انها مش بتجيب فلوس فا هيه برستيج انما بالنسبة للسباك فا بالعكس تماما مش برستيج خالص انما بتجيب فلوس كتير (في نص ساعه ممكن تعملك 200 او 300 جنيه)

رابعا: علشان تبقى دكتور لازم تدرس 7 سنين وكمان كام سنه علشان يادوب تقدر تفتح عياده انما بالنسبه للسباك ممكن تتدرب على ايد سباك شاطر وتشرب منه المهنه في سنتين او تلاته بالكتير وبعدها تفتح ورشه وتبقى من النوع (سباك مش سباك)

نصائح عامه للتعامل مع السباكين

1- نظرا لعدم احترام الفئه دي لمواعيدها ولوقت الزبون لو كنت عايز سباك روح لأكتر من واحد وربط معاه على الاقل ممكن واحد يجيلك (لو كلهم حلقولك يبقى انت فقري بقى والعيب فيك وبصراحه احسن انها جت في السباكه علشان انت فقري) ولو كذا واحد جه قول للي لسه واصل انا استنيتك وانت مجتش (اعمل فيه زي ما عمل فيك ولطعك)

2- لما يبقى في مشكله كبيره استشير اكتر من سباك ولو على الاقل اتنين اتفقو على حاجه واحده يبقى اعملها ، في الحاله دي ممكن (بإحتمال ضعيف) يكون التشخيص بتاعهم صح

3- لازم تحط قاعدة انك تحاسب السباك على قد الي عمله بالظبط لأن السباك شخص كسيب من الناس الطيبه الي زيك ممكن يركب جلدة حنفيه ويكسب في تركيبها اكتر من تمنها. يعني لو جالك السباك علشان يركب حنفيه بـ20 جنيه اديله 4 او 5 جنيه بالكتير قوي يا اما الاحسن من كده انك تسخره يعملك حاجات تانيه (ممكن تقوله فك كل حنفيات البيت وركبها تاني)

4- لو العمليه بسيطه ومش مستاهله سباك (حنفيه عايزه جلده ، سيفون بيسرب) متحطش نفسك تحت رحمت حد (طبعا لو انت مش تنك قوي يعني) واعملها بنفسك علشان على الاقل توفر على نفسك الذل للفئه دي من الناس

في النهايه السباك ده بني ادم زي كل البني ادمين هوه بيدي لنفسه مقام عالي جدا وممكن ميحترمش مواعيده بس في الاخر بني ادم وكلنا ممكن نكون نفس الشخص بغض النظر عن كونا سباكين او لأ. حاجه تانيه وهيه اني بقدم كل الاعتذارات لأخوانا الدكاتره الي ممكن يزعلو من المقارنه بينهم وبين السباكين بس للأسف في سباكين كتير بيعتبرو نفسهم في نفس القيمه المعنويه للدكتور طبعا شتان الفرق بينهم فا لو كنت دكتور وقريت البوست ده ارجو انك متكنش زعلت من كلامي لو ضايقك. لو عندك اي ملاحظات ياريت تدونها علشان نشوفها ونتناقش فيها.

2 تعليقات