شركة النصابين المتحدة

ظاهره غربيه انتشرت كتير في مصر تلاقي واحد بيثبتك في الشارع او في المول او في السينيما يقولك انت كسبت معانا رحله للغردقة في فندق خمس نجوم او ممكن تكون كسبت عربيه او غيره ، ياترى ايه الحكايه

نصابين الشوارع

في شركة نصابه او مجموعة شركات ، دول بيتمثلو في عربيه جامبو كبيره ملايانه جوايز وطبعا الجوايز دي معاهم ضعف تمنها فلوس الناس الغلابة الي عايشين في احلام انهم كسبو. بصراحة الناس دول انا برفعلهم القبعه على طريقتهم في النصب.

اماكن توجدهم: الاماكن النائية عند كارفور المعادي مثلا ، الشوارع الداخليه للمناطق النضيفة والحتت دي. بمعنى اصح اي مكان بعيد عن عيون البلديه او الحي (ملاحظة الناس دي مش بتتواجد في مكان ليومين ورا بعض ومش بيقفو في المكان الواحد اكتر من ساعتين علشان لو حبيت تبلغ عنهم).

انواع الزباين المستهدفين: اي واحد ماشي بعربيه ولو عربيه فارهة يبقى يا سعده يا هناه.

طريقه النصب: اول ما هيكلمك هيقولك حضرتك كسبت معانا قزازة ريحه فاخره  تمنها في السوق مش اقل من 100 جنيه بس علشان تكسبها لازم تخربش الخربوش علشان تكسب معانا تاني ، طبعا لازم هيدور في بالك السؤال ده (همه هيستفيدو ايه من كده) وممكن تسأله نفس السؤال هيرد عليك بكل ثقة احنا شركة جديده لسه نازله في السوق وبنعمل دعايه لنفسنا وحضرتك في كل الاحوال مش هتخسر حاجه. هتقوله ماشي يا عم هات الهديه. هيقولك طيب حضرتك دلوقتي تجيب 40 جنيه لو مكسبتش يبقى هتاخد الاربعين جنيه بتوعك تاني وتاخد الهديه ولو كسبت معانا يبقى الاربعين جنيه دول هيأهلوك انك تخربش معانا كارت تاني وتكسب تاني معانا. ممكن تسأله اي هيه الجوايز هيقولك طقم اطباق ياميش وموبايلات وجهاز كمبيوتر وحاجات كتير والجايزه الكبيره عربيه اخر موديل. طبعا اول حاجه هتيجي في بالك انك طول عمرك فقري وعمرك ما كسبت ولا حتى شلن او كيس كاتشاب في اكياس الشيبسي ده حتى لما بتلاقي ربع جنيه مرمي على الارض بتلاقيه مقطع ومحدش بيرضى ياخده منك. فا هتقوله خلاص اوكي هخربش الخربوش (على اساس انك هتبقى كسبت قزازة ريحة ببلاش). وتيجي تخربش الخربوش تلاقي نفسك فقري لدرجة انك تكسب اقل هديه عندهم غالبا طقم الياميش والهديه دي متسواش حتى الاربعين جنيه (هيه دي طريقة النصب الي انا رفعتلها القبعة ، انت متوقع انك مش هتكسب وتلاقي نفسك كسبت حاجه تمنها اقل من القيمة الي انت هتدفعها فيها بعشرين مره) طبعا الراجل هيكمل الفيلم معاك ويحاول يقنعك ان الطقم ده تمنه غالي (وممكن يقف عليه علشان يثبتلك انه متين) ولو لقاك مزمزق ومتضايق من النصبايه الي اتعملت عليك هيقولك طيب انا هعمل معاك واجب وهديلك واحد كمان هديه. هتاخد الطقمين وتحطهم معاك هتلاقيه بيقولك لازم تخربش معانا كارت تاني (عالم سئيله صحيح ، طبعا في الحاله دي انت ممكن متتمالكش نفسك وتقوله يله يابن الـ…….. يا اما لو انت ابن ناس هتمتنع انك تشترك معاه في النصبايه دي)

ازاي تتعامل مع الناس دول لو شفتهم
اولا: متقفش ليهم واول ما يجيبلك سيره خربشه وخرابيش امشي وسيبه ينعر وراك ، يا اما لو انت ابن ناس ومترضاش انك تعمل كده يبقى اعتذرله وقوله مش عايز الهديه ومش عايز اشترك.

ثانيا: لو حصل وخربشت الخربوش وكسبت برواز صور او قلم فرنساوي يستحسن تلبس الطربوش وتمشي بكرامتك لأن في معلومه لازم تعرفها ان الناس دي عباره عن عصابه والعربيه الكبيره الي انت شايفها دي مش مليانه جوايز ، لأ دي مليانه شمحطجيه وعربجيه اي واحد يبلطج هيبطحوه وقزازة الريحه الي انت كسبتها دي هيتم استخدامها كمطهر للجروح الي هتنجم عن التوضيب الي هتتوضبه ، فا على ايه الكتره تغلب الشجاعه يا معلم. البس الطربوش او الطرطور وخد بعضك وامشي وحط في دماغك مبدأ (الحدايه مش بتحدف كتاكيت)

نصابين الحفلات

اماكن توجدهم: السينيمات ، المولات التجاريه ، محلات السوبر ماركت الكبيره ، يعني لو انت طالع من السيما معاك الحته بتاعتك ممكن يوقفك ويعمل عليك نفس الفيلم السابق بس مع شوية تغيرات في الحوار

انواع الزباين المستهدفين: اي واحد وواحده ماشيين مع بعض ويلاقي في ايدهم دبل (وخصوصا لو في الايد الشمال) وممكن الناس الي لابسه بدله على اساس انهم من علية القوم.

طريقة النصب: اول حاجه هيقولك من فضلك يا فندم حضرتك فاضي دقيقتين (الناس دي محترمة جدا) طبعا انت هتقف تشوف الناس دي عايزه ايه. هيقولك معاك اي عمله الرقم المسلسل بتاعها فيه تلات وحايد او اي عمله من فئة العشرة جنيه ، طبعا انت هتطلع كل الي في جيبك ومراتك او خطيبتك هتطلع كل الي في شنتطها علشان تلاقي الي الراجل عايزه ، وطبعا هتلاقي طلبه لأنه غالبا ما بيبقى حاجه سهله جدا. المهم هتلاقيه بيبص في العمله ويديلك ورقه ويقولك اختار جايزتين من الجوايز الي في الورقة دي (غالبا ما بيبقى 5 او 6 جوايز) هتلاقيها حاجات فارهة جدا رحله بره مصر مثلا او رحله للغردقة او موبايل او كارت عشاء في مطعم فخم. المهم هتختار الجايزتين بتوعك بعد مناقشات ومفاوضات طويله مع المدام او مع خطيبتك. هيقولك دلوقتي في حفله لازم حضرتك تحضرها وعلشان نضمن حضورك لازم تدفعلنا 50 جنيه وهتاخدها اول ما نوصل لمكان الحفلة (طبعا انت زبون وودانك طولت بس محدش واخد باله غير صاحبنا الي بينصب عليك). المهم هتديله ال50 جندي وتروح الحفله ، هتلاقي هناك العجب

اولا مش هتلاقي اي حد من الادارة ، حفلة عشا عاديه والاكل طعمه عيضه وبعد ما تخلص الاكل هتسأل نفسك هوه انت هتاخد فلوسك وجوايزك امتى ممكن تسأل الجارسون ، هيقولك بكل برود مش عارف بصراحة وتفضل مستني الاكراميه ، وبعد عدة ساعات قضيتها بعد الاكل (غالبا تبقى محتاج تروح الحمام ضروري جدا بعد الوجبه الجامده الي انت اكلتها لأن الاكل ده سره باتع) يستمر مسلسل العذاب النفسي وانت مستني حد يجيلك يقولك جايزتك اهي او يقولك الخمسينه بتاعتك اهي وطبعا على فشوش ، الخمسينه الي حضرتك دفعتها طارت يا معلم في اكل ميسواش خمسين قرش لو رحت زيزو النتن كان انضفلك.

ازاي تتعامل مع الناس دول لو شفتهم:

اولا: اول ما حد مؤدب يجي يوقفك ويقولك من فضلك قوله حفله لو قالك ايوه يبقى قوله لأ شكرا مش عايز.

ثانيا: لو الراجل ده دبسك في المعلوم وقالك تيجي الحفله قوله لأ مش فاضي لحفلات (ممكن انت والمدام تعملو قال يعني عندكم مشاوير في نفس الوقت)

ثالثا: لو انت من هواة العذاب النفسي ومش مصدق كلامي يبقى براحتك انت الي جبته لنفسك ، بس اضعف الايمان متاكلش من الاكل الي في الحفله علشان مش طالبه يبقى ضياع فلوس ووجع بطن وممكن تعملها على روحك. ممكن تاخد المشروب بس ولا اقولك بلاش ممكن يكون المشروب هوه الي فيه التوكسافين كله.

نصائح عامه للتعامل مع جميع فئات النصابين دول

اولا: متقفش لأي حد معاه هدايا في الطريق وخصوصا المناطق الغير معموره سيبك من انه هينصب عليك ممكن يرفعك وياخد فلوسك ولو حصل ووقفت حاول تخلي قزاز عربيتك مقفول شويه والعربيه مقفله كويس علشان لو حصل اي حاجه تعرف تفك منهم بسرعه ولو واحد وقف قدامك دوس بنزين متقلقش هتلاقيه جري (هوه العمر بعزقة)

ثانيا: كلمات السر في مع النصابين دول قوله هدفعلك كام؟ لو قالك بس اسمعني قله لأ شكرا ، لأن لو معاه جوايز ببلاش فعلا هيرد عليك بدون تردد وهيقولك لأ ببلاش او ممكن يديلك الجايزه ويمشي (غالبا ده الي بيحصل)

ثالثا: لو اتغرزت في القصص دي متحاولش بأي شكل انك تتخانق لأنك متضمنش في كام واحد انت مش شايفه ممكن يبقى مشترك في الخناقة دي (ممكن يغزوك او يحلقولك الفروة)

رابعا: حط دايما المبدأين دول قدام عينيك  اولا الحدايه مش بتحدف كتاكيت ثانيا انت هتفضل طول عمرك فقري مش هتكسب يعني مش هتكسب.

تعليق واحد بس