مطعم الوصيه

مطعم الوصيه الاكل بالقطمه

عمرك شفت مطعم السندوتشات بتاعته بتتحسب بالقطمه؟

طول عمري لما بروح اي محل وجبات سريعه وبشوف المنيو بلاقي مكتوب فيها يا اما صغير يا اما كبير مفيش تالت (الا اذا كان البعيد طفس وطلبها جامبو ساعتها هيخترعوله عيش على مقاسه). انما عمرك شفت حد يكتب في المنيو ان السندوتش ده 25 قطمه؟ او 22 قطمه؟

انا في مره طلبت معايا اعد عدد القطمات في السندوتش والمنيو كان مكتوب فيها 22 قطمه قعدت اعد في القطمات ووصلت لرقم 18 بس. ساعتها عرفت انهم يا اما مكانوش يقصدو حجم الفك بتاعي (على اساس ان انا الفك المفترس) يا اما البني ادم الطفس الي وظفوه علشان يقطم ويعد القطمات كان ساقط في الحساب وعد غلط او كان ملوش نفس ياكل فكان بياكل بالعافيه وياخد قطمات صغيره.

ما علينا همه اساسا دلوقتي غيرو المنيو وخلوها طبيعيه زيها زي اي منيو مطعم تاني ، بس بصراحه دي كانت وسيله ملفته للدعايه عن المطعم ده. وفعلا نجحت بغض النظر عن ان عدد القطمات كانت اقل.

دلوقتي المطعم ده بعد ما عمل الشهره بتاعته اتغير وطبعا الوجبات الي فيه اتغيرت بالتبعيه والسندوتشات مش صغرت بس انما طعمها اتغير هوه كمان وساعات بيجيلك الطلب غير الطلب وطبعا بما اني جاهل بطلب ومش عارف انا بطلب ايه ومش بتفرق معايا فا باكل زي الحمار ما بياكل في النجيل لا الحمار بيشبع ولا النجيل بيخلص.

اخر تجربه ليا مع المطعم (وبقول كده وعارف اني مش هحرم وهاكل من هناك تاني)

التجربه الاخيره (العشاء الاخير)

رحت فرع المطعم الي في حديقه مول مع المودام مراتي وقررنا اننا جعانين ولازم ناكل فا دخلنا المطعم عشان ناكل (طبعا مراتي حافظه المنيو وشكل كل سندوتش وطعمه) المهم هيه طلبت السندوتش المفضل ليها وانا كراجل البيت كان لازم اثبت رجولتي وارغمها على انها تاكل نفس السندوتش الي انا هاكله وكمان طلبته كومبو مع انها عمرها ما كملت السندوتش في اي مطعم علشان تقدر تاكل معاه بطاطس وتشرب ببيبسي كمان. المهم السندوتشات وصلت وانا دعكت ايديا في بعضها استعدادا لألتهام السندوتش بس مراتي اول ما شافت السندوتشات استغربت وقالت مش ده السندوتش الي انت طلبته يا سبعي (بما انها عارفه شكل كل السندوتشات) قوم انا قولت وانتي عرفتي منين يا فالحه قالتلي مش ده شكله ثم انت طالب السنتدوتش مقلي ولو بصيت في الفراخ الي جوه السنتدوتش هتلاقيها مشويه ومفيش عليها ولا رشة بقسماط (حسيت ان في ودان حمار بدأت تطلعلي لأن فعلا باين جدا ان الفراخ مشويه مش مقليه وانا عملت فيها فتك وفاهم) وراحت خاطفه الايصال من قدامي وقالتلي بص يا حبيبي ولقيت السندوتشات فعلا مكتوبه في الايصال غير ما احنا طلبناها. فا رحت منادي واحد من الناس الي هناك وشرحتله القصه وقالي احنا اسفين يا فندم واول ما بدأ يمد ايده على السندوتشات حاجه جوايا قالتلي انهم هياخدوها يرموها فا استحرمت وعملت فيها دكر للمره التانيه وقلتله لأخليهم مش مشكله (حسيت ان الراجل بيقول في عقل باله امال انت قارفني ليه من الاول بقى ما تطفح وانت ساكت ومتقرفناش عالمسا) وطبعا طول ما احنا بناكل مراتي كانت بتبصلي شظرا لأنها بتاكل حاجه مش بتحب تاكلها وكمان الاوردور جه غلط وكمان علشان ارغمتها على حاجتين في نفس اليوم ، بس مش دي القضيه التقيل جاي ورا.

اثناء الاكل

وانا باكل حسيت بطعم غريب في السندوتش وبصراحه مرضتش الفت نظر مراتي ان في حاجه غلط فا سألتها هوه السندوتش حلو؟ قالتلي هوه انا مش بحبه بس عادي يعني في حاجه؟ قلتلها لأ مفيش. بعدها بتلات ثواني قولتلها ما تجيبي قطمه من السندوتش ، راحت بصالي باستغراب وقالتلي ما هو الاتنين واحد ونفس السندوتش (حسيت بنظره بايخه قوي في عينيها ، لأنها حست اني طفس وعايز اتطافس على السندوتش بتاعها) قولتلها لأ بس اكيد عندك هيبقالها طعم تاني (لازم طبعا كنت ادخل الرومانسيه على الموضوع علشان متفهمنيش غلط) ، المهم اخدت قطمه من السندوتش بتاعها ولقيت مفيهوش الطعم الغريب الي انا حاسه في السندوتش بتاعي فا سكت وكملت اكلي ، المهم بعد ما اخدت القطمه هيه كانت عايزه تعيش معايا لحظة الرومانسيه الي انا دخلت فيها وقالتلي هات قطمه ساعتها كان فاضل ربع السندوتش ومن غير ما ارد عليها ولا حتى ابص ليها رحت واكل ربع السندوتش في قطمه واحده وقعدت اشاور قال يعني مكنتش واخد بالي (هيه عارفه اني كنت واخد بالي كويس قوي وشكت فيا اني فعلا طفس وكنت عايز استغلها في قطمه من السندوتش). بس طبعا بما اني مش عايز اتسبب ليها في اي اذى مرضتش اني اخليها تدوق السندوتش بتاعي علشان لو مسمم ولا حاجه ما نموتش احنا الاتنين وتبقى مصيبه.

بعد الاكل بشويه

بعد ما خصلنا الاكل وروحنا البيت (طبعا مراتي ما كلمتنيش ولا نص كلمه ، علشان الحركه النص كم الي عملتها معاها) وكانت ساكته طول الطريق من حديقه مول للبيت. وبعد ما قعدت في البيت شويه حسيت بأعراض وجع بطن (مش عايز ادخل في تفاصيل علشان ذوي النفوس المنقرفه الي بتقرف من الهوا لما ريحته بتبقى وحشه) المهم اخدتلي قرصين ستربتوكين وبعدها بشويه كله بقى تمام التمام بس اتأكدت ان فعلا السندوتش كان فيه حاجه غلط مش مظبوطه.

نصائح للأكل في مطعم الوصيه:

1. لما تروح اي مطعم (مش الوصيه بس) لازم تبقى عارف شكل كل سندوتش وطعمه كويس علشان محدش يستغفلك ويجيبلك سندوتش انت مطلبتوش وتاكله زي حلاتي كده وانت مش عارف اذا كان ده سندوتش لحمه ولا فراخ ولا ايه اصله بالظبط.
2. لو حسيت بأي طعم غريب في السندوتش لازم تطالب بحقك ، طبعا متعملش زي ما انا عملت وتعصر على نفسك كام لمونه وتاكل وانت متضرر المفروض انك تقوم ناده بهدوء على مدير المطعم او اي حد من الاستاف وتفهمه ان في طعم غريب في السندوتش وساعتها هيغيرهولك من سكات ولا من شاف ولا من دري.
3. المطعم ده على الرغم من الكلام الي انا كاتبه يعتبر ارحم بكتير من مطاعم كتير تانيه انا جربتها والحادثه  دي بصراحه عمرها ما حصلت معايا الا في المرادي بس اهم حاجه انك تطالب بحقك وتطلب تغيير السندوتش لو لقيت فيه اي حاجه غلط.
4. لو بعد الاكل حسيت ان في مشكله في بطنك انصحك بكل هدوء أنك يا تروح للدكتور يا تاخدلك قرصين ستربتوكين علشان يهدو معدتك وخصوصا لو السندوتش كان سبايسي.
5. لو عديت من قدام المطعم ده وحسيت انك جعان ادخل وخليها على الله وكل. كده كده معدتك هتهضم الزلط على اسوأ الفروض هيحصلك شوية كركبه في بطنك وبعدها هتروق وهتبقى اخر تمام.

تعليق واحد بس