ميلودي افلام

قناه ميلودي افلام (قناة اعلانات تتخللها افلام) ، لو انت مهتم بالاعلانات المسفه الي ملهاش لزمة اتفرج عليها.

حاجات غريبه بتحصل مش فاهما كلنا عارفين ان محدش مهتم بالاعلانات دي ، والاغرب انهم عارفين ان محدش مهتم بالاعلانات دي ، والاغرب واغرب ان اصحاب الاعلانات عارفين ان محدش مهتم بالاعلانات دي ، في الغالب القناة عامله فكرة الاعلانات دي علشان فكر تجاري بحت.

اقتراح : ممكن يعملو قناه جديده يسموها ميلودي اعلانات

افلام حلوه (لعشاق افلام المقاولات الي التليفزيون المصري تعالى على انه يشتريها)

الافلام القديمة (من اول ما بدأو السينيما الصامته لغاية الثمانينيات):

دايما لما هتفتح القناة دي هتلاقي فلم قديم ملون (اول ما قالو يا افلام ملونه) او فيلم ابيض واسود وفي الحالة دي ابسط يا عم هتتفرج على فلم قديم بقالك فتره مشفتوش (تحديدا من ساعت ما بطلت تفتح القناة الاولى). وطبعا في الافلام دي بيتخللها اعلانات اي نعم نفس فترة الاعلان بس الكويس في الموضوع ان عدد فترات الاستراحات اقل شويه.

الافلام العاديه (الجديده نوعا ما – افلام التسعينات):

يا سعدك يا حظك لقيت فيلم لناس توعى عليهم ( عادل امال ، ليلى علوي ايام شبابها ، الهام شاهين) في الافلام دي عدد الفواصل هوه هوه تقريبا والفتره هيه هيه. بس المشكله ان معظم الافلام بيبقى افلام مقاولات يعني فيلم ملوش قصه ومش هتفهم منه حاجه ، من الاخر تابع الاعلانات احسن.

الافلام الجديده: (افلام من اول سنة 2000):

لأ بلاش ارجوك لا تعطني هذا الدواء ، ممكن يجيلك شلل وانت قاعد من كمية المرات الي هيقطعو فيها الفيلم علشان الاعلانات ومده كل فتره ممكن توصل لربع ساعه. الفيلم ككل ممكن يستمر 3 ساعات مع ان فتره الفيلم لو انت شفته على بعضه لا يتعدى الساعه ونصف الساعه. اعتقد ان الشركة الي بتشتريلهم الفيلم بتشرط عليهم تحط اعلانات للناس الي تبعها وقرايبهم وجيرانهم وكده (طبعا ده غير الاعلانات الي ميلودي هتحطها). من الاخر لو انت شفت كلمة حصريا اجري يا هريدي خد ديلك في سنانك واجري ومتحاولش تتفرج على الفيلم ده.

تعليق على ميلودي افلام

قناة اعلانات متخصصة يتخللها افلام غالبا مش هيكون عندك القدره انك تتفرج عليها (هيبقى الفيلم يفقع المراره واعلانات تفقع المراره لأ كده حرام) ، جرب تمسك الريموت دلوقتي واقلب على ميلودي افلام اتحدى انك هتلاقي اعلان شغال. بصراحة لما بكون عايز اتفرج على اعلان جديد عجبني بفتح القناة دي (زي مجموعة اعلانات كوكاكولا زيرو)

الحلو في ميلودي افلام هيه اعلانات ميلودي تتحدى الملل (مع ان استراتيجية القناة على عكس الشعار ده تماما) المهم الاعلانات بتاعتهم مش وحشه هيه اي نعم قمة في الاسفاف والعبط بس دي تعتبر التسليه الوحيده في القناة .

3 تعليقات