مع روتانا ، مش هتقدر تغمض عينيك
لما تفتح القناة دي هتلاقي حاجه من الحاجات التالي ذكرها J
1- اعلان لسلعه مش لاقيين حد يشتري منها (وغالبا بيبقى اعلان لتي في شوب ، او ساونا بيلت او اعلان للفلايه الي بتطلع ميت قملايه ، او الدوا المعجزة الي بيعالج السعار)
2- اعلان لفيلم جديد نازل في السينيما المصريه (قناة روتانا اعتقد انها خليجيه مش مصريه)
3- اغنيه معموله فيديو كليب على مجموعة افلام
4- الميكنج بتاع اي فيلم حمضان او فيلم حلو (المهم الفيلم يكون طلع من السينيما)
5- فيلم شغال
6- برنامج ملوش اي لزمه تقريبا بيحطوه علشان يغطو الكساد الي حاصل في الافلام او علشان يخزو العين
لو جينا نتكلم عن كمية الاعلانات في خلال الافلام مثلا
اولا: كمية الاعلانات وفترات التوقف غالبا ما بيكون في فترة اعلانات كل ربع ساعه وممكن 10 دقايق لو فيلم عرض اول وعلى اخر ربع ساعه في الفيلم ممكن تلاقي فترة اعلانات كل 5 دقايق. اما بالنسبة لكل فتره بتاخد من خمس لعشر دقايق حسب اهمية الفيلم بس مش شرط انك تلاقي اعلانات لمنتجات ممكن تلاقي اعلان لفيلم جديد او اعلان لفيلم هيجي على القناة.
نتكلم عن حاجه تانيه. لو احنا فتحنا القناة هنلاقي ايه؟
الي بيميز القناة دي عن ميلودي اعلانات انك في معظم الاوقات لما تفتح القناة هتلاقي يا اما فيديو كليب معمول على افلام يا اما هتلاقي ميكنج بتاع فيلم وغالبا ما بيكون فيلم لأحمد السقا ولو انت حظك وحش شويه هتلاقي اعلانات برضه.
نتكلم عن البرامج العظيمة الي بتقدمها القناة:
القناة بصراحة بتقدم مجموعه من البرامج الي ملهاش اي لزوم ، ممكن حاطين البرامج دي علشان يملو الفراغات بين الاعلانات او الافلام او ممكن عاملينها مخصوص لشان يبينو لنفسهم انهم مش هيقدرو يغمضو عينيهم في حين ان المشاهد في سابع نومه ، وبرضه البرامج دي بيتخللها فترات اعلانات كالعاده. علشان يجيبو حق المذيعه الحسناء الي بتقدم البرنامج.
اغاني الفيديو كليب الي على الافلام:
ممكن نقول ان دي من ضمن الحاجات الي الواحد ممكن يستمتع بيها ، لأنك مش هتشوف الاغاني دي في اي قناة تانيه لأن المطرب بيبقى بتاعهم (كده كده مش هيقدر يصور اي فيديو الا معاهم) والفيلم مش بتاع حد يبقى اديها فيديو على الاقل عملو للأغنيه فيديو ووفرو تمن التصوير الفيديو كليب الحقيقي والموديلات والكلام ده كله.
اعلانات افلام السينيما:
من اهم نشاطات القناة الي ممكن المشاهد يستفيد منها ، عن طريق الاعلانات دي هتعرف ايه الي لسه هينزل في السينيما ولو عجبك ممكن القناة دي تكون سبب انك دخلت الفيلم ده (دي ميزه للقناة مش عيب)
الميكنج بتاع الافلام:
في معظم الاوقات هتلاقي ميكنج شغال في القناة دي ، حلو ومين يكره انه يشوف ميكنج بتاع فيلم واتعمل ازاي والممثلين تعبو ازاي علشان يوصلوه للشكل المشرف ده ، بس الوحش في الموضوع انك ممكن تحفظ الميكنج ده اتعمل ازاي لأنك هتشوفه كتير قوي ، يعني ممكن نقول انهم بيجيبو ميكنج جديد كل 6 شهور مره تقريبا يعني بالنسبالك انت هتشوفه مره بس همه برضه كتر خيرهم عايزين يضمنو ان الناس كلها شافت الميكنج ده فا بيشغلوه اطول فتره ممكنه او اطول من الممكنه بشويتين تلاته.
نيجي بقى للأفلام السينيمائية والمفروض انها النشاط الطبيعي للقناة:
القناة فقيره جدا جدا للأفلام (نسخة طبق الاصل من ميلودي افلام) افلام عربي قديمة وافلام مقاولات وافلام عفى عليها الزمن وأبت جميع القنوات انها تشتريها. ورغم ده كله بيحشرو فيها كمية اعلانات محترمة
اما لو انت مسعد وصادف انك لقيت فيلم جديد يبقى فرحه ما تمت الفيلم هيخنقك لأن ممكن في وسط فتره من فترات الاعلانات تنسى انت كنت بتتفرج على ايه اصلا وبعدها تفتكر لما تكون قلبت والفيلم خلص وتروح تنام.
تعليق عام على القناة:
القناة ضحكت ومازالت بتضحك على الجمهور او على نفسها بالاخض بشعار مش هتقدر تغمض عينيك ، اول ما هتقلب عليها هتلاقي حاجه ملهاش لزوم هتقلب (انت فعلا مش هتلحق تغمض عينيك لأنك هتقلب قبل ما تغمض عينيك). اما لو انت بتتفرج على فيلم ممل وقديم ممكن تستغرق في سبات عميق وانت في وسط الفيلم
ناهيك عن انهم بيحبو جمهورهم جدا لدرجة انهم بيجيبولهم اعلانات علشان يدو الفرصه للي عايز يدخل الحمام او ينزل يشتري حاجه او يعمل لنفسه كباية شاي علشان تصحصحه.
|
كلام جميل ومنطقى شعبى مثير مضحك
اهنيييييييييييييييييييك
معاك حق في حته الاعلانات دي ..حاجه بتبقي ممله فعلا
وقناه بتحيب تكرر نفسها كتير ..كانها معندهاش جديد
او كانها معتمده علي المجموعه بتاعه روتانا موسيقي كليب حليجيه
فممكن نشاط دي يغطي كسل دي ..
مع ان اهم قناه في المجموعه كلها