شارع عباس العقاد

شارع عباس العقاد عموما قريب الشبه من شارع الهرم باليل بس الفرق انه في مدينة نصر

شارع عباس العقاد من زمان جدا وهوه ملتقى الحبيبه ومكان مناسب للتمشيه والفرجة على الفاترينات او البنات (انت ونيتك) وصباحا ملجأ للعيال والبنات المزوغين من مدارسهم ، هتلاحظ ان في اوله شباب الجامعه العماليه مرطرطين وماليين الشارع.

المكان: شارع عباس العقاد – مدينة نصر (هتعرفه من كميه الحبيبه الي ماشيين فيه) اوله من طريق النصر الاتوستوراد واخره عند شركة انبي

علامات مميزة للشارع: في اوله هتلاقي ميكروباصات كتير وفي اخره هتلاقي حادثه (غالبا يعني)

ملخص: شارع زحمة بداية من الساعه 9 صباحا وحتى الساعه 1 باليل ، من الاخر لو انت مستعجل وحظك العاثر رماك في شارع عباس العقاد يبقى خد اي يمين وخليك ماشي فيه لغاية ما تطلع الطيران وتنفس الصعداء (ملاحظة اوعى تدخل البطراوي وضواحيه – خليك في عباس العقاد اجدع)

عباس العقاد صباحا

الدنيا رايقه ومفيش عربيات ملاكي كتير ، معظم العربيات ميكروباص مركبه اجنحة. طبعا مفيش حبيبه (لسه نايمين) فا الدنيا هتبقى رايقة شويه ، لو عايز تمشي فيه مفيش مشكله مش هتتأخر كتير. بس خلي بالك لأن اكتر نقطة زحمة فيه عند المترو (مترو مصطفى النحاس) لأن العربيات الي جايه من مصطفى النحاس بتتقابل مع الي طالعه من عباس العقاد. ممكن تدخل من اخر يمين قبل التقاطع وبعدها ادخل اول شمال هتطلع على اليوتيرن علطول ، الحركة دي هتوفر معاك من دقيقتين لخمس دقايق تقريبا.

نصائح علشان تمشي في عباس العقاد صباحا

اولا: حاول تبعد عن اول شارع البطراوي ، لأنه ملتقى المزوغين من الولاد والبنات واكبر تجمع للناس الي بتتمشى علشان جنينه مول

ثانيا: ابعد على قد ما تقدر عن محل جاد بتاع الفول والطعميه ، لأن الوقت ساعت فطار والفول واجب على كل شخص. فا هتلاقي الناس المفولين والي لسه هيفولو (وطبعا انت عارف الي بياكل فول بيحصله ايه)

ثالثا: اليوتيرن بتاع مصطفى النحاس ابعد عنه تماما لأنه زحمة جدا وممكن تلف متعرفش تدخل عباس العقاد او ممكن تدخله غصب عنك لو انت مكنتش عايز تدخله.

رابعا: الشارع الي قدام ناشونال بغداد بعد الساعه 10 لا يطاق والتقاطع الي قدامه زحمة لا تحتمل لو انت سايق عربيه امرك لله امشي على اليمين ولما توصل للتقاطع ادي اشاره ولف ولو انت ماشي علطول خليك في اليمين علشان محدش يزنقك في الشمال.

عباس العقاد ظهرا

زحمة يا دنيا زحمة ، اليوتيرن بتاع المترو متدخلوش هتلاقي العربيات واقفة مستنيه سواق الميكروباص الغلس لما يحمل رمسيس. وهتلاقي التاكس واقف على ناصية الشارع موقف الشارع وراه علشان يتفق مع الزبون على الاجرة . الشارع الي بيربط بين محمد حسنين هيكل وعباس العقاد من النقطة بتاعت محل جاد هتلاقي عربيات واقفه صف تاني وواحد قال اما اجيب سندوتشين فول فقام ركن في نص الشارع وقفه ، متمشيش في الشارع ده

الشارع الي قدام ناشونال بغداد : شمبرلاح عربيات داخله من الشمال وعربيات طالعه من اليمين ومفيش اشاره توقف حد يا اما تدخل من قبل الشارع ده يا اما من بعده هتمشي حته زياده بس هتوفر عليك كتير.

نصائح علشان تمشي في عباس العقاد ظهرا

اركن العربيه في اي شارع جانبي وامشي على رجليك اسرع ، يستحسن تركن عند جنينه مول (الدنيا بتبقى فاضيه هناك) بس اركن بعيد عن السايس الغلس.

عباس العقاد باليل (شارع الهرم)

كل الحبيبه اتنين اتنين
- الزحمة متركزة في شارع البطراوي معظمها من البني ادمين. ممكن يجيلك شعور انك ماشي في حاره من حواري الحسين والناس حواليك زي الرز (وخصوصا في الاجازات).

- في نقطة زحمة تانيه عند وندرلاند ومعظم الي بيقف هناك من العيال الروشه الي فاكره ان الصياعه هز كتاف لو ماشي بالعربيه خلي بالك لأن الناس بتبقى اكلت الفول ولسه متهضمش كويس فا ممكن تلاقيهم عرضو قفاهم وعدو الشارع بسرعة الحلزونه العرجا.

- ابعد باليل عن الحديقة الدوليه والشارع المؤدي للباب الجانبي بتاعها لسببين الاول هتلاقي العيال الي باباي جابلهم عربيه جديده فا بيجربو الموتور بتاعها (ممكن خروف غشيم منهم يخبطك او يخبطلك عربيتك) السبب الثاني المكان ده سواقين النص نقل بيركنو فيه وممكن يحصل شوية مضايقات ومعاكسات تحديدا للبنات.

نصائح عامه للسير في عباس العقاد في جميع الاوقات

اولا: لو هتركب ميكروباص الاجره نص جنيه لو هتروح اخر الشارع وجنيه لو هتروح العاشر ، ومتفاصلش لأنهم هينزلوك

ثانيا: لو انت راكب تاكسي والطريق زحمة متخليهوش يخترع ويدخل من الشوارع الداخليه لأنها برضه هتبقى زحمة شويه ، قله لأ امشي في عباس العقاد وابقى اديله اتنين جنيه زياده.

ثالثا: هتلاحظ وجود اتوبيسات متهالكة عند الحديقة الدوليه في صباح الاعياد الرسميه وشم النسيم الاتوبيسات دي بتبقى رحلات من الاقاليم ممكن تشوف واحد ماشي بكاسيت ستيريو على كتفه وماشي بيه عادي جدا هوه كده فاكر انه روش وشايل الووكمان بتاعه. تجنبا للمشاكل ابعد عن الناس دي (تهريج بوابين ومكيانيكيه)

رابعا: لو ماشي بعربيتك حاول تبعد عن عباس العقاد وزحمته لو انت جاي من عند انبي امشي في شارع ذاكر حسين وامشي من الطيران احسن ، ولو ضروري عايز تمشي في عباس العقاد يبقى امشي في محمد حسنين هيكل اروق. ولو انت جاي من الاوتوستراد يبقى ادخل اول يمين من عند ناشيونال بغداد وامشي من عند البطراوي اسرعلك.

خامسا: لو متعرفش الشوارع الدخليه الي جنب عباس العقاد متفتيش وتدخل فيها لأنك ممكن تتعطل اكتر وتقف اكتر

سادسا: لو عايز تركن عربيتك متركنش ابد صف تاني في عباس العقاد (هتسيبها دقيقتين هتلاقيها متكلبشه) عايز تركن ادخل اي شارع جانبي يعجبك واركن قدام اي عماره (الشارع الي جنب ناشيونال بغداد بيبقى فيه ركنات في معظم الاوقات)

تعليق واحد بس