الطريق الدائري – مدينة نصر ، المعادي ، الهرم

ناس عجيبه ، معقول مستعجلين للدرجادي ، ولا هيه مسألة كسل انهم يدوسو على الفرامل ، ولا همه شوية شباب روشه فاكرين انهم كل ما يجرو بالعربيه اسرع كل ما بقو شباب صايع وبيعرف يسوق اكتر ؟؟؟؟؟؟؟؟

المكان: الطريق الدائري (مدينة نصر – المعادي – الهرم)
الزمان : اي وقت بعد المغرب (لما الرادار بيبقى مش موجود)

ملخص الموضوع: انا طريقي دائري معظم الاوقات بصراحة بشوف ناس خرفان اقل ما يقال عنهم انهم ميستهلوش انهم اصلا يركبو عربيات ، كبيرهم عربيه كارو وكمان همه يجروها بدال الحمار على الاقل هيمشو على مهلهم شويه.

الخرفان الطايشه

تعمل ايه لو انت ماشي في امان الله على سرعة 80 او 90 ومشغل الراديو او الكاسيت او حتى مش مشغل حاجه وفجأة لقيت عربيه طلعت من تحت الارض ولازق في عربيتك من اليمين او الشمال علشان عايز يطلع منك ، لو انت سواق كويس هتعرف تعديه من غير اي خسائر ولو انت نص نص ممكن تتخض وترمي على واحد الناحيه التانيه انت مش واخد بالك منه وممكن تحصل حادثه مروعه لا قدر الله وطبعا صاحبنا الخروف هيطير لأن مسؤوليه زي دي اكبر منه بكتير يعني ممكن يكلم بابي ويقوله انه عمل حادثه وطبعا بابي هيقوله تعالى البيت دلوقتي ويشيلو النمر من على العربيه ويخفوها تحت طقاطيق الارض
النصيحة: مفيش نصيحه الا انهم يعملو لجنة كل 5 كيلو في الطريق او لو انت نص نص متمشيش في الدائري باليل.

الكبش او الاكباش الطائشة

طبعا الطريق الدائري معمول لسواقين النقل والاتوبيسات فا من حقهم يمشو فيه على السرعه الي تعجبهم ، دي وجهة نظر سواقين النقل التقيل والاتوبيسات السياحيه. تخيل انت ماشي في الطريق وتبص في المريا خير الهم اجعله خير تلاقي نقل وبيجر وراه مقطوره وقاعد ياخد غرز من وسط العربيات وفي الطريق اليك ، هتعمل ايه تيجي يمين يا لهوي في عربيه تيجي شمال انت اصلا شمال ، الحل في الموضوع ده انك تدوس شويه بنزين علشان ميعرفش يجيبك وطبعا وانت بتشد في الطريق متنساش تعمل للسواق بأيدك علشان يهدي شويه ، ولو هوه سواق غلس وزود سرعته هوه كمان اوعى تكسر عليه لأنها مش فارقه معاه كل الي ممكن تعمله تحاول تروح بعيد عنه في الناحيه التانيه من الطريق مثلا بحيث ميعرفش يخبطك وتطلع ايدك برضه وبدال ما تشاورله يهدي سرعته شاورله بأيدك علامة غوووووور يا عم ، او ممكن لو انت قبيح شويه شاورله بأيدك بالاشاره الي كلنا عارفينها.

النصيحة: الناس دي لازم تعديها بأي شكل من الاشكال ومتحاولش تقف في طريقهم لأن الفرامل عندهم مش زي العربيات العاديه وفي معظم الاوقات مش بيدوسو فرامل

الثيران الهائجة

طبعا احنا عارفين الفئة دي كويس قوي ، انا بتكلم عن الي بيقولو عن نفسهم عفاريت الاسفلت ، سواقين الميكروباظ. دول بقى حدث ولا حرج عاملين مشاكل في الدائري وفي الطريق وبيقفو في اي حته وعايشين حياتهم وكأنهم يا ارض اتهدي ما عليكي قدي. دول انت ممكن تبص في المرايا تلاقيهم وراك تلتف للطريق تاني تلاقيه بقى قدامك وخلي بالك ممكن تلاقيه وقف في وسط الدائري علشان يركب واحد او ينزل واحد. (انا مره شفت ميكروباص بينزل واحد في وسط كوبري اكتوبر)

النصيحة: متقلقش هوه كده كده هيعرف يصرف نفسه المهم انك تخلي بالك من الطريق

سلاحف النينجا

دول بقى اخر نوع من الناس العجيبة الي بتمشي في الدائري. دول من النوع الهادي البارد الي بيحب يستمتع بجمال صحراء الدائري ويحب يعذب الناس الي حواليه دول بقى بيمشو على سرعه لاتقل عن 20 ولاتزيد عن 50 يعني تقريبا عربياتهم مفهاش غير اول وتاني وتالت

النصيحة: امشي بسرعه من جنبه او امشي وراه بنفس سرعته لحد ما الطريق وراك يفضى وبعدها اطلع منه بس اهم حاجه تركز ان الطريق وراك بيبقى فاضي لأن طول ما انت ماشي بنفس سرعته الناس التانيه بتعتبر انك زيه وبتحاول تطلع منك بسرعه علشان تخلص.

 نصائح عامه للسير على الدائري

اولا: امشي بسرعه متفاوته من 80 لغاية 90 ولو هتطلع من حد متزودش لأكتر من 100 الا اذا كنت مستعجل

ثانيا: ركز في العربيات الي جايه من الطريق المعاكس لو بيقلبو نور اعرف انك لازم تهدي فورا لسرعة 80 او اقل علشان في مالا يحمد عقباه قدام شويه

 ثالثا: متقفش لأي حد في الدائري وتركبه ، ممكن يبقى معاه مطوه ويغزك وياخد العربيه الي حيلتك

رابعا: لو انت حسيت ان الطريق وقف فجأة او انك هتهدي قوي او لقيت قدامك مطب دوس على الانتظار (الزرار الي بيشغل الغمازتين مع بعض) علشان الي وراك يعرف انك تقريبا وقفت فا يهدي هوه كمان

خامسا: لازم تمشي في النص بين الخطوط البيضا الي على الارض (في ناس كتير مش عارفه الخطوط دي معموله ليه) المهم امشي في النص بين اي خطين واعرف ان الحاره الي في اقصى اليمين بتاعت العربيات الي بتجري بسرعه مهوله فا لو هتمشي امشي في اي واحده في النص تجنب الحاره الي على اليمين قوي والي على الشمال قوي.

سادسا: لو محتاج بنزين للعربيه لو انت جاي من مدينة نصر اخر بنزينه بتاعت وطنيه قرب التقاطع بتاع المقطم (منصحكش بيها لأنهم هيملولك التنك في ربع ساعه حتى لو هتحط 10 لتر بس) ولو انت جاي من المعادي او الهرم في بنزينه بتاعت امارات مصر قريبه من المودرن اكاديمي بس خلي بالك لأنها بعد ما تنزل من على كوبري المنيب (الكوبري الي في الدائري) فا لازم تكون عامل حسابك في بنزين يوصلك ليها على الاقل

سابعا: خلي بالك من الناس الي بتعدي الشارع في منطقة دار السلام والمعادي علشان ممكن متاخدش بالك منهم لأن الطريق بيلف وانت مش هتبقى شايفهم.

وربنا يتورلك وينورلنا طريقنا وفي الاخر “قل لا يصيبنا الا ما كتب الله لنا”

مفيش تعليقات - اضف اول تعليق على الموضوع