يوسف عباس – مدينة نصر

لو انت مشيت في يوسف عباس الصبح قشطه هتلاقيه فاضي بس حاول تبعد عنه في وقت مرواح الموظفين وبعد الساعه 10 ونص باليل

المكان: شارع يوسف عباس – مدينة نصر (موازي لشارع الطيران)

الزمان : اوقات النهار كلها

ملخص: لو انت مأمن على العربيه وعندك اي حاجه عايز تصلحها ممكن تمشي فيه علشان فيه تقاطعات كتيره واللذيذ في الموضوع ان الناس بتدخل من التقاطعات دي من غير ما تلاحظ ان ده شارع ، لأ وشارع رئيسي كمان ، اعتقد انهم فاكرينه حاره او زربيه ممكن يدخلو فيها ويطلعو وقت ما يحبو

الزمان: صباحا

الطريق عموما كويس بس انتبه لأنهم بيقفلو الطريق من التقاطع بتاع جامعة الازهر مع شارع المخيم الدائم وعلشان تكمل في يوسف عباس علشان تروح لمصطفى النحاس لازم تمشي بتاع 100 متر في المخيم الدائم وتاخد اليو تيرن يعني لو مستعجل خليك في الطيران احسن

الزمان: ظهرا

الطريق زحمة جدا تقريبا دي نقظة التقاء لجميع موظفين مصر والغريب في الموضوع ان العساكر في الوقت ده بيمشو شارع المخيم الدائم على حساب شارع يوسف عباس (على اساس ان شارع المخيم الدائم يعتبر دائري صغير). نيجي للأشاره بتاعت الاتوتوستراد (عند الجهاز المركزي) يستحسن وانت داخل عليها تكون عامل حسابك في اللب بتاعك وكوباية الشاي علشان هتقف شويه عقبال ما تعدي من الاشارة دي
النصيحة: ممكن تمشي من شارع الطيران ومن بعد شارع عبدالرسول تحديدا عند البنزينه بتاعت موبيل تاخد يوسف عباس لأنك هتكون عديت الاشارة بتاعت المخيم الدائم وبعدها تاخد اشارة الاتوتستراد من يوسف عباس لأنها اهون شويه من اشارة رابعه. الحل التاني انك تمشي على التوازي مع المترو الي في يوسف عباس علشان المترو بيفتح السكه بتاعته بنفسه وملوش دعوه بالعساكر ولا الطريق ولا اي حاجه.

الزمان: باليل (بعد الساعه 10 ونص)

الطريق فاضي وحلو بس انتبه لحاجتين اول حاجه فيهم التقاطع بتاع المخيم الدائم علشان الناس بتدخل منه كأنه شارع رئيسي او بمعنى اصح كأن مفيش تقاطع اصلا ، تاني حاجه الاشاره بتاعت الاوتوستراد انت اصلا مش هتلاقي العساكر فيها (مزوغين) بس مش مشكله الحل بسيط جدا حاول تمشي في النص بالظبط علشان لما تدخل التقاطع تبقى محمي في عربيه على الشمال وعربيه تانيه على اليمين علشان تحميك من الطريق في الناحيه التانيه. الاهم من ده كله امشي في الحاره الشمال لأن الناس بتدخل من اليمين ملهمش دعوه لا بكلاكسات ولا بنور ولا ليهم دعوه بأي حاجه.

نصائح عامه للسير في يوسف عباس

اولا:  في مطبين قدام سكن طالبات جامعة الازهر من الناحيتين هدي عندكم ودوس على الانتظار

ثانيا: احذر الطرق الجانبيه علشان الناس بتدخل منها في الشارع ملهمش دعوه بحاجه

ثالثا: هدي عند التقاطعات سواء كانت المخيم الدائم ، او الاتوستراد او بتاعت نادي الزهور علشان ربنا يسهلك طريقك ويسترها معاك

رابعا: شارع يوسف عباس في معظم الاحوال احسن من الطيران لأن الاشارات بتاعته مش بتطول زي الطيران

تعليق واحد بس