عربيات ملاكي

هتعمل ايه لو انت ماشي في امان الله بعربيتك في شارع عادي جدا ولقيت واحد جاموسه طالعلك من ركنه اصلا هوه كان واقفها غلط وصف تاني ودخل وراح قافل الشارع قدامك علشان يمشي!
اكيد هتدوس فرامل ، بس قبل ما تدوس الفرامل انت بصيت في المرايا الاول؟ ممكن تلاقي جاموسه تانيه مش قادر يصبر ويخبطك (على اساس ان الراجل الي راكب العربيه وراك بيولد)

طبعا هتقول في عقل بالك اما جوز بهايم صحيح.

سلوكيات سواقة المصريين للعربيات فيها جزء كبير جدا من العدوانيه وجزء اكبر من الانانيه وحب الذات. ومش مشكله انهم ممكن يتسببو في حادثه او ضياع ارواح بسبب انانيتهم وطمعهم.

بصراحة كتير من الاوقات اتمنيت اني اشتري عربيه نص نقل مخرشمة وامشي بيها في الشوارع ، يا سلام احلى حاجه في الدنيا انك تمشي بالعربيه ومش خايف ان واحد غشيم فاكر نفسه في لعبة نيد فور سبيد يخبطك او يزنق عليك. ويا سلام لو بدال النص نقل اشتريت نقل تقيل (ترله) هتبقى ماشي في الشارع بعزوة كده والناس اياها الي بيعرضو قفاهم وبيعدو الشارع بغشوميه هيعملولك حساب اول ما يشوفو طلتك البهيه.

اشارات المرور

اشارات المرور ملهاش لزمة بالنسبة لكتير من الناس. لو في عسكري بيعملو له الف حساب لياخد نمرت العربيه انما لو اشاره من غير عسكري مش هتلاقي حد هيقف في اشاره والدنيا هتبقى حوادث ومحدش ماشي على رجليه هيعدي في الشارع ولا حتى هيبقى في حد ماشي على الرصيف لأن ممكن العربيات يضيق بيها الحال ويمشو على الرصيف (حقيقة حصلت في اول طريق اسكندريه الصحراوي وكتير جدا في الطريق الدائري)

النصيحة: خليك انسان متحضر ومتبقاش زي ذوات الاربع الي متفهمش ان لما النور الاحمر معناه انك تقف  علشان غيرك يمشي في الطريق. عمرك في حياتك شفت حمار بيقف من نفسه لما الاشاره لونها بيبقى احمر؟

حارات الطريق السريع

ماشي مع نفسك في طريق سريع نقول طريق مصر اسكندريه الصحراوي ، وفجأة لقيت واحد طاير من جنبك وقفل عليك الحاره بتاعتك هتعمله ايه؟
في احتمال انك تطلع راسك من العربيه علشان لما تشتمه يسمعك بس في الاحوال دي خلي بالك من الي جاي من ورا ممكن ياكلك على قفاك (بتشتم صاحبه ليه). لما واحد يطلع منك ويقفل عليك الحاره حاول تتأكد ان مفيش حد بيسابقه جاي من ورا وبعدين ابقى طلع راسك زي ما انت عايز.

المفروض ان في العالم كله الحاره الي على الشمال هيه اسرع حاره ولو واحد طلع من على يمينك يبقى كده بيشتمك. عندنا بقى كل الحارات مسموح بالتجاوز منها يعني لو بصيت على الحاره الشمال هتلاقي الي بيمشي فيها الشباب الي لسه حافظين ان الحاره دي للي عايز يجري ، والحارات الي في النص الي همه الناس الغلابه الي ماشيين في حالهم (الي كل من هب ودب بيزنق عليهم علشان ياكل الغرزة) ، اما الحاره الي في اقصى اليمين (الي المفروض معموله لعربيات النقل الثقيل) دي اسرع حاره في الطريق ، علشان الحاره دي عادةً محدش بيمشي فيها غير النقل والعربيات الكحيانه الي اخرها 60 فا دايما بتبقى فاضيه فا بعض الشباب بيستغل النقطة دي وبيجري فيها لأنها بتبقى فاضيه جدا.

النصيحة: امشي بسرعه معقوله نقول اقل من اقصى سرعه للطريق بحوالي 10 كيلو في الساعه بكده انت مش هتضايق حد والي هياكلك غرزه مش هتسبب لحد فيكم مشكله ، ودايما حافظ على هدوء اعصابك وانت سايق.

حارات الطريق الزحمة

الطريق واقف والعربيات ماشيه تاته تاته وميكروباص كسر عليك حارتك علشان يدخل الاول يكسب مكان ، هتعمل ايه؟ نعجة بقى هتعمل فيه ايه؟

حاول تقرب من العربيه الي قدامك على قد ما تقدر علشان تفوت عليه الفرصه ، ولو خايف تعمل كده ممكن تعلي صوت الموتور بتاع عربيتك (بس تبقى ماشي على نفس سرعتك) ودوس على الكلاكس بهستيريا ، ساعتها سواق الميكروباص هيفتكر انك غشيم وهيخاف تخبطه وتمسكه تبهدله (بس طبعا لازم يكون في ناس كتير علشان يشهدو عليه وكمان علشان يتفرجو عليه وهوه بيضرب)

ليه دايما لما بنسوق عربياتنا بنحس اننا احسن من الناس التانيه او اننا مستعجلين اكتر منهم ، وليه لما الطريق بيبقى زحمة وبنلاقي خرم ابره جنبنا بندخل فيه ونكسر على الي ورانا؟ طيب ليه لو واحد سايب مسافه بينه وبين الي قدامه بيتصنف على انه غشيم ومش عارف يلزق في الي قدامه وبنكسر عليه وندخل؟

المفروض اننا نكون اكثر تحضرا ونحترم اصحاب الحاره الي احنا داخلين عليها ، بمعنى ان علشان ادخل حاره ماشي فيها واحد لازم استأذنه الاول (على الاقل ممكن يطلع غشيم ويخبطك وساعتها يا حلو انت الي غلطان)

النصيحة: خلينا ناس متحضره لازم احترم حق غيري في الطريق واحترم الدور لأن الطريق لما بيبقى واقف بيمشو حاره وبعد كده الحاره الي جنبها وهكذا. ولو حد عملها فيك حاول تقفل عليه بأنك تقرب من العربيه الي قدامك ولو بصلك من الشباك شظرا احلقله هوه الي نعجة وكسر عليك (ساعتها هيتحرق دمه لأنه اتزنق بين حارتين لأن محدش هيعديه وهيفضل واقف شويه لحد ما اي حد يحن عليه ويعديه) ولو عايز تغيظه اكتر واكتر مجرد ابتسامة نصر كفيله بأنها تحرقله دمه بقيت اليوم ولو عايز تجيبله شلل ممكن تطلع لسانك حته صغيره.

الركن (الانتظار)

ركنه صف اول ماشي ، صف تاني ميضرش مادمت قريب من العربيه ، صف تالت وايه يعني لما الناس تستنى شويه  هيه الدنيا طارت . دي اسمها انانيه لأنك قفلت الطريق.

عندنا عاده غريبه جدا وهيه ان من حق اي حد مادام هيشتري حاجه من محل انه يركن قدامه حتى لو قفل الشارع كله او قفل على جراج. مفهوم الانتظار عندنا غريب جدا ، اي حد بيسوق لازم تلاقيه ركن في الممنوع وتلاقيه ركن صف تاني. لأ وفي ناس ممكن تضرب الانتظار وتمشي وتسيب العربيه (على اساس انهم مش هيتأخرو) طيب ايه ذنب الناس الي ماشيه في الشارع او الي عايز يدخل الجراش بتاعه ، ولا الميكروباظاتيه او التاكس حدث ولا حرج ممكن تلاقيه دخل من اقصى الشمال لأقصى اليمين علشان يلقط الزبون (ده اذا كان سواق محترم وعايز يمشي قانوني) وفي سواقين تانيين ممكن يقفو في الشمال عادي مفيش حاجه وزمر يا معلم (لهذا السبب كلاكس العربيات بيبوظ كتير).

بصراحة احلى حاجه عندنا كلابشات العربيات بس للأسف مش موجوده في كل حته. الذ ما فيها انها عقاب رادع لأي حد. الي يقف عربيته تتكلبش وتفضل ملطوعه بالاكراه زي ما عطل الناس عن مشاويرها زي ما هوه برضه هيتعطل لحد ما يجيله حد يفكهاله (وممكن ياخدله كلمتين في العضم ، احسن)

النصيحة: متركنش ابدا في طريق الناس وقبل ما توقف عربيتك استعمل دماغك وشوف انت هتعمل مشكله لو وقفت الوقفه دي ولا لأ ، ايه يعني لو ركنت بعيد شويه عن مكان ما انت عايز تنزل (المشي رياضه) ولو جيت تركن لقيت واحد أهتم راكن قدام الجراج بتاعك حاول تتمالك نفسك ومتشتموش ولا تقوله كلمة تزعله (اصله كده كده عكر مزاجك ولما تشتمه مش هتستفيد حاجه غير انه ممكن يشتمك يعكر مزاجك اكتر).

التقاطعات

في الشوارع بيحصل مواقف ولا ملاهي سندباد او دريم بارك ، ممكن تبقى ماشي في حالك تلاقي عربيه دخلت في نص الطريق من غير ما يبص على الطريق اصلا (حمار يعني) حاجه من الاتنين يا هتدوس فرامل يا هتفاديه بأنك تروح لأقصى الطريق من الناحيه التانيه ، بس قبل ما تاخد قرار من الاتنين خليك حريص كل الحرص انك تشوف المرايا بتاعتك هتكشفلك ايه

الاحتمال الاول: لو واحد جاي من وراك بالظبط وطاير الحق ارمي بعيد عن العربيه الي لسه داخله صاحبا الي ورانا مش هيبقى شايف العربيه الي لسه داخله لأنك مغطيها وممكن يفتكرك غشيم وخايف منه وهتوسعله ساعتها ده ممكن يكون احسن عقاب رادع للجوز الاولاني علشان ميدخلش كما البهايم والتاني علشان يحرم يجري هوه فاكر نفسه بيبرطع في الزريبه الخصوصي بتاعته؟

الاحتمال التاني: لو الطريق فاضي وراك او في عربيه ماشيه في نفس المكان الي انت المفروض تدخل فيه ، في الحاله دي عادي ممكن تدوس فرامل بس اهم حاجه وانت بتفرمل تدوس على كلاكس العربيه بهستيريا ولو عرفت امسك على الفرامل سنه علشان تصفر ، الهدف من كده انك توقع قلب صاحبنا ده في الارض علشان يحرم يدخل قدامك الدخله دي تاني

النصيحة: لو داخل على تقاطع متدخلش كأنك داخل جراج بيتك ولا داخل الفيلا بتاعتك بص الاول على العربيات الي جايه في الطريق لأن ممكن يكون الي جاي واحده وتخبطك وفي الحاله دي ليلتك هتبقى سودا. ولو انت ماشي في الطريق وواحد حصاوي دخل قدامك وقفل عليك يا تهدي سرعتك شويه لحد ما سيادته ياخد سرعة الطريق وبيدأ يفهم انه دخل على شارع والمفروض انه قفل على حد وراه يا اما تاخد اي حاره تانيه بعيد عنه بس برضه يستحسن انك تهدي علشان ممكن يكون في حد وراك.

نصائح عامه للقياده عندنا

أولا: متعديش السرعه القانونيه للطريق زيك زي غيرك ، وفي الطرق السريعه متمشيش في الحارات الي على اليمين او الي على الشمال لأنهم اسرع حارتين زي ما قلنا وممكن واحد يلطك.

ثانيا: متحاولش تطلع راسك من الشباك وتشتم واحد اكلك غرزة علشان ممكن تلاقي صاحبه وراه وياكلك على قفاك ، او ممكن واحد يكون برضه بيجري بسرعه وقفاك يعجبه ويحب يمسي عليه.

ثالثا: اوعى تتف على الي اكل منك غرزة لأن كل الي هينوبك ان قزاز عربيتك هيتوسخ وهتلاقيه مبطش ابيض مطرح التفافة ، والناس هتقول عليك معفن ومش هاين عليه يمسح قزاز عربيته (اكتر حاجه ممكن تسيب اثر بعد مسح قزاز العربيه هيه التفافه)

رابعا: متخانقش ابدا مع واحد واخد المزه بتاعته وبيفسحها علشان هيعملك فيها سبع السباع المفتري وممكن يعمل فيك زي ما اخيل عمل في هكتور ويربطك في اكصدام العربيه ويمشي بيك. اما لو كان سُفيف وانت متين وضامن انه مش هيعرف يعملك حاجه ممكن تاكله على قفاه مره واحده مش اكتر ، ساعتها مش هتبقى ضربته وبس انما في نفس الوقت هتبقى ذليته قدام المزه بتاعته.

خامسا: خلي بالك في مزاج عندنا احنا المصريين اننا بنحب نعرض قفانا للعربيات الي جايه في الطريق وكتير من الماره ميعرفوش ان الاسفلت ده مش معمول ليهم. فا لو انت ماشي في طريقك ولقيت اتنين واقفين بيتسايرو ممكن تزمر لو متحركوش ساعتها ممكن تعلي صوت الموتور شويه بأنك تدوس سنة بنزين لو برضه متخضوش واتحركو يبقى مفيش غير الطريقة التالته وهيه انك تخلي العجل يلف حوالين نفسه (يفوُت او يفحط) ساعتها ممكن تلاقي الاتنين اخدو بعض بالحضن واتنفضو بعيد عن الطريق (بس خلي بالك لا العربيه تفلت منك وتخبطلك واحد فيهم ، هوه يستاهل بس هتجيب لنفسك مصيبه)

سادسا: لو واحد عايز يطلع من على يمينك علشان يدخل يقفل عليك او ياخد دورك متوسعلوش الطريق وبعد ما تقفل عليه قول مليش مزاج اعديك (الحركة دي بتحرق الدم جدا)

لو عندك نصائح تانيه للتعامل مع الطريق ممكن تبعتها كتعليق علشان الاستفاده تعم.

تعليق واحد بس