اتوبيس نمره خمسه والشارع زحام
محدش فينا مركبش في الاتوبيس ، ممكن كتير مننا كان بيتعفف انه يتشعبط في الاتوبيس ويتحشر في وسط الزحمة بس اكيد كلنا ركبا الاتوبيس سواء كان فاضي او كان زحمة.
ببساطه الاتوبيس للي ميعرفوش وسيله مواصلات ممكن تروح بيها اي حته في اي مكان ، وهوه القاسم المشترك بين اي شاب في اي حته. وطبعا الاسعار المحدده في متناول ايدي المواطن الكحيان والغني البخيل على حد سواء. بس التركيز هنا مش هيكون على شكل الاتوبيس ولا على الخط الي شغال فيه ، انا هتكلم عن كل حاجه في الاتوبيس بشكل عام.
انواع الاتوبيسات وعددهم في الخط الواحد
الاتوبيسات انواع متقسمه على حسب المناطق (شعبيه او راقيه) وعلى حسب طول الخط (خطه صغير ولا طويل) وكمان على حسب حاجة الناس ليه (يعني علبة سردين متنقله ولا هيبقى بيهوي علشان محدش عايز يروح المكان الي هوه رايحه).
ملاحظه: الاتوبيسات متقسمه على حسب الحجم زيها زي الجيبات بتاعت البنات (جيب الي هيه الاتوبيسات الكبيره وميني جيب الي هيه الميني باص وميكروجيب الي هيه الميكروباصات والاخيره دي مش مجال كلامنا في الموضوع ده)
اولا الاتوبيسات الكبيره: الاتوبيسات دي مخصصه لنقل اكبر عدد من البني ادمين لنقط ضغط الزحام فيها كبير جدا زي رمسيس مثلا ممكن تلاقي اتوبيس بيلف القاهره كلها علشان في الاخر يرسى في موقف رمسيس الي عن طريقه ممكن تروح اي حته في العالم.
شكل الاتوبيس: غالبا الاتوبيسات دي بتبقى متهالكه وبتطلع دخان اسود انما لو الاتوبيس جاي من منطقه راقيه شويه هتلاقيه انضف حبتين علشان جاي من نقطه نضيفه تعكس مدى الاهتمام بالمنطقه دي.
الاجره: غالبا ما بتبقى الاجره للاتوبيسات دي رخيصه جدا لأن الي بيركبها في الغالب من الطبقه العامله الي اصلا مش لاقيه تاكل والمشوار طويل جدا عليها لو اتاخد مشي.
ثانيا الميني باص: ودي اضغر شويه من الاتوبيس الكبير وطبعا الحجم الصغير ده علشان مفيش ناس كتير محتاجه انها تروح المنطقه دي تحديدا. وفي الغالب بتبقى عايزه تروح المنطقه دي علشان تغير من هناك وتاخد الاتوبيس الكبير الي هيوديها الحته الي همه عايزين يروحوها.
شكل الاتوبيس: غالبا الاتوبيسات دي بتبقى متهالكه مش بنفس الدرجة الي الاتوبيسات الكبيره فيها بس برضه متهالكه وتلاقي نفسك غرقان في عرقك في نص شهر يناير واول ما تنزل تاخد لفحة برد.
الاجره: نظرا للعدد الصغير الي هيتنقل في المره الواحده في الاتوبيس لازم الاجره تكون اعلى شويه من اجرة الاتوبيس الكبير. معنى كده ان الميني باص اجرته اعلى شويه من اجرة الاتوبيس الكبير.
ثالثا الاتوبيسات الراقيه والمكيفه: جرت العاده على تسمية الاتوبيسات دي (CTA) علشان الاسم يبقى مطابق لشباب الجامعه الي غالبا ما بيركبوه. معنى كده ان الاتوبيسات دي مخصصه علشان خطها يعدي على الجامعات والمعاهد الي الطلبه بيدرسو فيها. وطبعا الاتوبيسات دي بتبقى مكيفه وحلوه ومش مسموح ان واحد يتحشر فيها او يقف علشان ينزل المحطه.
شكل الاتوبيس: انضف كتير من شكل الاتوبيس العادي والميني باص وهتلاقي شكله جرم كده ويفرح القلب ويحسسك بالتحضر يمكن علشان مرتادي الاتوبيس ده من الطبقه الهاي كلاس الي عايزين يروحو كلياتهم من غير ما هدومهم تتبهدل.
الاجره: اجرة الاتوبيس ده غاليه شويه بس نظرا لفخامة الاتوبيس ده فعلا الاجره دي ممكن تكون قليله على المتعه الي هتلاقيها جواه. كأنك اخدت تاكسي ضمنت تقعد وكمان ضمنت التوصيله ، بغض النظر على انه هيلف بيك الكره الارضيه بس هتتفسح وانت مرتاح ومتكيف.
المحطات الرسميه:
كل اتوبيس ليه خط سير محدد المفروض انه ميزوغش منه والا ليلته هتبقى ملهاش لون (الا اذا كان الطريق زحمة وأخد طرق مختصره). وكل سواق بيتشبت بالطريق المرسوم ليه والمفروض انه يوصله في ساعه محدده ميتأخرش عنها ، بس نظرا لزحمة الشوارع والاشارات المروريه مفيش مانع انه يتأخر من نص ساعه لـساعتين عن معاده ومحدش يقدر يقوله حاجه. نفهم من كده ان الاتوبيس ليه خط سير محدد ومحطات محدده يقف فيها وبيقف فيها في وقت محدد وطبعا كل ده مبيحصلش لأنك لو واقف في نقطه مش في خط الاتوبيس وشاورتله ممكن يقفلك وطبعا ده اعتمادا على شكلك لو انت شكلك مطحون وقرفان من الشمس هيقفلك ولو انت شاب فانكي من الشباب الي استبدلو شعرهم بقرون الاستشعار مش هيقفلك. وبرضه الاتوبيس بيقف للناس على حسب نوعه يعني لو الاتوبيس من نوع الـ(CTA) لو انت شاورتله وكان فاضي هيقفلك انما لو مليان مش هيرضى يزحم الاتوبيس بتاعه.
عادات وتقاليد مشهوره في الاتوبيسات:
جرت العاده عندنا في مصر على وجود شويه حاجات في كل اتوبيسات مصر ولو ركبت اتوبيس مفيهوش الحاجات دي هتعرف ان الاتوبيس ده جديد ومبقالوش في الخط ده يومين تلاته. والنقط التاليه هتوضح بعض النقط دي
- الرسومات والقلوب الي هتلاقيها مرسومه على كراسي الاتوبيس: في اي اتوبيس لازم تلاقي قلوب مرسومه وعبارات حب ملتهبه ، بمعنى ان ممكن من كام يوم او شهر قبل ما سيادتك تركب تلاقي واحد راكب مع المزه بتاعته وعايز يثبتلها انه بيحبها يروح مطلع القلم البيك (او القلم الفرنساوي) وراسم قلب وفيه سهم وبيخر دم وكاتب اسمه واسمها قال يعني انه مش خايف يعبر عن حبه ليها. وطبعا بالشكل ده اثبت للناس كلها انه بيحب المزه دي بأماره ما انت ركبت وعرفت انه بيحبها.
- الذكريات الخالده (طريقة تخليد الذكرى على كرسي الاتوبيس): اول حاجه لازم نعرف ان الشعب المصري من ايام الفراعنه وهوه غاوي تخليد للذكريات بداية من نحت الاسماء على الحيطان والشجر والطريقه الجديده دي ظهرت وانتشرت طبعا مع انتشار الاتوبيس الا وهيه تخليد الذكرى الاتوبيسيه ، ودي عباره عن ان شلة شباب رايحين مكان (وطبعا فاضيين) فا يروحو مخلدين الذكرى على كرسي الاتوبيس علشان الناس تعرف انهم ركبو الاتوبيس ده قبل كده (بالظبط زي ما واحد بيطلع جبل عالى ويحط رايه علشان الناس تعرف انه طلع الجبل ده قبل كده). وطبعا كولومبس الي كتب الذكرى دي مش بيحط في باله ان اكيد في ناس سبقته في اكتشاف الاتوبيس ده بس مخلدتش الذكرى ولا بيحط في باله انه بالشكل ده هيبقى بني ادم معفن ومش متحضر.
- الوقوف في الاتوبيس: عادة الوقوف في الاتوبيس دي عاده ظريفه جدا وبدأت مع الانفجار السكاني مع الزحام وزيادة عدد مستخدمي الاتوبيس. وباختصار العاده دي بتظهر جليا لما الاتوبيس يبقى مليان (مفيش كرسي فاضي) وتلاقي الناس واقفه ومتشعلقه في القضيب الي في سقف الاتوبيس. وبرضه الناس الي في المحطه تركب. بصراحه الناس برضه معذوره علشان مفيش مكان في الاتوبيس وفي نفس الوقت لازم يركبو الاتوبيس لأنهم مش عارفين الاتوبيس الجاي هيوصل امتى وكمان مش هيبقو عارفين هوه هيوصل فاضي ولا ازحم من الاتوبيس ده ، طبعا كل ده اعتمادا على المثل الي بيقول اتوبيس في اليد خير من الف في الطريق ، وساعات بيبقو واقفين بقالهم فتره (ساعه مثلا) ومبيصدقو يلاقو او حاجه بسقف تحميهم من الشمس والحر والقرف.
- الزنقه والحشر والشعبطه:في نكته قديمه بتقول (طويل واحمر وبينزل) وطبعا كلنا عارفين حلها وهوه الاتوبيس (متستغربش زمان الاتوبيس كان بيتدهن احمر) ودي بقى ظاهره مش موجوده غير في بلدين في الدنيا كلها مصر والهند. في الدنيا كلها الناس ممكن تقف في الاتوبيس علشان تروح مشاويرها بس الي مش موجود غير في مصر والهند هوه ان الناس تتحشر في الاتوبيس وتلاقي الاتوبيس مايل ناحية اليمين من كتر الناس المتشعبطه في الباب وعلشان تركب الاتوبيس ده لازم تقتحم الزحمة (زي اعلان راني بالحبيبات ، تلاقي نفسك في وسط اكوام اللحم) وتدخل الاتوبيس لعل وعسى تلاقيلك مكان حته 3 او 4 سنتيمتر علشان تمسك بأيد واحده.
- ماساة النزول في محطتك: في عز الزحمه وعز الحر داخل حجرة الظغط الي بيطلقو عليها الاتوبيس صعب جدا انك تلاقيلك مكان تقدر تشوف الدنيا الي بره منه على الاقل علشان تعرف انت المفروض تنزل ولا لأ. بس الاسوأ من كده انك تلاقي نفسك في المحطه الي المفروض تنزل فيها وفي نفس الوقت انت في نص العربيه بالظبط لا هتعرف تنزل من الباب الي ورا ولا من الباب الي قدام ، لو اول مره تركب الاتوبيس ده ممكن يجيلك هيستيريا (عادي جدا العلماء اطلقو على النوع ده من الهستيريا بأسم هيستيريا الاتوبيس) وتلاقي نفسك عامل زي جرندايزر وعمال بتزيح الناس يمين وشمال املا انك تلحق تنزل قبل ما الاتوبيس يتحرك تاني وخصوصا لو السواق كان غتيت وممكن ميقفش بعدها بكام متر علشان ينزلك.
خصائص سواقين الاتوبيس
سواق الاتوبيس ليه خصائص لازم تكون فيه علشان يبقى مؤهل انه يسوق اتوبيس عام في بلدنا ولو الخصائص دي مش فيه هيكتسبها من اول يوم يسوق فيه والخصائص دي يا اما صفات بيعملها يا اما كلام بيقوله وكلنا حفظناه ولو اي حد فينا اشتغل سواق اتوبيس لازم احنا برضه هنقوله.
1- الوقوف بعد المحطه بـ10 متر: معظم سواقين الاتوبيس لما بيجي يقف في المحطه بتاعته هتلاحظ انهم بيقفو بعدها بحوالي 10 او 20 متر ، في الغالب السلوك ده اكتسبوه علشان يتجنبو الاندفاع البشري في ركوب الاتوبيس والي فيه صحه بس هوه الي هيقدر يلحق يركب الاتوبيس قبل ما يتحرك. لأنك لازم هتجري شويه قبل ما تركب الاتوبيس (لو مشيت ومجرتش هيمشي ويسيبك).
2- كلمة العربيه فاضيه جوه: الكلمه دي مشهوره جدا وطبعا سواق الاتوبيس بيقولها لما يلاقي الناس واقفه على دماغه ومش عارف يسوق منها فا بيقول العربيه فاضيه جوه علشان الناس تتحشر بعيد عنه فا يعرف يسوق براحته ، مع العلم ان العربيه الي فاضيه الي بيقول عليها اصلا مفيش مكان في الارض لرجل علشان تتحط فيها فما بالك ببني ادم او عيل صغير. بس متقلقش انت لو دخلت اتوبيس زحمه هتدخل جوه بقوة الدفع. (اتنين بس هما الي بيركبو الاتوبيس وبيرتاحو في الوصول السواق والكمساري)
3- الوقوف العجيب (في نص الشارع او على النواصي): سواقين الاتوبيسات عندنا عنهدم عاده غريبه جدا وهيه انهم مصرح ليهم انهم يقفو في اي حته.
أ) في نص الشارع: ممكن لو انت سايق عربيتك او راكب التاكوس تلاقي اتوبيس واقف في نص الشارع وبينزل ناس او بيركب ناس تانيه عادي جدا كل الي عليك انك تكون حذر وانت بتعدي لأنه زي ما وقف في نص الشارع مع نفسه هتلاقيه كسر الدركسيون اخر الشمال وطلع بورب ناحيه الشمال وقفل الشارع تماما علشان بسلامته يعدي مع ان الطريق اصلا مفتوح قدامه واصلا هوه واقف في نص الشارع يعني مش عايز مساحه يطلع منها انما تعمل ايه بقى ، خليك حذر وخلاص.
ب) الوقوف على الناصيه اليمين: في وسط زحمة الشوارع والاشاره واقفه والدنيا حر وتلاقي الاتوبيس بكل هدوء وقف على يمين الشارع وناس نزلت وغيرها يطلع ولما يتحرك تكتشف انه اصلا داخل شمال (طريقه لازم يروح شمال) وطبعا هيقفل الشارع تماما علشان يعدي وتلاقي نفسك مضطر انك تستناه لما يعدي ومش مشكله لو الاشاره قفلت عليك تاني واستنيت الدور الجاي ، بس اهم حاجه انك تدعي ميجيش اتوبيس تاني يقف على اليمين لأن بالشكل ده هتفضل واقف كتير.
نصائح عامه لركوب الاتوبيس:
ركوب الاتوبيس مغامره محفوفه بالمخاطر اغلبها بيكون في وقت الركوب ووقت النزول وخصوصا لو الدنيا زحمه والاسوأ لو كان السواق مش صبور (اغلب السواقين مش صبور نظرا للي بيشوفوه طول النهار)
اولا لو رايح انترفيو متركبش اتوبيس: لو عندك معاد مهم ولازم تبقى لابس كويس فيه يستحسن متركبش الاتوبيس نظرا للبهدله الي هتشوفها. وحتى لو الاتوبيس فاضي وسيادتك قاعد في كرسيين ممكن تقوم من هنا تلاقي نفسك متعاص جله من الشخص الي كان راكب قبلك ، طبعا ده غير الرياضه الي مش في الحسبان الي هتعملها بالاجبار وانت طالع علشان تجري ورا الاتوبيس والي هتعملها وانت نازل علشان السواق بسلامته فتح الباب ونزلك والاتوبيس لسه ماشي.
ثانيا لو الاتوبيس زحمه اسنتى الي بعده: لازم يكون لينا نظره متفائله في الاتوبيس ، يعني لو جه الاتوبيس بتاعك ولقيته زحمه جدا (بتعرف كمية الزحمه من عدد الناس الي على الباب) متركبوش استنى شويه (نص ساعه لساعه) واركب الاتوبيس الي بعده او اركب ميكروباص اسرع واكرم
ثاثا لو معاك فلوس كتير متركبش الاتوبيس: لو انت لسه قابض مرتبك اوعى تفكر انك تركب الاتوبيس الا اذا كنت رابط محفظتك بجنزير لأن النشالين مش هيعتقوك ممكن ينشلو منك الفانله الداخليه ولو داخل بشنطه ممكن تلاقي نفسك نازل من الاتوبيس بالايد الي انت ماسك ومتبت فيها. لو الاتوبيس فاضي مفيش مانع انك تطلعه مادمت هتركب ومش هتقف وضهرك للناس.
رابعا لما تركب الاتوبيس فاضي: لو ركبت الاتوبيس وكان فاضي اركب في اي كرسي بس خليك في المكان الي جنب الشباك لأنك لو ركبت في الكرسي الي على الممر هتتعب يا بدنيا يا نفسيا. هتتعب بدنيا لأن لو الاتوبيس اتزحم هتلاقي ناس كتير جدا بتخبط فيك (الي رايح والي جاي بمعنى اصح). وهتتعب نفسيا لأنك ممكن تشوف واحده معاها 3 عيال اتنين في ايديها وواحد على كتفها وبتبصلك بصه معناها قوم علشان اقعد انا شويه ، ذوقيا لازم تقوم لأن فيك صحه عنها. فا هتبقى محشور في النص بين تأنيب الضمير وفي نفس الوقت التعب البدني الي مستنيك لو وقفت. ريح دماغك واركب في الكرسي البعيد عن الممر.
خامسا البنات والاتوبيس: النصائح كتير جدا للبنات في ركوب الاتوبيس ده طبعا بالاضافه للنصائح الي اتقالت قبل كده. اوعي تركبي الاتوبيس وهوه زحمه حتى لو كان ده اخر اتوبيس في الدنيا ، لأن بكل بساطه ممكن حاجات كتير تحصل بداية من ان الناس هتتحشر فيكي ومش هتبقي طايقه نفسك مرورا بأنك هتعاني من الطلوع والنزول من الاتوبيس الي محتاج شاب رياضي بيلعب كمال اجسام وفي الاخر لما هتنزلي هتلاقي سوستة شنطتك مفتوحه وانتي اتنشلتي (نشل شنط البنات اسهل من نشل جيوب الرجال)
اهم حاجه
لازم نبقى شباب متحضر ولما نشوف بنت او واحده كبيره في السن يستحسن لننا نقوم علشان يقعدو همه. في المقام الاول وفي قرارة نفسنا لازم نعرف ان الجنس اللطيف ميستحملش البهدله ، احنا ممكن نستحملها. متحطش في دماغك كلمة هيه ايه الي خلاها تركب من اصله لأن ممكن تكون دي الوسيله الوحيده ليها للوصول للمكان الي هيه عايزاه فا مضطره تركب الاتوبيس.
|
100 100