عربيات كارو كرباج ورا ياصطى
كاء كاء كاء ، شييييي يا حمار إييييييس ، سمعنا الكلام ده في حتت كتير شويه في الافلام وشويه في الواقع وطبعا كلنا شفنا عبدالمنعم مدبولي في فيلم مولد يا دنيا ، كان عربجي اصيل والحصان الي كان اسمه عنتر كان حصان نضيف بيستحمى كل يوم. دلوقتي الحال اختلف العربجيه بقو انواع من كل شكل ولون وليهم انواع واختصاصات منهم الي ماشي بحمار ومنهم الي معاه بغل ومنهم الي راكب المرسيدس وطبعا دي العربيات الي بيجرها احصنه ولا يخفى علينا الليموزين (الحناطير).
تصنيف العربيات الكارو حسب السعر وحسب الاستخدام
تصنيف العربيات الكارو عامل زي تصنيف العربيات الملاكي بالظبط ، معتمدة على السي سي ، وعدد الركاب والاستخدام برضه
العربيات الصغيره ، عربيات بتوع الزباله:
طبعا انت لو ساكن في اي حته في قاهرة المعز او غيرها هتلاقي عربيات كارو للزباله وطبعا هتلاقي السواق اقل ما يقال عنه انه مش نضيف (من شكل شعره ومن لون بشرته) وساعات بيبقى عيل صغير ، لو تلاحظ ان العربيات دي معظمها بيجرها حمير صغيره (جحش يعني) وارتفاعها حوالي تلاته لأربعه متر
اماكن توجدهم: قدام صناديق الزباله الموجوده تحت اي عماره ولو في اي خرابه هتلاقيه كأنه لقى كنز وبيبقى عامل زي على بابا لما فتح المغاره
لو شفتهم تعمل ايه: لو انت ماشي في عربيه هتلاحظ ان العربيات دي ماشيه في نص الشارع وحتى لو واقف برضه هتلاقيه واقف في نص الشارع. نصيحة متزمرلوش علشان ممكن يبقى غلس ويفضل ماشي في نص الشارع او واقف وينفضلك اخر تنفيض ولو هوه محترم ممكن يشوحلك بأيده ويعديك بس في معظمهم الاوقات لازم تمشي وراهم وتعملهم حساب (يعني الراجل يعملك ايه هيقطع نفسه ، ثم انت كل ما هتزمر اكتر كل ما الراجل هيضرب الحمار اكتر علشان يمشي اسرع بالذمة مش حرام عليك الحمار)
العربيات المتوسطة ، عربيات الخضار الي بتشوفها قدام الجامع يوم الجمعه
العربيات دي اكبر شويتين من العربيات الصغيره وساعات بيجرها احصنه او حمير مكتملة النمو ، نقدر نقول دي الفئة المتوسطة من العربيات الكارو وصحابها بيبقو خليط بين العربجيه وبين اصحاب المهنه (خضري مثلا) الناس دي بتبقى انضف حبه من بتوع الزباله بس في الاخر برضه عربجيه.
اماكن تواجدهم: امام الجوامع يوم الجمعه ، وممكن تلاقيه ساعت الصبحيه واقف على ناصية اي شارع بيبيع الخضار.
لو شفتهم تعمل ايه:
- ساعات ممكن تلاقيهم راكنين مكان عربيتك مش لازم تتخانق معاه اعمل نفس الي هتعمله لو لقيت واحد راكن مكانك يعني الراجل هيعملك ايه ما هيه دي الحته الضل الوحيده الي الراجل لقاها.
- يوم الجمعه بعد الصلاة مباشرة لو لقيت الراجل جارر الحمار وداخل في الزحمة علشان يحجز مكان قريب من الناس الي طالعه ، حاول انك تعرفه غلطه بطريقة لطيفة (متخفش مش هيقدر يبلطج عليك لأنك واقف في وسط ناس وممكن يتلمو عليه يطحنوه)
العربيات الفارهة (الحناطير):
دي بقى انضف فئة من العربيات الكارو ، هوه بصراحة تصنيفها مش كارو لسببين الاول انها بتنقل بني ادمين والكارو بتنقل كل حاجه ماعدا البني ادمين (ممكن يتنقل فيها عفش البني ادمين زي فيلم كراكون في الشارع) والسبب التاني ان الكارو مش بالضروره يجرها حصان انما الحنطور لازم يجره حصان او اتنين (طبعا ده بيفرق في السي سي).
اماكن توجدهم: في المناطق السياحيه ، علشان بلدنا بلاد سواح لازم نفسحهم في الحناطير وللأسف دي الحاجه الوحيده الي بيفتكروها عن مصر لما بيروحو بلادهم (الحناطير والحصنة) لذلك في كل الافلام الاجنبية فاكرينا لسه مبنركبش عربيات وشغالين على الكاور والحناطير والجنيه الجبس الي عليه صورة اخناتون وتحتمس.
لو شفتهم تعمل ايه: طبعا اساسي هتشوفهم في الكورنيش وقريب من الاهرامات ، بس متقلقش الناس دي مسالمة جدا وبتحافظ على الشكل الحضاري هتلاقيهم ماشيين على جنب الشارع (غالبا الجنب اليمين) ولو عديت من جنب الحنطور يستحسن تقفل شباك عربيتك علشان الحصان ممكن ينفرلك نفره تدخلك من الشباك تلاقي ريحة العربية بقت بكابورت.
نصائح عامه للتعامل مع الكارو ( باستثناء الحناطير)
اولا: لو شفتهم راكنين الكارو في وسط الشارع اوعى تأنبهم او تحاول تحتك معاهم دول عربجيه (لما بتحب تشتم واحد بتقوله يا عربجي فما بالك لو كان عربجي اصلا بقى)
ثانيا: لو الكارو ماشي على مهله في نص الشارع حاول تمشي وراه بدون ما تزعجه علشان ممكن يعاند ويفضل ماشي على مهله وطبعا انت مش هيجيلك الجرأة انك تخبطه ، على الاقل لما تمشي وراه هتاخد حسنات ان الحمار ما اتضربش اكتر علشان يمشي اسرع وغير كده ممكن تصعب على العربجي الي سايق الكارو فا يعديك.
ثالثا: خلي بالك من نفير الحمار او الحصان لأنه بيسبب نوع من الحساسيه (السنطة) فا منعا لأنتشار الامراض ابعد عن الحمير او الحصنة عموما الواحد مش ناقص.
رابعا: ابعد كل البعد عن عربيات الزباله الكارو ولو لقيتها ماشيه في شارع خد اي شارع تاني لعدة اسباب اولها الريحة الوحشة الي هتدخل جوه نخاشيشك ، مرورا بالامراض بسبب الزباله ، ونهاية بأنك هتتعطل على مصالحك بسبب برود العربجي. لو مضطر انك تعدي من جنبه اقفل الشباك بتاع العربيه او لو ماشي على رجليك عدي الناحيه التانيه علشان على الاقل الدبان ميضايقكش.
على اي حال من الاحوال الكارو دي ظاهره مصريه بحته معتقدش اني هشوفها في اي حته في العالم اتمنى انها تزول مع مرور الزمن ويتم استبدالها بالعربيات النقل الصغيره (السوزوكي)
|
