تاكس

تاكس….. المعادي ياصطى

حوار بنسمعه كل يوم والزبون بيتحايل مع سواق التاكس علشان يوديه مكان عايز يروحه وطبعا لما الزبون بيركب بيبقى عارف ان ده كان الجزء السهل في الموضوع وخصوصا لو رايح مشوار طويل انما الجزء الصعب في الموضوع انه بيفكر السواق هياخد منه كام والتفكير بيبقى اعمق لو كان شكل السواق شضلي ومن ارباب السوابق.

لأ هات كمان اتنين جنيه زياده:

طبعا السيناريو ده حصل معانا كلنا اول ما نركب التاكوس ونلاقي السواق مشغل اغاني شعبيه (زي الي بتيجي في ميلودي تتحدى الملل) وبيهز راسه ويبدأ الحوارات اياها واول ما نوصل المكان الي احنا عايزينه ونديه الي فيه القسمة يقولك لأ كده مينفعش هات اتنين جنيه كمان (نظام الفصال العالمي الي مش موجود غير في مصر)

حاجه غريبه طمعان في اتنين جنيه زياده مع انك لو اديته الاجرة اقل اتنين جنيه هيقولك برضه هات اتنين جنيه مع انه المفروض يطلب 4 (اقصى طموحاته انه ياخد 2 جنيه وخلاص) وممكن تقعدو تتخانقو مع بعض وانت تتحامى في شباب الشارع صحابك والسواق يطلع الاسلحة المخفيه الي حاططها معاه في العربية (بازوكا على كام كلاشينكوف) وتبقى مجزرة الاتنين جنيه.

النصيحة: دايما ادي سواق التاكس الاجرة اقل اتنين جنيه من الي انت عايز تديهوله ، لو بلطج معاك ارميهم ليه لو شكر ومقلش حاجه اديله الاتنين جنيه الزياده او سيبهم مرمين على الكرسي بعد ما تنزل.

الاتفاق احسن في المشاوير الطويله:

لو انت مشوارك طويل (فيما يزيد اجره عن 10 جنيه) لازم تسأل السواق هتاخد كام علشان العقد شريعة المتعاقدين هوه ساعات بيبقى في سواقين عيال وبيتذرعو ان السكه كانت زحمة يا بيه ، وفي نوع تاني بتلاقي شكل الحوار بينك وبينه بيبقى عن غلاء الاسعار وانه عنده 8 عيال وعايشين في اوضه واحده وتحس انه عايش في فيلم حين ميسره (بيحاول انه يقنعك انك لما تدفع اكتر هتكسب ثواب اكتر). في الحاله دي انت وذوقك لو عايز تديله اكتر. انما الي يقولك السكه كانت زحمة يا بيه والبنزين غلي قوله انا اتفقت معاك.

النصيحة: حاول متفتحش اي حوار مع سواق التاكس اديله الوش الخشب ولو كلمك رد عليه بكلمة او اتنين بالكتير (زي ما بتشوف في اعلان ميلودي تتحدى الملل) علشان متفتحلوش اي سكه يشتكيلك منها ، ما انت راخر قرفان من عيشتك ثم كمان المفروض العربيه تكون مكيفة.

سواقين رغايين:

معظم السواقين في مصر رغايين اول ما تركب معاه هتلاقيه فتح اي موضوع لو لقى منك اي استجابة هيسترسل في الكلام والشكوى ولو تلاحظ كلامة هتلاقيه بيكلمك كأنك واحد صاحبه ، لو كان في ماتش شغال قبلها بيوم هيقولك شوفت الكورة بتاعت متعب وضيعها ، والاهلي حديد وبعد ما يخلص نص كلامة هتلاقيه سألك انت اهلاوي ولا زملكاوي في الحالة دي يستحسن تكون مع نفس الفريق الي هوه بيشجعه علشان ميشتغلكش بقية الطريق وممكن تلاقيه نزلك بعد المكان الي انت عايزه بعشره متر (انت الي جبته لنفسك ، مش انت الي اديته استجابة).

النصيحة: الوش الخشب

كيس جوافه:

ساعات وانت راكب التاكوس بتبقى كيس جوافه قاعد ولا ليك اي لزمة ممكن تلاقي واحد بيشاور للتاكسي وانت قاعد ملكش لزمة ويقول للسواق على اي حته تانيه مش في طريقك اصلا لو السواق نفضله ومشي في الحاله دي انت لسه محتفظ بحبه من بكرامتك انما لو ركبه هتحس ان في ودنين طلعولك جداد عليك ، وممكن في بعض الاحيان تلاقي سواق التاكس بيقول للراجل الي هيركب زيح الكيس الي على جنب ده (ده لو انت موسعتش من نفسك). من الاخر معظم سواقين التاكس بيحقدوا على سواقين الميكروباظ وعايزين يعملو زيهم او ساعات بيبقو سواقين ميكروباص اصلا. (واحد جيزه واحد جيزة)

النصيحة: لو السواق عمل معاك كده اديله اجرته ناقصه جنيه او اتنين ولو فتح بقه معاك قله انت اخرتني ولفيت بيا خمسين شارع. ممكن يبلطج عليك طبعا فا لازم الاول تبص لشكل سواق التاكس لو شضلي يبقى اشتري نفسك بالجنيه ولا الاتنين دول.

السواقين بيفضلو الطرق الاطول والاكثر ازدحاما

طبعا ، حقهم ، في اعتقاد سائد عند سواقين التاكس انهم لازم يفسحو الزبون في مصر قبل ما يوصلوه ، يعني لو انت رايح اخر الشارع عادي هتشاور للسواق وتقوله اخر الشارع ياسطى هيشاورلك علشان تركب لما هتركب هتلاقيه بدأ ياخد تخريمات عجبة علشان يتفادى الزحمة لحد دلوقتي الراجل ذوق ومحترم لأنه مهتم لمصالحك الشخصيه ومش عايز يأخرك (ده الي ممكن انت تفهمه لو انت مش عارف السكه من الطرق الداخليه) الوجه السيئ في القصه ان التخريمات دي دايما بتبقى ازحم من الشوارع الرئيسيه ، وهتلاقي السواق زعلان ومتضايق وعمال يقول ويحكي عن البلد الي كل حته فيها زحمة. نيجي بقى للشكل الصحيح للقصة

سواقين التاكس معظمهم عارف الطرق كويس جدا وغالبا ما بيبقو متقسمين مناطق (زي بتوع الميكروباظ) فا دايما عارفين الطرق الفاضيه وبيتجنبوها وعارفين برضه الطرق المزدحمة وبيحبو يمشو فيها (غاويين عذاب نفسي)

النصيحة:

أول خطوة: حط في دماغك لو لقيت السواق بدأ يفسحك في الشوارع ويلف بيك قله اطلع على الشارع الرئيسي هيقولك ماهو زحمة يا بيه رد عليه فورا وقوله يعني هوه انت الي ماشي في الدائري.

تاني خطوة: اوعى تديله قرش زياده على الفسحة دي لو عملك فيها قرد وقعد يرقص متديلوش مليم لأنه من الاول عارف ان الطرق كلها هتبقى زحمة. ولو قالك ماهو الشارع التاني كان برضه زحمة رد عليه فورا وقوله مليش فيه انا بركبها كل مره بكده ، وامشي وسيبه قفاه يقمر عيش واستمتع بأنك اخدت حقك لأول مره.  

تاكس تايه يا ولاد الحلال

تخيل انك جيت تركب تاكس وعايز تروح حته انت مش عارف هيه فين بالظبط (أمرك لله السواق هيستغلك هيستغلك) اوعى ثم اوعى تركب مع سواق مش عارف الطريق هتكره نفسك وهتكره المكان الي انت رايحه وهتكره الشخص الي انت رايحله لأن الي هيحصل ان السواق هيقعد يسأل في الناس وطبعا عندنا في مصر صعب تلاقي واحد يقولك معرفش (لازم هيفتولك) وتبص تلاقي نفسك بدال ما تروح الهرم تروح مجاهل بولاق الدكرور ومنها تروح مدينة نصر ومن هناك تاخد كوبري اكتوبر الي هيوديك الدقي. لازم تسأل سواق التاكس على المكان الي انت عايز تروحه بالظبط (يعرفه ولا لأ) يعني على سبيل المثال لو انت عايز تروح شارع عباس العقاد وانت في المعادي تقول لسواق التاكس شارع عباس العقاد هيسألك فين قوله في مدينة نصر لو قالك اركب يبقى قشطه لو سألك عارف المكان قله لأ (خليك صريح لو مش عارف المكان قول مش عارفه) هيمشي اكيد بعد كده هيجيلك واحد عارف المكان بالظبط ، الا اذا كنت عارف المكان ودي حاله تانيه (ممكن تركب مع حد مش عارف الطريق) ساعتها انت هتبقى الخريطة بتاعته والعقل المدبر الي بيمشي العربيه وهوه مجرد انسان الى بيسوق العربيه بدالك.

النصيحة: لو انت مش عارف المكان تحديدا لازم تتأكد ان السواق عارف المكان بأنك تقول اسم المكان الي انت عايز تروحله بالظبط مش مجرد اسم الحي او المنطقة لو سألك عن المنطقة يبقى كده في امل لو قالك لأ يبقى ميعرفش واحسن انك مركبتش معاه.

نصائح للبنات في التعامل مع التاكس:

معظم او كل البنات بتتعامل مع التاكس التعامل الصحيح ، بيشاورو بهدوء ويقولو همه عايزين يروحو فين الضروري في الموضوع انك لازم تركبي ورا في الكرسي الي على اليمين تحديدا لعدة اسباب :

1-     السواق مش هيشوفك كويس في المرايا (الا اذا كان مركب مرايا بانوراما – الي طولها متر)

2-     مش هتسيبي اي فرصة لأي مجموعة انها تركب معاكي في التاكس وبكده هتتجنبي المعاكسات

3-     لو واحد ركب قدام مش مشكله كده كده مش هيبقى شايفك

4-     حاولي على قد ما تقدري متتكلميش في الموبايل علشان المكالمة دي مبقتش مكالمة شخصيه خلاص بقت حاجه عامه.

5-     لما توصلي المكان الي انتي عايزاه لازم تكوني مجهزة فلوس الاجرة في ايدك وتديها للسواق بأسرع ما يمكن وقبل ما يفكر يعد الفلوس تكوني نزلتي من العربيه. ونفضيله لو حاول يتكلم معاكي متخافيش مش هيقدر يقولك تلت التلاته كام (هوه مستغني عن عمره – الناس في مصر بتحب تخدم في الحاجات دي قوي قوي)

6-     لو ركبتي تاكس باليل حاولي تكتبي رقم العربيه وتبعتيه SMS لأي حد من معارفك علشان لو لا قدر الله حصل اي حاجه رقم العربيه يبقى مع حد وتبقى سيبتي دليل والاحسن من كده ان اي حد يوصلك او ياخد رقم العربيه ويخلي السواق يشوفه وهوه بياخد الرقم.

نصائح عامه لركوب التاكوس

اولا: احذر نوعين من العربيات (البيجو ال504 والعربيات الجديده) لأن العربيه البيجو بتاكل بنزين ولو ركبت مع صاحبها اول ما تديله الاجره هيقولك البنزين والزيت والبرسيم فا اشتري دماغك ، ومشكلة العربيات الجديده ان بيبقى عليها اقساط وصاحب العربيه لو عليه عايز يجيب القسط الشهري من اجرتك انت بس ، فا على ايه اركب في عربيه كحيانه علشان تدفع الاجرة الي انت عايزها (هوه انت عايز توصل ولا تتعايق)

ثانيا: حاولو تبصو في وش سواق التاكوس قبل ما تركبو ، لو شكله شضلي يستحسن ماتشاوروش من اصله لأنه هيستغل ملامح وشه في الضغط عليكم وساعات بيبقو مخبيين سنج واسلحة تحت رجليهم.

ثالثا: لما بيحصل اختلاف في الاجرة ساعات السواقين بيحكمو سواقين تاكس زيهم سيبك منهم وقوله نحكم الراجل الطيب ده (اختار واحد ماشي في الشارع ملوش دعوه) انما اوعى تحكم سواق تاكس عليك لأنه اكيد هيحكم لسواق التاكس مش ليك انما الشخص العادي هيكون موضوعي اكتر. واوعى ثم اوعى ثم اوعى انك تقول لسواق التاكس نروح القسم ، ممكن يخطفك ويتاويك في اي حته.

نهاية خليها على الله وعيش حياتك خدلك سيتي كاب (لو بتزهق بسرعه من الفصال)

2 تعليقات