التوك توك

ياترى سبب تسمية التوك توك ايه؟ 

يمكن علشان طول ماهو ماشي بيـ تك تك…….. ممكن!!

من اول ما التوك توك بدأ يظهر في مصر وانا كان نفسي يكون ليا تجربة معاه لحد ما لقيت توك توك راكن فا ركبته على الواقف علشان اعيش التجربة المرحة دي.

اسماء التوك توك ووصفهم

سواقين الميكروباص وسواقين النقل ومعظم الناس بتقول عليه بـيـبـبـي العربيات النقل (على اساس انه صغير جدا بالنسبة للعربيات النقل).

شكل التوك توك (زي ما بيجي من بلده) عامل زي الموتوسيكل بس بتلات عجلات وفي كنبة صغيره ورا السواق (ساعات السواق بيظبطه علشان يركب واحد جنبه ، ولو يطول يركب كنبه قدامه علشان واحد يركب على الدريكسيون).

سواقين التوك توك برنسات بطبعهم او بمعنى اصح بيعتبرو نفسم مساهمين في خدمة المجتمع (علشان مفيش تاكس بيرضى يروح مكان ما بيروحو)

خطوات تجهيز التوك توك قبل ما ينزل للطريق

التجهيز الاولي للتوك توك بيبدأ بتظبيط وأستكت وتركيب الشخاليل بعد كده يجي تظبيط النور والاشارات والنور الي بيلعب. بعد كده يجي استغلال المساحات بكل الاشكال ، المساحات دي معناها اماكن الكراسي (مش مشكله الزبون يبقى لازق في الزبون الي جنبه) المهم ان التوك توك ياخد اكبر عدد ممكن من الركاب (مش كفايه ان في تانده تضلل على قرعتهم) ، ممكن يحط كنبه كبيره تاخد اربع اشخاص وممكن يعمل زي الحنطور ويحط كنبتين قدام بعض واحده كبيره وواحده صغيره علشان تاخد خمس ركاب بدال اربعه او تلاته وساعات بيركبو كرسي جنب السواق علشان ياخد مساحة ركوب اوسع (في بعض الاحيان هتشوف عيال صغيره راكبه على الدركسيون)

تجربة التوك توك

شعور لذيذ جدا انك تحس بنفس شعور البرص او السحليه وهما ماشيين على الارض. معنى الكلام انك تقريبا بتمشي على الارض بشكل افقي شايف اسفلت الطريق تحتيك بالظبط ، معنى الكلام انك قريب جدا من الارض وتحت رجليك بالظبط فا لو اتمطعط ممكن تلمس الارض وتوقف التوك توك (يتم استخدام الطريقة دي لفرملة التوك توك لما الفرامل بتسيب)

المطبات بالنسبة للتوك توك حاجه فظيعه لو في زلطة في الطريق لازم السواق يلف من حواليها لأنها تعتبر مطب هيبوظله العفشة بتاعت توك توكه

نصائح للي عايز يجرب يركب التوك توك: متركبش التوك توك في الصيف لأن الجو بيبقى حر خلقة مش ناقصه هدومك تشرب عرقك وعرق الي راكب جنبك. نصيحة اخرى متركبش التوك توك في الاماكن الشعبيه قوي لأن السواق ممكن يركب جنبك واحده ست تخينه قوي وريحتها وحشه قوي قوي وتزنقك في مساحة 10 سنتيمتر ومتعرفش تتحرك او حتى تنزل ولو وصلت هتحتاج تروح مكان ما جيت لأن الريحة كرفت عليك خلاص يا معلم.

سواقين التوك توك

معظم سواقين التوك توك عيال صغيره ميتعداش عمرهم 16 سنه طبعا لا معاهم رخصة ولا بطاقة وممكن ممعاهمش شهادة ميلاد بمعنى اصح مش بيعرفو يحسبو المسافات ولا السرعات صح.ممكن لو انت ماشي في حاره بالعربيه بتاعتك يجيلك توك توك يزنقك ويحاول يعدي طبعا مش هيحسب المساحه صح فا هيخربشلك العربيه خربوش معتبر (هيعلم على عربيتك بمعنى اصح ، ولو وقفت وجيت تتكلم معاه هيعلم عليك انت شخصيا)

نصيحة: لو حصلك الموقف ده خد الخبطه او الخربوش وامشي احسن ما تبقى العربيه وانت مخبوطين او متعلم عليكم

سواقين التوك توك ملهمش دعوه بحاجه ، الطريق زي الرصيف الاتنين سواسيه (زي بعض يعني) ساعات تلاقيهم ماشيين في وسط الطريق ويعطلو الشارع وراهم وساعات لو الطريق زحمة بيسلكو نفسيهم ويمشو على الرصيف.

نصيحة: لو صادفك توك توك في الطريق فضيله الحاره علشان يعدي ، متقلقش مش هتمشي وراه كتير لأنه هيزوغ في وسط الزحمة ويمكن يكون اسرع من عربيتك

اماكن تواجد التوك توك (لو عايز تتفرج عليهم)

التوك توك منتشر عامة في المناطق الشعبيه والحواري الضيقة بمعنى اصح الاماكن الي مفيش تاكس هيرضى يدخلها وملهاش ميكروباصات ولا اوتوبيس في الحاله دي لازم هتركب توك توك يا اما تمشي رجليك شويه وتكمل الحته دي مشي ، انا عن نفسي شفتهم في شارع فيصل بحي الهرم وضواحي الجيزة (قالولي ان ده احسن توك توك ممكن تركبه)

نصائح عامه لو اضطرتك الظروف وركبت توك توك

اولا: لو المسافه قريبه وانت مكسل تتمشى يستحسن تعصر على نفسك لمونتين وتستجمع كل قواك وتمشي اكرملك ولو ركبته يبقى انت الي جبته لنفسك.

ثانيا: لو ركبت التوك توك ادفع تمن المكان بتاعك والمكان الي جنبك علشان محدش يزنقك في الكورنر

ثالثا: خليك حريص كل الحرص انك تطلع الاجره في ايدك قبل ما تركب لأنك لو ركبت ممكن متعرفش تطلع المحفظة (هتتمطع التوك توك هيقلب بيك)

رابعا: لو سواق التوك توك كان غشيم ومقضيها مطبات متنبهوش انه عمال يرجرج فيكم زي علبة اللبان كل المطلوب منك انك تمسك نفسك بدال ما تخبط في الي جنبك (ولو كانت واحده امسك نفسك اكتر علشان مش طالبه الليله تقلب بخناقة مع واحده)

خامسا: لو سواق التوك توك عيل صغير متركبش معاه من اصله لأنه هيفعد يلعب بالتوك توك يمين وشمال ويمرجح فيكم جوه وهتنزل دايخ وممكن توك توك تاني يدوس عليك (ده لو موقعتش منه وهوه بيحاول يخف الحموله).

سادسا: خلي بالك من التوك توك في الملفات اليمين والشمال ، امسك نفسك جامد قوي لتنزل زي الرطل على وشك من التوك توك كل الي هيحصل اول حاجه ان هدومك هتتوسخ وتتبهدل ، تاني حاجه هتحس بنفس شعور البرص بس على مسافة اقرب ولو حظك وحش ممكن يجي توك توك تاني مش واخد باله ويفتكرك مطب ويمشي عليك

اخيرا متركبش التوك توك يا عمنا ، مش طالبه بهدله. المشي رياضه برضه

مفيش تعليقات - اضف اول تعليق على الموضوع