الراجل قال كده في التلفزيون

كل الناس عارفه ان المرأه في طريقة تفكيرها مشكله وغريب جدا ومصادر استقاءها للمعلومات اغرب واغرب يعني بالنسبه للمرأه طبيعي جدا انها تشوف نصيحه في ورقة جرنان مقطعه والناس قاعده بتاكل عليها فا تروح شايله الاكل بعيد وتقعد تقرى في النصيحه دي ولما تسألها تقولك اصلها مفيده جدا (ماهي كانت متلقحه قدامك مشفتيهاش كل ده وشفتيها دلوقتي وقت الاكل.)

المعلومه والنصيحه من التلفزيون:

وطبعا بما ان التفكير الغريب ده مبقاش خفي على اي حد وطبعا بما ان المرأه بطبعها بتعشق حاجه اسمها تلفزيون فا اكيد اصحاب القنوات الفضائيه فكروا في طفره جديده واختراع جديد للبرامج التلفزيونيه اسمه البرامج المفيده (نوعا ما يعني) والبرامج دي بكل بساطه بتقدم نصيحه سهلة الفهم وعلى قد عقل المرأه وبيقدمها ناس مختلفة من دكاتره للبرامج الطبيه وشيوخ للبرامج الدينيه وطبعا دجالين لبرامج الدجل والشروروم بورورم.

طبعا اي زوج قديم او جديد هيفرح بالفكره الجهنميه الي بتقعد الست قدام التلفزيون وطبق اللب قدامها وعماله تقزقز وملهاش دعوه بيه لا خرجني بقى ولا فسحنى ولا عايزه اروح اتفرج على الهدوم ولا اي حاجه ، ده حتى ساعات الست من دول بتبقى بره مع جوزها بيفسحها وتقوله كفايه كده علشان تعبت وعايزه اروح البيت ولما تضغط عليها في السؤال عن السبب الحقيقي هتقولك اصلي عايزه اتفرج على البرنامج الفلاني. انما هيهات يا معلم على مين الست ست برضه بعد البرنامج هتلاقي نمط الحياه بتاعكم اتغير بنسبة مليون في الميه.

امثله حيه لبرامج اثرت في ستات البيوت:

طبعا اي واحده بتتفرج على البرامج دي هيحصلها غسيل دماغ من المعلومات الي هيه اصلا عارفاها وهيتكتب مكانها معلومات تانيه. ودلوقتي هقولكم على امثله حيه لناس كتير بسبب البرامج المختلفة الي بتيجي في التلفزيون.

البرامج الطبيه (الرجيم الصحي واساليب الاكل الصحيه):

ممكن جدا الست من دول تبقى بتتفرج على التلفزيون ومعاها طبق اللب ومقضياها قزقزه وتفتح التلفزيون تلاقي واحده معروفه للكل بتتكلم عن اساليب الاكل الصحي وتقول بالنص (اقلي بعيدا عن السمنه البلدي علشان بتخن عالفاضي ومتستعمليش السمنه الصناعي علشان الزيوت المهدرجة واوعي تستعملي الزيت لأن فيه مواد خطر على الجسم ، وطبعا بتبقى قاعد مستنيها تقول بعد كده “بقولك ايه متقليش اصلا”) طبعا اول ما البرنامج يخلص هتلاقي مراتك مجوعاك ولما تقولها جعان حرام عليكي اتقى الله فيها تقوم ترد عليك بكل هدوء وتقول اصل الدكتوره قالت كده في التلفزيون.

البرامج الطبيه (صحة الاطفال):

بما اننا بنتكلم عن البرامج الطبيه فا لازم نحط في الاعتبار البرامج الطبيه الخاصه بصحة الاطفال والي ممكن بكل بساطه تسمع فيها طرق غريبه جدا لتغذية الطفل زي ما الدكتور اياه بيقول بالنص: وطبعا الطفل الرضيع لازم يتعود على نمط اكل منتظم يعني نبعد عن اللبن البودره علشان مشاكل كذا وكذا ونبعد عن اللبن الطبيعي علشان مش ضامنينه وبرضه لازم نبعد عن لبن العلب علشان مفيهوش الفوايد الطبيعيه الي في الالبان التانيه (سؤال واجب طرحه هيه ايه الالبان التانيه ما انت خلاص قلت كله وحش). وطبعا تلاقي ابنك او بنتك مفلوق من العياط علشان جعان وست البيت من دول ولا في دماغها وطبيعي جدا انك ممكن تلاقي ستات بيوت بارده وعماله بتاكل سندوتش والواد لازقلها زي الشحات الغلس ما بيلزق في العربيات النضيفه انها ترميله لقمه انما مفيش تسألها ليه تقولك اصلي سمعت الدكتور قال لازم الطفل يتعود على نظام غذائي سليم.

البرامج الدينيه (البرامج المتشدده):

فئة كبيره جدا من ستات البيوت عرفت دينها عن طريق التلفزيون وطبعا دي حاجه رائعه في حد ذاتها انما حذاري انهم يقلبو على القنوات المتشدده جدا لأنها هتغير نمط الحياه بشكل كبير جدا يعني ممكن في يوم ترجع بيتك تلاقي مراتك قررت انها متخرجش من البيت وارغمتك على انك تسيب شغلك علشان في بنات شغاله معاك فيه وارغمتك انك تلبس جلابيه صبف او شتا (وطبعا المشكله في الشتا لأن الجلابيه بتبقى مفتحه من كل حته) وفوق كل ده ترغمك ان بنتك الي عندها سنتين تلبس حجاب.

البرامج الدينيه (برامج السحر والشعوذه):

للاسف في قنوات فضائيه كتير اسمها والظاهر بتاعها يدل انها قنوات دينيه بحته انما الباطن بتعاها هتلاقيه سحر وشعوذه وابراج وتفسير احلام (على مزاجهم مش ديني) وازاي نفك العمل الي مكتوب على رجل نمله حامل ماتت في المحيط الهادي ، والي يقولك نصيبك ايه مع البت الي انت بتحبها. ممكن جدا ترجع في يوم تلاقي مراتك بتقولك حبيبي انا شفت في التلفزيون ان التوافق بين اسمي واسمك مش كويس من ناحيتك فا شكيت قمت اتصلت واديتهم تواريخ ميلادنا وقالولي انك مش بتحبني وبتحب واحده تانيه عليا وهتتجوزها فا يا اما تطلقتي يا اما مش هقدر اعيش معاك ، طبعا انت هتحاول جاهدا انك تفهمها بهدوء ان الكلام ده ملوش اي صحه ولا ليه علاقه بالواقع وانه مجرد اكل عيش هتلاقيها بتقولك لأ ده دكتور في الفلك الي قالي الكلام ده وانت مش هتعرف اكتر منه. طبعا ممكن متمالكش نفسك وتقوم خناقه كبيره يتكسر فيها العفش الي في الشقه بس احسنلك تبقى حليم وتمسك اعصابك علشان العفش الي في الشقه سيادتك ماصي عليه في القايمه.

طبعا في امثله تانيه كتير جدا للبرامج الي بتغير نمط الحياه بتاعت كل واحد فينا (منهم لله) انما دول اهم مجموعة برامج ممكن تلاقي ليك تجربه معاهم. وزي ما قلنا المشكله لازن نقول شوية حاجات ممكن تحل الموضوع ده.

ازاي يتم معالجة الظاهره دي

اولا مسح القنوات دي: اول طريقه لمعالجة المشكله دي انك بكل بساطه تمسح القنوات من النوعيه دي والي مراتك قد تكون مياله ليها. يعني لو لقيت انها مهتمه بالبرامج الطبيه امسح كل القنوات الطبيه من على الدش ، طبعا هتسأل نفسك ازاي وهيه مش بتقوم من قدام التلفزيون من اصله. بكل بساطه ممكن تعمل كده وهيه نايمه باليل تسهر انت شويه بحجة ان عندك شغل عايز تخلصه وتمسح القنوات دي تصحي هيه تاني يوم فا تقولها اصلي كنت بقلب بالليل في التلفزيون ولقيتهم مش شغالين فا مسحتهم وهبقى اجيب بتاع الدش يصلحهم وكل ما تسألك عن بتاع الدش قلها بكره لحد ما تنسى (احمد ربنا ان الستات بينسو كتير).

ثانيا اضرب المربوط يخاف السايب: بكل بساطه لما تلاقي ابنك او بنتك بيفترج على الكارتون وبيعمل زيه ويطير زي جريندايزر اول ما يخلص اضربه او زعقله قوي بس اهم حاجه الكلام ده يكون قدام مراتك فا دايما هتحط في بالها انها لو اتأثرت بأي برنامج هتشوفه هتتخانق معاها زي ما عملت مع ابك او بنتك.

ثالثا المحايله والهدوء في التعامل: الطريقه دي اثبتت نجاح عظيم مع قنوات الدجل والشعوذه وهيه انك بكل هدوء تفهم مراتك ان الكلام ده كلام فارغ ملوش اساس من الصحه واوعى ثم اوعى انك تتنرفز لأنك لو اتنرفزت في نظر مراتك هيبقى فعلا في حاجه انت مخبيها وكلام الدجالين صح. وهتقولك انت متنرفز لأن الدكتور الفلاني كشفك على حقيقتك.

رابعا شيل التلفزيون خالص: الطريقه دي كويسه جدا بس مشكلتها انها عايزه حزم جامد جدا وبتتلخص في ان اول ما مراتك تبدأ تتأثر بأي نوع من البرامج تروح شايل التلفزيون كله كعقاب ليها بحجة ان مش التلفزيون هوه الي هيتحكم في حياتكم ولما تقولك خلاص حرمت برضه خليه متشال لحد ما تبقى واثق ميه في الميه انها مش هتعمل كده تاني ولو انت غاوي تلفزيونات انت كمان ممكن تحطه في اوضه تانيه وتتفرج عليه لوحدك وبكده هتذلها وفعلا مش هتعمل كده تاني.

اخيرا احب اناشد كل واحده بتقرى الكلام ده انها متتأثرش بأي برنامج تلفزيوني ولازم تعرف انهم بيتكلمو عن حالات مش ثابته (لكل قاعده استثناء) ومش بالضروره الكلام الي بيقولوه في التلفزيون ينفع في الحاله الي انتو فيها. لو عايزه حاجه تفصيل علشانها متقولش اصلي سمعت الراجل بيقول كده انما تروح لحد موثوق فيه تسأله يا اما دكتور تغديه او دكتور اطفال بالنسبه للبرامج الطبيه او تروح لشيخ الجامع الي تحت بيتهم تسأله عن الحاله الي عايزه تعرفها وتسأله عن حكم الايمان بالطالع والابرامج والهبل ده كله في حالة البرامج الدينيه المتشدده او بتاعت السحر والدجل. وربنا يهدينا ويهديكم.

2 تعليقات