اسم البرنامج: ستار اكاديمي
القناه الي بتعرضه: قناة ال بي سي اللبنانيه
اوعى تكون من متابعي برنامج ستار اكاديمي لحسن ازعل منك وممكن الكلام الي جاي في السكه ده يلطك فا تزعل مني. لو انت من متابعي برنامج ستار اكاديمي اقلب على اي موضوع تاني لأنك هتزعل قوي من كلامي او اقولك ممكن تخلي حد مش متابعه يقراهولك ويبقى يحكيلك ايه الي مكتوب.
برنامج ستار اكاديمي
فكرة البرنامج: فكرة البرنامج دي متخده من كذا برنامج في امريكا ودمجوها مع بعض علشان يوصلو لأسوأ ميكس ممكن يتعمل في الانفلات الاخلاقي واسوأ استغلال لقلة الوعي عند الشباب العربي وطبعا القناة الي بتقدمه هيه قناة LBC اللبنانيه الي بتقدم برنامج انقح منه وهوه برنامج هزي يا وزه… اقصد هزي يا نواعم.
المفروض ان البرنامج ده بيجيب شويه عيال من كذا دوله عربيه والعيال دي اشتركت في البرنامج تحت الحلم بتاع الشهره والمجد والفلوس بغض النظر عن الموهبه وتذوق الموسيقى (المفروض اي حد عايز يغني على الاقل يعرف السلم الموسيقي ويبقى عنده تذوق للموسيقى ، ممكن تروح اشرف فرغلي تدوقها هناك)
المهم البرنامج بيوريك كل حاجه عن المتسابقين عايشين ازاي بياكلو ازاي بيدندنو امتى (معظمهم بتلاقيه من عاشقي الغناء في الحمام وقت الدش ، بس طبعا مش هيجيبوهم وهمه بيغنو في الحمام علشان الرقابه وخصوصا البنات ، ممكن يجيبو صوت بس وضل من ورا الحاجز الزجاجي والمشاهد يشوف الضل بتاعهم ويتخيل الباقي). وفي اخر كل اسبوع بيجيبو واحد مشهور قال يعني بيشقر عليهم ويشوف اخبارهم ايه. وبعد كده بينزل اسوأ تلاته في التصويت على مين يستنى فيهم ومين يفلسع ، ومع كل اسبوع في واحد جديد بيفلسع وبيطير لبلده تاني وخيبه الامل راكبه حمار ، وطبعا علشان ياعين امه محدش دعمه انه يستنى وفي الاخر واحد منهم بيكسب.
طريقه فلسعة المشتركين ومين بيكسب وعلى اساس ايه بالظبط:
المشاهد هنا ليه دور كبير جدا في دعم المشترك او المشتركه طبعا مع لجنة التحكيم العادله والفاير (Fair) وطبعا كل ما المشترك جاله اصوات اكتر كل علي صوته في الغنا اكتر واكتر وكانت فرصته في الفلسعه اقل.
يعني على سبيل المثال في سيزون من البرنامج كسب فيه المغني محمد عطيه اعتمادا على صوت الجمهور المصري الي دعمه (75 مليون مصري) مش علشان صوته حلو ، انما علشان هوه مصري واتكلم مصري يا ابن بلدي ولازم اكسبك. بس لو اخدنا بالنا من الحكايه دي هنلاقي ان الرساله لو كانت بنص جنيه يبقى الشركة المنتجه للبرنامج اخدت 25مليون جنيه من 50 مليون مصري (طبعا لا الرساله بنص جنيه ولا الي هيشترك 50 مليون مصري) المهم دعم المشاهد ليه دور كبير جدا في نجاح المشترك او فشله وكل الدعم ده بيبقى من الناس (الهايفه) الي بتبعتSMS.
الي بيكسب ايه الي بيحصله؟
الي بيكسب في البرنامج بيتعمله البوم اغاني (طبعا محدش هيسمع الالبوم ولا هيحقق اي مبيعات) بس كفايه الطرقعه الاعلانيه الي هتصاحب المطرب الكسبان بأنه كسب ستار اكاديمي. وبقى مطرب بدراعه وصوت الناس. وفي الغالب بعدها هيتعمله فيلم او اتنين فاشلين ومش هيجيبو حتى التكلفه بتاعتهم.
ملاحظات عامه عن البرنامج:
اولا: البرنامج بيعتمد بالدرجة الاولى على تأييد الناس لمواطنيهم يعني لو عندك في البرنامج واحد مصري وواحد سعودي هتلاقي كل دوله من الاتنين دول مغرقه البرنامج رسائل تأييد لمواطنيهم وطبعا لا المشترك ده كسبان ولا المشترك ده كسبان (تقريبا الفلوس دي بيجيبو بيها الـStar الي بيجي اخر كل اسبوع علشان يشقر عالمشتركين)
ثانيا: حياة المشتركين جوه البرنامج مسخره في مسخره تبص تلاقي الصبيان والبنات بيهرجو مع بعض بكلام قبيح وبأديهم والي يضرب البت على قفاها علشان كان مسلطح ساعتها والي يبص للبت من دول بصه تنم عن شعور ليس الا انه عايز يغرر بيها لولا الكاميرا الي هتفضحه لو عملها حاجه.
ثالثا: ياترى ايه لزمة المغني الي بيروح اخر كل اسبوع علشان يشقر عالمشتركين؟ ويعمل حفله معاهم هل ممكن يكون هوه لجنة التحكيم الخفيه الي محدش عارفها ، ولا هل علشان يعلمهم المغنى الاصيل (زي ما الفنانه مروى راحتلهم علشان تعلمهم الرقص على اصوله).
برنامج ستار اكاديمي ده برنامج ترفيهي قمه في الغتاته والتفاهة والا مسئوليه ، وطبعا الا مسؤوليه الاكبر مش على المشترك الي بيغني او بيمثل او بيرقص انما على المشاهد او المشاهده الهايفين الي مقضينها SMS علشان الفنان (حبيبهم) ميفلسعش من المسابقه.
|
